Иоанн 17 - Библи

Иисүүс Бурханда зальбарна

¹ Эдэ үгэнүүдэйнгөө һүүлээр Иисүүс тэнгэри өөдэ хараад, иигэжэ хэлэбэ: – Эсэгэ аа! Сагни ерэбэ. Хүбүүнэйтнай Танай нэрэ алдаршуулхын тула, Хүбүүгээ алдаршуулыт.

² Бүхы хүнүүдые зонхилхо эрхэ засаг Хүбүүндээ олгоһон хадатнай Хүбүүнтнай өөртэнь даалгаһан бүхы хүнүүдтэ хэтэ мүнхын амидарал олгохо.

³ Хэтэ мүнхын амидарал гээшэ ори ганса үнэн бодото Бурхан бологшо Таниие, мүн Танай эльгээһэн Иисүүс Христоосые мэдэхэ гэһэн удхатай.

⁴ Намда даалгаһан ажал хэрэгыетнай бэелүүлэн, Би Таниие газар дээрэ суурхуулан нэрлүүлээб.

⁵ Эсэгэмни аа, юртэмсэ дэлхэйн үшөө бии болоодүйдэ, Тантайгаа суг байхадаа суурхаһан Минии алдар солоор Намайгаа мүнөө Өөртэйгөө хамта суурхуулыт.

⁶ Дэлхэйн зонһоо илгажа Намда үгэһэн хүнүүдтэ Би Танай нэрэ нээбэб. Эдэ Танай хүнүүд гээшэ, эдэниие Та намда үгөөт. Эдэ хүнүүд Танай үгын ёһоор ажаһууна.

⁷ Намда Танай үгэһэн бүхы юумэн Танай юм гэжэ одоол тэдэ ойлгоо.

⁸ Намда Танай дамжуулан үгэһэн үгэнүүдые Би тэдэндэ дамжуулбаб, эдэ үгэнүүдыетнай тогтоон абаа, тиин Намайе Танһаа ерээ гэжэ үнэхөөрөө ойлгоо, Намайе Та эльгээгээт гэжэ этигээ.

⁹ Тэдэнэй тула Би зальбаран гуйнаб, бүхы дэлхэйнхидэй тула зальбаран гуйнагүйб, харин Намда Танай үгэгшэдэй тула зальбаран гуйнаб, юундэб гэбэл, тэдэнэр Танай мэдэлдэ байдаг.

¹⁰ Ушарынь гэбэл, Намда байһан бүгэдэ Танай юм, Танда байһан юумэ бүхэн Минии юм. Тэдэнэй ашаар Би алдаршабаб.

¹¹ Энэ дэлхэйдэ саашадаа байхаяа болёоб, Тандаа бусажа ошохомни, харин эдэмни дэлхэйдэ үлэхэнь. Гэгээн нангин Эсэгэмни аа! Өөрынтнай нэрэ солын тулада, Намда Танай үгэһэн эдэ хүнүүдые, Та Бидэ хоёртол нэгэн адли байхынь тула абаран үлөөгыт даа.

¹² Тэдэнтэй сугтаа байхадаа, Танай Намда үгэһэн нэрэ солын ашаар Би Өөрөө хамгаалан хаража ябааб. Би тэдэниие хамгаалааб: хэнииньшье хосороогүй, харин хосорхо ёһотой байһан нэгэниинь лэ һалаа, юундэб гэхэдэ, иигэжэ Нангин Бэшэг соо бэшээтэй үгэнүүд хүсэлдэн бэелүүлэгдэбэ гээшэ.

¹³ Мүнөө Би Тандаа бусахамни. Теэд Минии баяр баясхалангые эдэнэймни Намтай хубаалдахын тула, газар дэлхэйдэ байһан дээрээ эдэ бүгэдые хэлэнэб.

¹⁴ Танай Үгые Би шабинартаа дамжуулааб, тиихэдэмни дэлхэйн зон тэдэндэ зэбүүрхэн дурагүйлхөө, тэдэнэр Намдал адли энэ дэлхэйн зоноор нэгэн бэшэ ха юм.

¹⁵ Энэ дэлхэйһээ тэдэниие абахыетнай Би гуйнагүйб, харин аюулта хоротонһоо абархыетнай гуйнаб.

¹⁶ Тэдэнэр, Намда адли, энэ дэлхэйн зоноор нэгэн бэшэ ха юм.

¹⁷ Үнэн зүйлэй ашаар эдэниие Өөрын болгыт, үнэн зүйл гээшэ Танай Үгэ мүн.

¹⁸ Дэлхэйн зондо Намайе Танай эльгээһэндэл адли, Би тэдэниие баһал энэ дэлхэйн зондо эльгээгээб.

¹⁹ Үнэн зүйлэй хүсөөр эдэниие Танай болгохын тула, Би Өөрыгөө Танда зорюулааб.

²⁰ Теэд гансал эдэнэй тула Таниие гуйна бэшэб, мүн Минии тухай эдэнэймни хэлэһэн үгын ашаар Намда этигэгшэдэйшье тула гуйнаб.

²¹ Эдэнэр бултадаа нэгэн хамта байг лэ, Та Минии досоо байнат, Би Танай досоо байнаб, тэрээндэл адли, тэдэнэр бидэнэй досоо байг лэ. Тиихэдээ Намайе Та эльгээгээт гэжэ дэлхэйн зон этигэхэ.

²² Та бидэ хоёртол адляар, тэдэнэй нэгэн хамта байхын тула, Танай Намда үгэһэн алдар солые Би тэдэндэ үгөөб.

²³ Тэдэнэй бүрин нэгэн хамта байхын тула Би тэдэнэй досоо байнаб, Та Минии досоо байнат. Та Намайе эльгээгээт, Танай Намда дуратай байдагтал адляар, эдэндэ дуратайт гэжэ дэлхэйн зон мэдэг лэ.

²⁴ Эсэгэмни аа! Танай үгэһэн хүнүүдэй Намтай хамта Минии ошохо газарта байхыень хүсэнэб. Юртэмсэ дэлхэйн бии болохоһоо урда Та Намда дуратай байжа, Намда олгоһон алдар солыетнай тэдэнэр хараг лэ.

²⁵ Үнэн сэхэ Эсэгэмни аа! Дэлхэйн зон Таниие мэдэнэгүй. Теэд Би Таниие мэдэнэб, Намайе Та эльгээгээт гэжэ тэдэ мэдэнэ.

²⁶ Танай Намда дурладагтал адли дуран тэдэнэй досоо байхын тула, мүн тэдэнэй досоо Минии байхын тула, Би тэдэндэ Танай нэрые нээгээб, нээжэшье үгэхэб.