Иоанн 19 - Библи

¹ Тиихэдэнь Пилат Иисүүсые ташуурдагты гэжэ захирба.

² Сэрэгшэдынь үүргэнээр гүрлөө гүрэжэ, толгой дээрэнь табиба, Тэрээндэ улаан суба үмдэхүүлбэ.

³ Иисүүстэ дүтэлжэ ерээд: – «Еврейнүүдэй хаан» мандаха болтогой! – гэлдэн, Иисүүсэй нюур альгадабад.

⁴ Пилат дахин гаража, еврейнүүдтэ хандан: – Тэрэниие таанадта харуулхамни. Таанар мэдэжэ байгты: би энэ Хүндэ зэмэ тохохо ямаршье баримта олоногүйб, – гэбэ.

⁵ Тиихэдэнь Иисүүс ордон сооһоо гаража ерэбэ, хадхууртай үбһэн гүрлөө толгой дээрэнь табигданхай, улаан суба үмэдхүүлэнхэй байба. – Тэрэ Хүн энэ байна! – гэбэ Пилат.

⁶ Теэд түрүү санаартан, харуулшад Иисүүсые хараад: – Хэрээһэндэ хада, хэрээһэндэ хада! – гэжэ хашхаралдаба. – Өөһэдөө барижа, хэрээһэндэ хадагты! Би зэмэлхэ юумэ олоногүйб, – гэжэ Пилат хэлэбэ.

⁷ – Манай Хуулиин ёһоор энэ Хүн үхэхэ ёһотой, юундэб гэхэдэ, Өөрыгөө Бурханай Хүбүүнби гэжэ айладхана, – гэжэ еврейнүүд харюусаба.

⁸ Пилат энээниие дуулаад, бүри ехээр айшаба.

⁹ Дахин ордондоо ороод: – Та хаанаһаабта? – гэжэ Иисүүсһээ һураба. Теэд Иисүүс харюусабагүй.

¹⁰ Тиихэдэнь Пилат: – Намтай хөөрэлдэхэ дурагүй байна гүт? Би Таниие табюулхашье эрхэтэйб, саазалуулхашье эрхэтэйб, энээн тухай мэдэнэгүй гүт? – гэбэ.

¹¹ – Хэрбээ дээрэһээ тиимэ эрхэ танда үгтөөгүй һаа, та Намайе заяандаашье мэдэлдээ абажа шадахагүй һэнта. Тиимэһээ Намайе танда тушааһан хүнэй нүгэлынь бүришье ехэ юм.

¹² Тиигэжэ хэлэхэдэнь, Пилат Иисүүсые хаалтаһаа сүлөөлхэ гэжэ оролдоо. Теэд еврейнүүд: – Хэрбээ та Энээниие табяа һаа, Римэй хаанай нүхэр бэшэт! Өөрыгөө хаан гээшэб гэдэг хүн императорай урдаһаа эсэргүүсэн тэмсэнэ гээшэ! – гэжэ хашхаралдаба.

¹³ Пилат иимэ үгэнүүдые дуулахадаа, Иисүүсые ордон сооһоо гаргаһан бэеэрээ, заргашын һуудаг сандалида һууба. Энэнь «Шулуугаар дэбдигдэһэн газар» (еврей хэлээр «Габбатаа») гэжэ нэрэтэй.

¹⁴ Энэ ушар Паасхын һайндэрэй урдахана, зургаан гарагай хахад үдэрэй багаар болоо. – Харагты даа, энэ таанарай Хаан! – гэжэ Пилат еврейнүүдтэ хандан хэлэбэ.

¹⁵ – Үгы болог! Тонилог саашаа! Энээниие саазала! – гэжэ тэдэнь хашхаралдаба. – Таанарай Хааниие саазалхамни гү? – гэжэ Пилат асууба. – Римэй хаанһаа бэшэ ондоо хаан маанадта байхагүй! – гэжэ түрүү санаартан харюусаба.

¹⁶ Тиихэдэнь лэ Иисүүсые хэрээһэндэ хадажа саазалхыень Пилат зүбшөөһэн байна. Тэдэ Иисүүсые харуулда дамжуулба. Тиихэдэнь тэдэ Иисүүсые туужа абаашаба.

Иисүүсые хэрээһэндэ хадажа саазалба

¹⁷ «Хохимой» (еврей хэлээр «Голгофо») гэжэ нэрэтэй газар хүрэтэр Иисүүс хэрээһэеэ бэе дээрээ үргэлөөд ябаха ёһотой байгаа.

¹⁸ Тэндэ Иисүүсые хэрээһэндэ хадаад, һүүлдэнь хэрээһые бодхообо. Тэрээнтэй хамта үшөө хоёр хүниие: нэгыень баруун тээнь, нүгөөдыень зүүн тээнь, Иисүүсые дундань хэрээһэн дээрэ үргэбэ.

¹⁹ Хабтагай модо бэлдээд, хэрээһэн дээрэнь хадаха гэжэ Пилат захирба. Тэрэ хабтагай дээрэнь: «Назаредэй Иисүүс, еврейнүүдэй хаан» гэжэ бэшээтэй байгаа.

²⁰ Тэрэниие олон еврейнүүд уншаа, юундэб гэбэл, Иисүүсэй саазалуулһан газарынь хотоһоо холо бэшэ һэн, тэрэнь еврей, лата, грек хэлэнүүдээр бэшээтэй байгаа.

²¹ Еврейнүүдэй түрүү санаартан Пиладта иигэжэ хэлэһэн байнад: – «Еврейнүүдэй хаан» гэжэ бү бэшэгты! «Энэ хүн Өөрыгөө еврейнүүдэй хаан гэдэг һэн» гэжэ бэшэгты.

²² – Юун гэжэ бэшээбиб, тэрээгээрээл байг, – гэжэ Пилат харюусаба.

²³ Сэрэгшэд Иисүүсые хэрээһэндэ хадажа саазалаад, Тэрэнэй субые абажа, сэрэгшэдэй тоогоор – дүрбэн хэһэг болгожо, өөһэд хоорондоо хубааба. Зүйдэлгүйгөөр нэхэгдэһэн субыень баһа абаба.

²⁴ – Энээнииень бү шуулая, жээрэб хаяад, хэндэмнай туданаб, тэрэ хүн абаха, – гэжэ өөһэд дундаа сэрэгшэд хэлсэбэ. «Хубсаһыем хоорондоо хубаагаад абаа, хубсаһыем жээрэблэн абаа» гэжэ Нангин Бэшэг соо бэшээтэй үгэнүүд хүсэлдэн бэелүүлэгдэбэ. Сэрэгшэд тиимэл юумэ хээ.

²⁵ Иисүүсэй хэрээһэнэй хажууда Тэрэнэй эжы, нагаса эжынь, Клопаасай һамган Мария, мүн Магдалай Мария гэгшэд зогсожо байгаа.

²⁶ Иисүүс эжыгээ, эжынгээ хажууда зогсоһон Өөрынгөө дуратай шабиие хараад, эжыдээ: – Эжымни, энэ танай хүбүүн гээшэ, – гэжэ хэлэбэ.

²⁷ Удаань шабидаа: – Энэ шинии эжы гээшэ, – гэбэ. Хожомынь тэрэ шабинь Иисүүсэй эжые гэртээ асаржа байлгаа.

Иисүүс нүгшэбэ

²⁸ Болохо юумэн боложо дүүрэхын заха үзэгдэхые Иисүүс ойлгожо, Нангин Бэшэг соо бэшэгдэһэн мүрнүүдые хүсэлдүүлэн: – Ундам хүрэнэ! – гэбэ.

²⁹ Тэндэ дүүрэн домбо соо уксус байба. Сэрэгшэд бамбагар юумэн дээрэ тэрэ уксусһээ адхаад, тэрэнээ эссооб ургамалай мүшэр дээрэ табяад, Иисүүсэй уралда ойртуулба.

³⁰ Иисүүс тэрэ уксусыень амсаад: – Бүтэбэ даа! – гэжэ хэлэбэ. Тиин тархяа тонгойлгон, ами табиба.

³¹ Тиихэдэ пятница, субботодо бэлдэхэ үдэр байгаа. Саазалуулһан хүнүүдэй бэеые субботын үдэр үлгөөтэй зандань байлгахагүй гэжэ еврейнүүдэй ахамадууд оролдоо. Теэдшье тэрэ субботодо Паасхын ехэ һайндэр тудаа. Иимэ ушарһаа, саазалуулагшадай шэлбыень хуха сохёод, бэеыень хэрээһэнһээнь абхуулыт гэжэ еврейнүүдэй ахамадууд Пиладые гуйба.

³² Сэрэгшэд ерэжэ, Иисүүстэй хамта саазалуулһан нэгэ хүнэйнь шэлбые хухалба, удаань хоёрдохи хүнэйхииень хухалба.

³³ Тиигээд Иисүүсэй хажууда ерээд харахадань, тэрэ үхэшэһэн байба, тиимэһээ шэлбыень хухалбагүй.

³⁴ Гэбэшье нэгэ сэрэгшэнь Тэрэнэй һүбээе жадаараа сүмэ хадхаба. Тиигэмсээрнь тэндэһээнь шуһан ба уһан гоожобо.

³⁵ Таанарайшье үнэншэхын тула бараниие өөрынгөө нюдөөр хараһан хүн энээн тухай хөөрөө бэлэй. Тэрэ хүнэй гэршэлэн харуулһаниинь үнэн зүб юм, үнэн зүб юумэ хэлэнэб гэжэ тэрэ хүн мэдэнэ.

³⁶ Тэрэнэй гансаханшье яһаниинь хухархагүй гэһэн Нангин Бэшэгэй үгэнүүд хүсэлдэн бэелүүлэгдэбэ.

³⁷ Сүм хадхаһан хүнөө тэдэ хараха гэжэ Нангин Бэшэгэй баһа ондоо тээ хэлэгдэнэ.

Иисүүсые хүдөөлүүлбэ

³⁸ Аримафейн Иосиф гэдэг хүн ерэжэ, Иисүүсэй бэеые абаашаха зүбшөөл Пиладһаа гуйба. Иосиф еврейнүүдэй засагаархинһаа айжа байһан дээрэһээ, Иисүүсэй нюуса шабинь байгаа. Пилат тэрээндэ зүбшөөлөө үгэбэ. Иосиф Иисүүсэй бэеые абаашаба.

³⁹ Нэгэтэ һүни Иисүүстэ ерэһэн Никодим мүнөө баһа ерэлсэбэ. Никодим зуугаад һүүнтэ һайхан үнэртэй смирна ба алой ургамалнуудай шүүһэ асарба.

⁴⁰ Тэдэ хоёр Иисүүсэй бэе һайхан хангалтай шүүһэндэ дэбтээһэн бүдөөр орёобо (еврейнүүд тиигэжэ хүдөөлүүлдэг заншалтай байгаа).

⁴¹ Иисүүсэй саазалуулһан һууриһаа холо бэшэ сэсэрлиг бии һэн, тэндэнь урдань хэнэйшье хэбтээгүй шэнэ агы нүхэн түхеэрэгдээд байгаа.

⁴² Паасхын бэлэдхэл үдэр, пятница байһан тула, мүн шэнэ агы нүхэн дүтэхэн байһан дээрэһээ, Иисүүсые тэрэ агы нүхэндэ хадаглаба.