Иоанн 3 - Библи

Иисүүстэ Никодим ерэбэ

¹ Еврейнүүдэй ахамадай нэгэн болохо Никодим гэжэ фарисей байгаа.

² Тэрэ нэгэ һүни Иисүүстэ ерээд: – Рабби, Та Бурханай эльгээһэн багшат гэжэ бидэ мэдэнэбди. Хэрбээ Бурханай үршөөгөөгүй һаа, Та иимэ гайхамшагта үзэгдэлнүүдые харуулжа шадахагүй һэнта, – гэжэ хэлээ һэн.

³ – Дахин түрэһэн лэ хүн Бурханай хаан орониие үзэхэ гэжэ Би шамда үнэниие хэлэнэб! – гэжэ Иисүүс тэрээндэ харюусаба.

⁴ – Наһаяа хүсэһэн хүн яагаад дахин түрэхэ юм? Тиимэ хүн эхын умайда дахин орожо, хоёрдохиёо түрэхэгүй бшуу, – гэжэ Никодим Тэрээндэ хэлэбэ.

⁵ – Би шамда үнэниие хэлэнэб: уһанһаа, Һүлдэһөө түрэһэн хүн лэ Бурханай хаан орондо орожо шадаха!

⁶ Хүнэй бэеһээ түрэһэн юумэн бэе махабад мүн, имагтал Һүлдэһөө Һүлдэ түрэдэг.

⁷ «Таанар дахин түрэхэ ёһотойт», – гэжэ Минии хэлэхэдэ бү гайхаарайт.

⁸ Һалхин дуратайл газартаа һалхилдаг. Һалхинай һалхилхые мэдэбэшье, хэзээ, хайшаа үлеэхыень таанар мэдэдэггүйт, Арюун Һүлдэһөө түрөөшэд энээндэл адли юм.

⁹ – Тиимэ юумэн ушарха аргатай аал? – гэжэ Никодим һураба.

¹⁰ – Ши Израилиин багша аад, энээниие мэдэнэгүй аалши? – гэжэ Иисүүс харюудань хэлэбэ. –

¹¹ Бидэ өөһэдынгөө мэдэхэ, хараһан үзэһэн юумэн тухайгаал гэршэлнэбди гэжэ үнэн зүбые хэлэнэб, харин таанар бидэнэй гэршэ баримта буруушаанат.

¹² Газар дээрэхи юумэн тухай Минии хэлэхэдэ Намда этигэхэгүй аад, тэнгэриин юумэн тухай хэлэхэдэмни яагаад таанар этигэхэбта даа?

¹³ Тэнгэриһээ буужа ерэһэн Хүн түрэлхитэнэй Хүбүүнһээ ондоо хэншье Тэнгэридэ гаража үзөөгүй ха юм.

¹⁴ Моисей сүл губяар ябахадаа, зэдээр бүтээһэн могой өөдэнь үргөө юм, тэрээндэл адляар Хүн түрэлхитэнэй Хүбүүн өөдөө үргэгдэхэ ёһотой.

¹⁵ Тиигэбэл Тэрээндэ этигэдэг хүн бүхэн мүнхэ ами наһатай байха.

¹⁶ Бурхан дэлхэйн хүнүүдтэ тон ехээр дурлаһандаа Өөрынгөө ори ганса Хүбүүе үргэл болгожо үгөө. Энэ Хүбүүндэ этигэдэг хүн бүхэн хосоронгүй, мүнхэ ами наһатай байха.

¹⁷ Бурхан дэлхэйнхидые зэмэлхын тула бэшэ, харин тэдэниие абархын тула Хүбүүгээ газарта эльгээгээ.

¹⁸ Тэрэ Хүбүүндэнь этигэдэг хүн гэмнүүлхэгүй, харин этигэдэггүй хүн мүнөөшье гэмнүүлээд байна, тиимэ хүн Бурханай ганса Хүбүүндэ этигээгүй бшуу.

¹⁹ Гэмнэлгын удхань иимэ: газар дэлхэйдэ Гэрэл туяагай ерэхэдэнь, хүнүүд шэг харанхы байдалда Гэрэл туяаһаа үлүү ехээр дурлаа, ушарынь гэхэдэ, хүнүүдэй үйлэ хэрэг муу муухай ха юм.

²⁰ Муу юумэ хэдэг хүн гэрэл туяа үзэн ядадаг, муу муухай үйлэ хэрэгни элирэн мэдэгдэхэ гэжэ айгаад, гэрэл туяада ошодоггүй юм.

²¹ Харин үнэн сэхээр ажаһуудаг хүн гэрэл туяа тээшэ эрмэлзэнэ, тэрэнэй үйлэ хэрэгынь Бурханай урда хэгдэнэ гэжэ элирнэ бшуу.

Иисүүс болон Уһаар Арюудхагша Иоанн

²² Удаань Иисүүс шабинартаяа хамта Иудей ошожо, тэндэ хэдэн сагай туршада хүнүүдые уһаар арюудхан байба.

²³ Харин Иоанн тэрэ үедэ Шалээмэй хажуудахи Эноон голой уһаар арюудхажа байгаа. Тэрэ газарта уһан ехэ элбэг байһан юм. Хүнүүд Иоаннда ерэжэ, уһаар арюудхуулдаг һэн.

²⁴ Энэнь Иоаннай түрмэдэ хаагдахын урдахана болоһон ушар.

²⁵ Нэгэтэ Иоаннай шабинар еврейнүүдэй арюудхалгын заншал тухай нэгэ еврейтэй арсалдаба.

²⁶ Тэдэ Иоаннда ерээд: – Рабби аа, Иорданай саада бэедэ байхадаа нэгэ Хүн тухай хэлэһэнээ һанана гүт? Тэрэтнай баһал уһаар арюудханал, хүнүүд Тэрээндэ булта ошонол! – гэбэд.

²⁷ – Тэнгэриин үршөөгөөгүй юумэ хэншье абажа шадахагүй, – гэжэ Иоанн харюусаба. –

²⁸ Таанар өөһэдөө «Би Бурханай табисуурта бэшэб, би миин лэ Тэрээнһээ урда эльгээгдэһэн байнаб», – гэжэ минии хэлэһэнэй гэршэнэрта.

²⁹ Гэрлэхэ басагые гэртээ асарһан хүн тэрэ басаганай нүхэрынь гээшэ. Гэрлэхэ хүнэй хажууда зогсожо байһан дүтынь нүхэр хүбүүниинь тэрэнэй хэлээшые шагнан баясадаг. Тиин намдашье тиимэ ехэ баяр баясхалан тудаа.

³⁰ Гэрлэхэ хүбүүнэй алдаршаха саг ерээ. Харин минии саг дүүрэжэ байна.

³¹ Дээдын тэнгэриһээ ерэгшэ газарайхидһаа бултанһаань дээгүүр. Дэлхэйн хүн замби түбиһээ байжа, газарайхяар лэ хэлэдэг. Харин дээдын тэнгэриһээ Ерэгшэ бултанһаа дээгүүр юм.

³² Тэрэ нюдөөрөө хараһанаа, шэхээрээ дуулаһанаа Өөрөө гэршэлэн хэлэнэ, теэд Тэрэнэй гэршэ баримтада хэншье этигэнэгүй.

³³ Тэрээндэ этигэһэн хүн Бурханай үнэн зүб байдагыень гэршэлнэ.

³⁴ Бурханай эльгээгшэ Бурханай үгэ номноно, юундэб гэбэл, Бурхан Тэрээндэ Арюун Һүлдэ хизааргүй ехээр үршөөнэ.

³⁵ Эсэгэ Бурхан болбол Хүбүүндээ дуратай байжа, бүхы юумэ Тэрээнэйнгээ мэдэлдэ үгөө.

³⁶ Бурханай Хүбүүндэ этигэдэг хүн хэтэ мүнхын ажамидаралда хүртэхэ, харин энэ Хүбүүниие буруушааһан хүн хэтын амидарал үзэхэгүй, Бурханай уур сухал хододоо хүргэжэ байха.