Иоанн 12 - Библи

¹ Паасхын болохоһоо зургаан хоногой урда Иисүүс Бэтаанида ерэбэ. Лазариин һууһан эгээл тэрэ нютагта Иисүүс анхан ерэжэ, үхөөд байхадань амидыруулаа бэлэй.

² Тэндэхид Иисүүсые хүндэлхэеэ хоол бэлдээд, угтамжа хэбэ. Марфа эдеэ аягалаба, тиин Лазарь Иисүүстэй болон бусад айлшадтай хамта хоол бариба.

³ Тэрэ үедэ Мария тон үнэтэй, һайхан хангалтай нард ургамалай тоһо домбо соо асараад, Иисүүсэй хүлые тэрэ тоһоор түрхибэ. Удаань, Иисүүсые угаа ехээр хүндэлдэг байһанаа гэршэлэн, хүлыень толгойнгоо үһөөр аршаба. Тоһоной һайхан үнэр бүхы гэрээр хангалтаба.

⁴ Тиихэдэнь Иисүүсэй шабинарай нэгэниинь – Иуда Искариот (удаань Иисүүсые барижа үгэһэн урбагша):

⁵ – Энэ тоһыень гурбан зуун динаряар худалдаад, юундэ үгытэйшүүлдэ мүнгыень хубаажа үгөөгүй гээшэб? – гэжэ хэлэбэ.

⁶ (Иуда үгытэйшүүлдэ һанаагаа зобоод тиигэжэ хэлээгүй, харин тэрэ хулгайшан байгаа: тэрээндэ даалгагдаһан хамтын мүнгэнһөө олон ушарта өөрынгөө хэрэглэмжэдэ гаргашалдаг байгаа.)

⁷ – Марияе бү һаатуулагты! Намайе хүдөөлүүлхэ үдэртэ зорюулан энэ тоһо хадагалжа байгаа, – гэжэ Иисүүс харюусаба. –

⁸ Үгытэй ядуушуул хододоо таанартай байхал, харин Би таанартай хододоо байхагүйб.

⁹ Тэрэ үедэ еврейнүүд Иисүүсэй тэндэ байһые мэдээд олоороо сугларба. Гансашье Иисүүсые харахаяа бэшэ, харин Тэрэнэй амидыруулһан Лазариие харахаяа тэдэ ерээ.

¹⁰ Тиихэдэл түрүү санаартан Лазарииешье алаха гэжэ шиидэһэн байгаа.

¹¹ Юундэб гэбэл, Лазариие амидыруулһандань олон еврейнүүд Иисүүстэ ерэдэг, Тэрээндэ шүтэдэг болоо бшуу.

Иисүүс Иерусалим ерэбэ

¹² Хойто үдэрынь Паасхын найрта хабаадалсагша зон Иисүүсэй Иерусалимда дүтэлжэ ябаһан тухай дуулаад байба.

¹³ Тэдэ зон пальма модоной мүшэрнүүдые баряад, Иисүүсые угтахаяа гараа. Тэдэ иигэжэ хашхаралдабад: – Бурханда алдар соло! Эзэнэй нэрээр заларан Ерэгшэ үреэл магтаалда хүртэһэй! Израилиин Хаан үреэл магтаалда хүртэһэй!

¹⁴ Иисүүс бэдэржэ олдоһон залуу элжэгэ дээрэ һууба ха. Иигэжэ Нангин Бэшэг соо бэшээтэй байһан мүрнүүд бодото дээрээ бэелбэ:

¹⁵ «Сионой басаган, ши бү ай! Харыш! Тээ тэрэ шинии Хаан залуу элжэгэ унаад, шамда дүтэлжэ ябана!»

¹⁶ Түрүүшээр шабинарынь юушье ойлгобогүй, харин Иисүүсэй алдар солын элирхэдэ, лүндэншэдэй уридшалан хэлээшээр болобо гэжэ ойлгобод.

¹⁷ Иисүүсэй үхэһэн Лазариие агы нүхэнһөөнь дуудан амидыруулхада байһан хүнүүд энэ ушар тухай хөөрэлдэһөөр байгаа.

¹⁸ Гайхамшаг хэрэг бүтээһэн хүн Энэ байна гэжэ мэдэхэдээ, олон зон Иисүүсые угтахаяа гараа.

¹⁹ Зүгөөр фарисейнүүд өөһэд дундаа хөөрэлдэбэ: – Харана гүт, бидэ юушье хэхэ аргагүй байнабди, зон бултадаа Тэрэниие дахажа ябанал!

Иисүүс нүгшэхэ тухайгаа хэлэнэ

²⁰ Бурханда мүргэхэеэ найрта ерэһэн зоной дунда грегүүдшье бии һэн.

²¹ Тэдэнэр Галилейн Бэтсаидааһаа гараһан Филиппдэ ошожо: – Манай эзэн аа, бидэнэр Иисүүстэй уулзаха һанаатайбди, – гэжэ гуйба.

²² Филипп энээн тухай Андрейдэ дуулгаба, тиигээд хоюулаа Иисүүстэ ошожо хэлэбэ.

²³ Иисүүс харюусаба: – Хүн түрэлхитэнэй Хүбүүнэй алдар соло элирхэ саг ерэбэ!

²⁴ Таанарта үнэниие хэлэнэб: шэниисын орооһон газарта унаад хосороогүй һаа, миин лэ гансахан орооһон зандаа үлэхэ, харин тэрэ орооһон хосорходоо, ехэ ургаса асарха.

²⁵ Ами наһаяа гамнадаг хүн ами наһаяа алдана, харин энэ дэлхэйдэ байхадаа ами наһаяа хайрлан гамнадаггүй хүн мүнхэ наһатай болохо.

²⁶ Намда алба хэдэг хүн Минии хойноһоо дахаад ябаг! Минии байһан лэ газарта Минии зараса байлсаха. Намда алба хэдэг хүниие Минии Эсэгэ хүндэлхэ.

²⁷ Мүнөө сэдьхэлни ехээр зобоно! Юушье гэжэ хэлэхэбиб даа? «Эсэгэ аа! Намайе энэ зоболонто сагһаа абарыт даа!» – гэхэ гүб? Теэд Би энэл зоболонто сагай түлөө ерээ ха юмбиб!

²⁸ Эсэгэ аа, Өөрынгөө нэрые алдаршуулыт! Тиигэхэдэнь тэнгэриһээ: – Би алдаршуулааб, бүришье ехээр алдаршуулхаб! – гэһэн абяан дуулдаба.

²⁹ Тэндэ байһан зон булта дуулаба. Нэгэ заримань тэнгэри дуугараа, нүгөөдүүлынь – Бурханай Эльгээмэл Иисүүстэ юумэ хэлээ гэлсэбэ.

³⁰ Иисүүс иигэжэ харюусаба: – Энэ дуун Минии тула бэшэ, харин таанарай тула тэнгэриһээ дуулдаба!

³¹ Иигээд энэ дэлхэйе шүүбэрилхэ саг тулажа ерээ, мүнөө энэ дэлхэйн Ноёниинь һэегүй намнуулха!

³² Зүгөөр Би газарһаа дээшээ дэгдээгдэхэдээ бүхы зониие Өөртөө хабаадуулхаб!

³³ Иисүүс иигэжэ хэлэхэдээ, ямар үхэлөөр үхэхэ байһанаа мэдүүлбэ гээшэ.

³⁴ Улад зон Тэрээндэ хэлэбэ: – Бурханай табисуурта хэтэ мүнхэдөө амиды ябаха гэжэ Хуули соо бэшээтэй гэжэ бидэ дуулаа һэмди. Харин Та юундэ Хүн түрэлхитэнэй Хүбүүн дээшээ дэгдээгдэхэ гэжэ хэлэбэт? Тиигээд тэрэ Хүн түрэлхитэнэй Хүбүүнтнай хэн юм?

³⁵ Иисүүс тэдээндэ иигэбэ: – Гэрэл туяагай таанартай хамта байха саг бага үлөө. Шэг балай харанхы таанадые хушаагүйдэ, гэрэл туяагай байһан дээрэнь ябажа ябыт даа. Харанхы соогуур ябадаг хүн хайшаашье ошохоёо мэдэдэггүй бшуу.

³⁶ Харин мүнөө дээрээ таанарта гэрэл туяагай толоржо байхадань, гэрэл туяада этигэгты – тиигэбэл, гэрэл туяагай хүбүүдынь болохот! Эдэ үгэнүүдые хэлээд, Иисүүс тэдэнһээ зайлажа, далда оробо.

Еврейнүүд этигэбэгүй

³⁷ Тиимэ олон дүлгэ тэмдэгүүдые Иисүүсэй харуулбашье, зон этигэбэгүй.

³⁸ «Эзэн аа, бидэнэй хэлэһэн үгэнүүдтэ хэн этигээ юм? Эзэн Бурханай эршэ хүсэ хэндэ нээгдэн элирүүлэгдээ юм?» – гэжэ Исай лүндэншын хэлэһэн үгэнүүд хүсэлдэбэ бшуу.

³⁹ Юундэ тэдэ этигэжэ шадахагүйб гэжэ Исай ондоо газарта иигээд тайлбарилһан байна:

⁴⁰ «Бурхан тэдэ хүнүүдые һохор болгоо, ухааень балартуулаа. Тиимэһээ тэдэ нюдөөрөө юумэ харанагүй, ухаагаараа юумэ ойлгоногүй. Тиигээгүй һаа, Намда тэдэ хандаха һэн, Би тэдэниие аргалжа эдэгээхэ һэм».

⁴¹ Исай юундэ тиигэжэ хэлээб гэбэл, Иисүүсэй хүсэ шадалые үзэһэн, хараһан байгаа.

⁴² Ахамадуудайшье дунда Иисүүстэ этигэһэн хүн үсөөн бэшэ һэн, харин энээн тухайгаа сэхэ хэлэхэеэ фарисейнүүдһээ түбэгшөөдэг, мүргэлэй гэрһээ намнуулхабди гэжэ айдаг байгаа.

⁴³ Хүнүүдэй магтаалда хүртэхэнь Бурханай һайшаалда хүртэхэһөө дээрэ гэжэ тэдэ һанаһан байна.

Этигэхэ болон буруушааха тухай

⁴⁴ Иисүүс шангаар дуугарба: – Намда этигэдэг хүн Намда этигэнэ бэшэ, харин Намайе Эльгээгшэдэ этигэнэ.

⁴⁵ Намайе харадаг хүн Намайе харана бэшэ, харин Намайе эльгээһэн Эсэгые харана.

⁴⁶ Би Гэрэл туяа гээшэб, тиин Намда этигэдэг хүн бүхэнэй шэг харанхы соо үлэшэхэгүйн тула Би энэ дэлхэйнхидтэ ерээб.

⁴⁷ Минии хэлэһэн үгэнүүдые шагнаад, тэдэнииемни сахидаггүй хүниие Би шүүбэрилхэгүйб: Би энэ дэлхэйе шүүбэрилхэеэ бэшэ, харин абархаяа ерээб.

⁴⁸ Намайе буруушааһан, Минии үгэ дуулаха дурагүй хүндэ заргаша бии, тэрэ хүниие Минии хэлэһэн үгэ һүүлшын Үдэртэ буруушаан гэмнэхэ!

⁴⁹ Би Өөрһөө хэлэнэгүйб, ушарынь гэхэдэ, Намайе эльгээһэн Эсэгэ юу хэлэхэб, яагаад номнохоб гэһэн захяа Намда үгөө юм.

⁵⁰ Тэрэ захяань мүнхэ наһа олгохо гэжэ Би мэдэнэб. Тиимэһээ Минии хэлэһэн бүхы юумэн Эсэгымни хэлэ гэжэ захиһан лэ юумэн гээшэ.