Иоанн 6 - Библи

¹ Энээнэй һүүлдэ Иисүүс Галилейн гэхэ гү, али Тибериадай нуурай нүгөө эрьедэ гараба.

² Хойноһоонь олон зон дахалдаба, юундэб гэхэдэ, үбшэн хүнүүдые гайхамшаг аргаар Иисүүсэй эмнэн эдэгээхые үзэһэн хараһан байна бшуу.

³ Иисүүс шабинартаяа хамта хада дээрэ гаража һууба.

⁴ Еврейнүүдэй Паасхын һайндэр болохонь ойртожо байгаа.

⁵ Иисүүс урдаһаань олон зоной ерэжэ ябахые хараад, Филипптэ хандан: – Эдэ зониие эдеэлүүлхэ хилээмэ хаанаһаа худалдажа абахамнайб? – гэжэ хэлэбэ.

⁶ Иисүүс юу хэхэеэ мэдэжэ байгаад, Филиппые туршан тиигэжэ хэлээ бшуу.

⁷ – Хоёр зуун динари мүнгөөр хилээмэ худалдажа абаад, зүһэм зүһэмөөршье хубаагаа һаа, бултанда хүртэхэгүйл, – гэжэ Филипп харюусаба.

⁸ Шабинарайнь нэгэн, Симон Пётрой дүү Андрей:

⁹ – Эндэ байһан нэгэ хүбүүндэ таба монсогор ешмээн хилээмэн, хатааһан хоёр загаһа бии. Теэд иимэ олон хүндэ энэнь яажа хүртэхэб даа? – гэжэ хэлэбэ.

¹⁰ – Хүнүүдые һуулгагты, – гэжэ Иисүүс захирба. Тэрэ газартань үдхэн ногоон ургажа байгаа. Тэндэнь табан мянга шахуу ганса эрэшүүл байлсаа.

¹¹ Иисүүс хилээмыень абаад, Бурханда баясхалан хүргэжэ, тэндэ һуугшадта хубаан үгэбэ. Мүн загаһыень баһал хүн бүхэндэ дураарнь хубаажа үгэбэ.

¹² Хүнүүдэй эдеэлжэ садахадань, Иисүүс: – Үлөөшэ хилээмэеэ бултыень суглуулагты, юушье бү орхигты, – гэжэ шабинартаа хэлэбэ.

¹³ Таба монсогор ешмээн хилээмэнһээнь үлэһэн зүһэмүүдые арбан хоёр түрсүүг дүүрэтэр шабинарынь суглуулба.

¹⁴ Иисүүсэй хэһэн иимэ гайхамшаг хэрэгүүдые хараад: – Энэмнай дэлхэйн зондо ерэхэ ушартай байһан ёһоороол тэрэ Лүндэншэ байна! – гэжэ хүнүүд хэлсэбэ.

¹⁵ Эдэ хүнүүд Намайе барижа, баалалтаар хаан болгожо табихаяа байна гэжэ ойлгоод, Иисүүс гансаараа дахин хада өөдэ гараба.

Иисүүс уһан дээгүүр ябана

¹⁶ Үдэшэ болоходо Иисүүсэй шабинарынь нуурай эрьедэ ошобо.

¹⁷ Онгосодо һуугаад, нуурай нүгөө бэедэ оршодог Капернаум хото тамаран ошобо. Харанхы болобошье, Иисүүс үшөө ерээдүй байгаа.

¹⁸ Тэрэ үедэ шанга һалхин боложо, нуур ехээр долгилбо.

¹⁹ Нуурай эрьеһээ таба-зургаан модо газарта онгосоороо тамаржа ошоод, шабинарынь Иисүүсэйнгээ нуурай уһан дээгүүр алхалан, онгосодонь дүтэлжэ ябахые хараба. Тэдэн ехээр айжа мэгдэбэ.

²⁰ – Энэ Биб, бү айгты! – гэбэ Иисүүс.

²¹ Шабинарынь Иисүүсые онгосодоо һуулгаха һанаатай байба, теэд онгосонь тэрэ дороо зориһон эрьедээ хүрэжэ ерэшэбэ.

Иисүүс – Амидаралай хилээмэн мүн

²² Нүгөөдэрынь нуурай саана үлэһэн хүнүүд үсэгэлдэр гансахан лэ онгосо байгаа бэлэй гэжэ һанаба. Теэд Иисүүс шабинартайгаа хамта тэрэ онгосодо һуугаагүй, һурагшадынь амяараа тамаран ошоо гэжэ тэдэ зон мэдэжэ байгаа.

²³ Тиихэдэ Тибериадаһаа зон хэдэн онгосонуудта һуугаад, Эзэнэй Бурханда баясхалан хүргэһэнэй һүүлдэ олошоруулагдаһан хилээмэ зоной эдиһэн газарта тамаран ерэбэ.

²⁴ Теэд тэндэнь Иисүүсшье, шабинарыньшье байбагүй, тиимэһээ тэндэ байһан зон онгосонуудта һуугаад, Иисүүсые бэдэржэ, Капернаум руу тамаран ошобо.

²⁵ Нуурай нүгөө эрьедэ тэдэнэр тамаран ерэжэ, Иисүүсые олоод: – Багша аа, Та хэзээ иишэ ерэһэн байбат? – гэжэ асууба.

²⁶ Иисүүс тэдэндэ иигэжэ харюусаба: – Таанар гайхамшаг дүлгэ тэмдэгүүдые үзэһэн хараһанһаа бэшэ, харин хилээмэ эдижэ садаһан дээрэһээл Намайе бэдэрнэт гэжэ таанадта үнэн зүбые хэлэнэб.

²⁷ Теэд таанар саг зуурын эдеэндэ һаналаа бү табигты, харин мүнхын амидарал олгодог эдеэндэ һаналаа табигты. Тиимэ амидаралые таанарта Хүн түрэлхитэнэй Хүбүүн үгэхэ, Бурхан Эсэгэ Тэрээндэ эрхэ засагаа үршөөгөө юм.

²⁸ – Бурханай заабари бэелүүлхын тула бидэ юу хэхэ ёһотойбибди? – гэжэ тэдэнь асууба.

²⁹ – Бурханай эльгээһэн хүндэ таанар этигэгты, тиихэдээл Бурханай хэрэгые бүтээһэн болохот, – гэжэ Иисүүс харюусаба.

³⁰ – Теэд ямар дүлгэ тэмдэгыетнай хараад, бидэ Танда этигэхэ болонобди? Та юу хэхэбта? – гэжэ тэдэ асууба. –

³¹ Манай үбгэ эсэгэнэр сүл губида ябахадаа, манна эдидэг байгаа. «Тэнгэриһээ тэдээндэ хилээмэн үгтөө», – гэжэ Нангин Бэшэг соо бэшэгдэнхэй.

³² Тиихэдэнь Иисүүс: – Би таанарта үнэн зүбые хэлэнэб: Бурханай хилээмэ таанарта Моисей үгөөгүй, тиимэ ёһотой хилээмэ Минии Эсэгэ Бурхан таанарта үгэдэг.

³³ Юундэб гэбэл, Бурханай хилээмэн Тэнгэриһээ буужа ерээд, энэ дэлхэйн зондо ажамидарал үгэгшэ мүн, – гэжэ харюусаба.

³⁴ – Эзэн аа, бидэндэ тиимэ хилээмэ хододоо үгэжэ байгыт! – гэжэ тэдэнь хэлэбэ.

³⁵ – Би Өөрөө ажамидаралай хилээмэн гээшэб. Намда ерэдэг хүн хэзээдэшье үлэн хооһон байхагүй, Намда этигэдэг хүн хэзээдэшье ундаа хүрэхэгүй.

³⁶ Теэд энээниие өөһэдөө үзэһэн хараһаншье һаа, этигэнэгүйт гэжэ таанарта хэлээ һэм.

³⁷ Минии Эсэгын Намда үгэһэн хүн бүхэн Намда ерэхэ. Намда ерэһэн хүниие Би намнахагүйб.

³⁸ Юундэб гэхэдэ, Өөрынгөө дураар юумэ хэхэеэ Би тэнгэриһээ буужа ерээ бэшэб, харин Намайе эльгээһэн Эсэгын дура хүсэлые бэелүүлхэеэ ерээб.

³⁹ Намайе эльгээһэн Эсэгын дура хүсэлынь иимэ: Тэрэнэй Намда үгэһэн хүнүүдэй нэгыеньшье хосороонгүйгөөр, һүүлшын Үдэртэ бүгэдые амидыруулха.

⁴⁰ Юундэб гэбэл, Минии Эсэгын дура хүсэлынь иимэ: Бурханай Хүбүүе харадаг, Тэрээндэ этигэдэг хүн бүхэн мүнхэ наһатай байха. Тиин һүүлшын Үдэр Би тэдэниие амидыруулхаб.

⁴¹ Би Тэнгэриһээ буужа ерэһэн хилээмэн гээшэб, – гэжэ Иисүүсэй хэлэхэдэнь, тэндэ сугларагшадай дунда гэмэрэлдээн болобо.

⁴² – Энэмнай Иосифой хүбүүн Иисүүс ха юм? Тиимэ бэшэ аал? Бидэ Тэрэнэй эсэгыеньшье, эхыеньшье мэдэхэбди. Теэд «Би тэнгэриһээ буужа ерээб», – гэжэ энэ юундэ хэлэнэб? – гэлдэбэ тэдэнь.

⁴³ – Таанар бү гэмэрэлдэгты.

⁴⁴ Минии Эсэгэ хэниие Намда ерүүлнэб, тэрэл хүн Намда ерэжэ шадаха. Иимэ хүниие һүүлшын Үдэртэ Би амидыруулхаб.

⁴⁵ «Бүхы хүнүүдые Бурхан һургаха», – гэжэ лүндэншэд бэшэһэн байна. Эсэгын үгэ дуулажа, Тэрэнэй һургаал ойлгожо абаһан хүн Намда ерэхэ.

⁴⁶ Теэд Эсэгые хэншье хараагүй юм. Тэрэниие Бурханһаа Ерэгшэл гансаараа хараа.

⁴⁷ Таанарта үнэн зүбые хэлэнэб: Намда этигэдэг хүн мүнхэ наһанда хүртөөд байна.

⁴⁸ Би ажамидаралай хилээмэн гээшэб.

⁴⁹ Таанарай үбгэ эсэгэнэр сүл губида ябахадаа, ман эдибэшье, үхэһэн байна.

⁵⁰ Харин тэнгэриһээ буужа ерэһэн хилээмэһээ эдиһэн хүн хэзээдэшье үхэдэггүй.

⁵¹ Би Тэнгэриһээ буужа ерэһэн амиды хилээмэн гээшэб. Энэ хилээмые эдиһэн хүн мүнхэ наһатай болохо. Тэрэ хүндэ Минии үгэхэ хилээмэн хадаа Минии бэемни гээшэ, тиин энэ бэеэ бүхы дэлхэйн ажамидаралай түлөө Би үгэнэб.

⁵² Тиихэдэнь еврейнүүдэй хоорондо гани халуун арсалдаан болобо: – Энэ хүн хайшан гээд өөрынгөө бэеые манда эдюулхэнь гээшэб?!

⁵³ Иисүүс харюусаба: – Хүн түрэлхитэнэй Хүбүүнэйл бэе эдидэг һаа, Тэрэнэйл шуһа уудаг һаа, амидаралгын шанартай байхат гэжэ таанарта үнэн зүбые хэлэнэб.

⁵⁴ Минии бэе эдидэг, Минии шуһа уудаг хүн мүнхэ наһатай болобо – тиин тэрэ хүниие Би һүүлшын Үдэртэ амидыруулхаб.

⁵⁵ Минии бэе хадаа ёһотой эдеэн гээшэ, Минии шуһа хадаа ёһотой унда гээшэ.

⁵⁶ Минии бэе эдидэг хүн, Минии шуһа уудаг хүн Минии досоомни байна, Би баһал тэрэнэй досоонь байнаб.

⁵⁷ Намайе эльгээһэн Эсэгэмни мүнхэдөө амидаралгын шанартай юм. Тэрэ Минии амидаралай эхин болоно. Энээндэл адли, Би Намайе эдидэг хүнэй амидаралай эхин байхаб.

⁵⁸ Тэнгэриһээ бууһан хилээмэн – энэ байна. Үбгэ эсэгэнэрэйтнай эдеэд үхэһэн хилээмэн иимэ бэшэ һэн. Харин энэ хилээмэ эдидэг хүн мүнхэ наһатай байна.

⁵⁹ Капернаумай мүргэлэй гэр соо һургаалаа номноходоо, Иисүүс тиигэжэ хэлэдэг һэн.

Зарим шабинарынь Иисүүсые орхёод арилба

⁶⁰ Эдэ үгэнүүдые шагнаһан олон шабинарынь: – Энэнь жэгтэй һонин һургаал байнал! Шагнахыншье аргагүйл! – гэлсэбэ.

⁶¹ Тэрэнэй үгэнүүд шабинарайнь дура гутааба гэжэ мэдээд, Иисүүс тэдэндээ иигэжэ хэлэбэ: – Эдэ үгэнүүдни таанад соо һэжэг түрүүлнэ гү?

⁶² Теэд Хүн түрэлхитэнэй Хүбүүнэй түрүүшээр байһан орондоо дэгдэн бусахые харахадаа, юун гэхэбта?

⁶³ Ажамидарал гансал Һүлдэһөө эхи абадаг, харин хүнэй бэе эндэ юушье хэжэ шадахагүй. Таанадта Минии хэлэһэн үгэнүүд хадаа Һүлдэ, Ажамидарал гээшэ.

⁶⁴ Теэд заримантнай Намда этигэнэгүйл. Хэн Тэрээндэ этигэнэгүйб, хэн Тэрээниие барижа үгэхэб гэжэ Иисүүс анханһаа мэдээд байгаа.

⁶⁵ Иисүүс саашань үргэлжэлүүлэн хэлэбэ: – Эсэгымни үршөөлгүйгөөр хэншье Намда ерэжэ шадахагүй гэжэ би таанадта хэлээ һэнби.

⁶⁶ Энээнһээ хойшо Иисүүсэй олон шабинарынь Тэрэниие орхёод, саашадаа Тэрээнтэй ябалсаагүй.

⁶⁷ Өөрын арбан хоёр шабиһаа Иисүүс һураба: – Магад, таанаршье Намайе орхихо һанаатай гүт?

⁶⁸ – Эзэн аа, бидэ ондоо хэндэ ошохомнай гээшэб? Тандал мүнхэ наһа олгодог үгэнүүд байна ха юм.

⁶⁹ Та Бурханай Арюун Хүбүүнта гэжэ бидэ этигэнэбди, мэдэнэбди, – гэжэ Симон Пётр харюусаба.

⁷⁰ – Би Өөрөөл Арбан хоёр таанадые шэлэжэ абаа бэшэ һэн гүб! Теэд таанадай нэгэн шолмос байна! – гэжэ Иисүүс харюусаба.

⁷¹ Иигэжэ Симон Искариодой хүбүүн Иуда тухай Иисүүс хэлэһэн байна. Тэрэ Арбан хоёрой нэгэниинь байһан аад, һүүлээрнь Иисүүсые барижа үгэхэ.