Иоанн 11 - Библи

Лазарь нүгшэбэ

¹ Мария Марфа эгэшэ дүүнэртэеэ Бэтаани тосхондо суг һуудаг Лазарь гэжэ нэрэтэй нэгэ хүн үбдэбэ.

² Мария Эзэнэй хүлдэ һайхан үнэртэй ургамалай шүүһэ түрхеэд, толгойнгоо үһөөр хүлыень аршаһан эхэнэр мүн. Мариягай Лазарь гэжэ дүү хүбүүниинь үбдэһэн байгаа.

³ Эгэшэ дүү хоёрынь: – Эзэн аа, Танай энхэрлэн хайрладаг хүнтнай үбдөөд байна, – гэжэ Иисүүстэ дуулгаба.

⁴ Тиигэжэ дуулаад: – Энэ үбшэн Лазариие үхүүлхын тула бэшэ, харин Бурханиие алдаршуулхын тула, тиин Бурханай Хүбүүнэй алдар солоёо элирхэйлхын тула болоо, – гэжэ Иисүүс хэлэбэ.

⁵ Марфа, Мария, Лазарь гурбанда Иисүүс дуратай байгаа.

⁶ Теэд Лазариин үбдэжэ байһан тухай дуулабашье, Иисүүс аяар хоёр үдэрэй туршада байһан газарһаа хүдэлбэгүй.

⁷ Удаань Иисүүс шабинартаа: – Гэдэргээ Иудейдээ бусая, – гэбэ.

⁸ – Багша аа, һаяхан Иудейн зон Таниие шулуудажа алахаяа һэдээ бэлэй, харин Та дахин тиишэ ошохоёо һанаба гүт? – гэжэ шабинарынь асууба.

⁹ Иисүүс тэдэндээ иигэжэ хэлэбэ: – Нэгэ үдэр соо арбан хоёр час бэзэ? Үдэр ябаһан хүн бүдэржэ унахагүй, дэлхэй һаруул байна бшуу.

¹⁰ Харин һүни ябаһан хүн бүдэрэн унаха, юундэб гэбэл, дэлхэй гэрэлгүй байна бшуу. –

¹¹ Иисүүс саашань үргэлжэлүүлбэ: – Манай нүхэр Лазарь унтана, Би һэреэхэеэ ошохомни.

¹² – Эзэн аа! Хэрбээ Лазариин унтажа байбалнь, тэрэнэй бэень һайн болохо хаяа, – гэжэ Иисүүстэ шабинарынь хэлэбэ.

¹³ Лазарь унтана гэхэдээ, наһа бараа гэһэн удхатайгаар Иисүүс хэлээ, харин шабинарынь Тэрэ миин лэ нойрсоно гэжэ һанаа бшуу.

¹⁴ Тиихэдэнь шабинартаа хандан: – Лазарь наһа бараа, – гэжэ Иисүүс сэхыень хэлэбэ. –

¹⁵ Теэд тэндэ байлсаагүйдөө таанарай түлөө баярланаб – таанар Намда түргөөр этигэхэт. Зай, Лазарьта ошоё!

¹⁶ Эхир гэжэ ара нэрэтэй Фома хүбүүн: – Хамта ошолсоё, хамта үхэнэ бэзэбди! – гэжэ бэшэ шабинартаа хэлэбэ.

Иисүүс Лазариие амидыруулба

¹⁷ Лазарь аяар дүрбэн үдэрэй саада тээ нүгшөөд, агы нүхэндэ хэбтэнэ гэжэ Иисүүс Бэтаанида ерээд мэдэбэ.

¹⁸ Бэтаани гээшэнь Иерусалимһаа холо бэшэ, гурбан модо шахуу газарта байгаа.

¹⁹ Дүүгэйнгээ наһа барахада уйдан гашуудажа байһан Марфа Мария хоёрой һанаа заһахаяа олон еврейнүүд тэдэнэйдэ ошобо.

²⁰ Иисүүс ерэнэ гэжэ дуулаад, Марфа угтахаяа гараба. Мария гэртээ үлэбэ.

^21-22 – Эзэн аа! Хэрбээ Танай эндэ байгаа һаа, ахамни наһа барахагүй бэлэй! Теэд Танай гуйһан бүхы юумые Бурхан мүнөөшье Танда үгэхэ гэжэ би мэдэнэб, – гэжэ Иисүүстэ Марфа хэлэбэ.

²³ – Шинии аха дахин амидырха, – гэбэ Иисүүс.

²⁴ – Амидыралгын үедэ, һүүлшын Үдэртэ ахамни бодохо гэжэ би мэдэнэб, – гээд Марфа харюусаба.

²⁵ – Би хадаа Амидыралга гээшэб, Ами наһан гээшэб. Намда этигэдэг хүн үхөөшье һаа, амиды болохо.

²⁶ Намда этигэлтэй амидарһан ямаршье хүн хэзээдэшье үхэхэгүй. Ши энээндэ этигэнэ гүш?

²⁷ – Этигэнэб даа, Эзэн! Та Бурханай табисууртат, энэ дэлхэйдэ ерэхэ ёһотой Бурханай Хүбүүнта гэжэ би этигэнэб.

²⁸ Тиигэжэ хэлээд, Марфа Мария эгэшэдээ ошожо һэмээхэнээр: – Багша эндэ ерээд байна, шамайе ерэ гэнэ, – гэбэ.

²⁹ Эгэшэнь түргэн бодожо, Иисүүстэ ошобо.

³⁰ Иисүүс тиихэдэ тосхондо үшөө хүрөөгүй, Марфын угтаһан газарта зогсожо байгаа.

³¹ Гэртэнь Мариягай һанаа заһажа байһан еврейнүүд эхэнэрэй түргэхэн бодожо, газаашаа гарахые обёорон, энэмнай дүүгэйнгээ хүдөөлүүлһэн агы нүхэнэй хажууда уйлахаяа ошобо гэжэ һанаад, хойноһоонь ошолсобо.

³² Мария Иисүүсэй байһан газарта ерэхэдээ, хүлдэнь һүгэдэн унажа: – Эзэн аа! Хэрбээ Танай эндэ байгаа һаа, дүүмни наһа барахагүй бэлэй! – гэбэ.

³³ Мариягай, мүн Мариятай хамта ерэлсэһэн еврейнүүдэй уйлажа байхые хараад, Иисүүс айхабтар ехээр гашуудан гуниглаба.

³⁴ – Таанар тэрэниие хаана хүдөөлөөбта? – гэбэ. – Эзэн аа, ошоё, бидэ харуулхабди, – гэжэ харюусабад.

³⁵ Иисүүс уйлашаба.

³⁶ – Харыт, Иисүүс тэрээндэ ямар ехэ дуратай байгааб! – гэлдэбэ еврейнүүд.

³⁷ Тэдэнэй зариманиинь бэе бэедээ: – Һохор хүниие Иисүүс харадаг болгоо һэн. Лазариие амиды байлгажа шадахагүй байгаа аал? – гэбэ.

³⁸ Иисүүс бүри ехээр сэдьхэлээ хүдэлгэн, шулуугаар бүглөөтэй агы нүхэндэ дүтэлбэ.

³⁹ – Шулууень эндэһээ абагты! – гэбэ Иисүүс. – Эзэн аа! Үнэр орошоод байна ёһотой. Аяар дүрбэн үдэр эндэ хүдөөлүүлээтэй байнал, – гэжэ наһа барагшын эгэшэ Марфа хэлэбэ.

⁴⁰ – Хэрбээ шүтэжэ ябаа һаа, Бурханай алдар солые үзэхэш гээд шамда Би хэлээ бэшэ һэн гү? – гэжэ Иисүүс Марфада харюусаба.

⁴¹ Шулууень зайлуулба. Иисүүс Тэнгэри өөдэ хараад: – Эсэгэ аа, Намайе дуулаһандатнай баясхалан хүргэнэб.

⁴² Та Намайе хододоо дуулажа байдагта гэжэ Би мэдэнэб. Намайе Та эльгээгээт гэжэ эндэ зогсогшо хүнүүдэй этигэхынь тула Би тиигэжэ хэлээб! – гэжэ

⁴³ Иисүүс хэлээд: – Лазарь, тэндэһээ гаража ерэ! – гэжэ шангаар захирба.

⁴⁴ Наһа бараһан хүниинь агы нүхэн сооһоо гаража ерэбэ. Хүдөөлүүлхэдээ орёодог бүдөөр хүл гарнуудынь орёогдонхой, нюурынь баһал бүдөөр боолгоотой байгаа. – Боолтыень тайлагты, һаадгүй ябаад ошог! – гэжэ Иисүүс хэлэбэ.

Фарисейнүүд Иисүүсые алаха гэжэ нюусаар хэлсэбэ

⁴⁵ Марияда ерэһэн еврейнүүдэй олониинь Иисүүсэй юу бүтээһыень хараад, Тэрээндэ этигэбэ.

⁴⁶ Гэбэшье зариманиинь фарисейнүүдтэ ошожо, Иисүүсэй юу хэһэн тухайнь дуулгаба.

⁴⁷ Түрүү санаартан ба фарисейнүүд Дээдын Зүблэл зарлаба. – Зай, яахамнай гээшэб? Энэ хүн олон янзын дүлгэ тэмдэгүүдые харуулна.

⁴⁸ Иимэ юумэ саашадаашье харуулха арга Тэрээндэ олгоо һаамнай, бултадаа Тэрээндэ этигэдэг болохонь. Тиихэдэнь Римэйхид ерээд, Һүмыемнай, бүхы зонииемнай үгы хэхэл, – гэжэ тэдэ хэлсэбэ.

⁴⁹ Энэ жэлдэ ахамад санаарта байһан Кайафа:

⁵⁰ – Таанар юушье ойлгоногүйт! Хэрбээ бүхы еврей зоной түлөө гансал хүнэй үхөө һаа, таанарта дээрэ байха гэжэ өөһэдөө ойлгоногүй гүт? – гэжэ тэдэндэ хэлэбэ.

⁵¹ Кайафа өөрэһөөн тиигэжэ хэлээ бэшэ, харин энэ жэлдэ ахамад санаарта байхадаа уридшалан мэдээд: Иисүүс хүнүүдэй түлөө үхэхэ гээ бэлэй.

⁵² Гансашье еврей зоной түлөө бэшэ, харин дэлхэй дээгүүр эндэ тэндэ бутаран тарашаһан Бурханай бүхы үхибүүдые суглуулан нэгэдхэхын түлөө үхэхэ.

⁵³ Тиин тэрэ үдэрһөө хойшо ахамад санаарта ба фарисейнүүд Иисүүсые яажа алахамнайб гэжэ бододог болобо.

⁵⁴ Тиимэ ушарһаа Иисүүс еврейнүүдэй дунда Өөрыгөө мэдүүлэнгүйгөөр ябадаг болоо. Сүл губиин хажууда оршоһон Эпрааим хотодо ошожо, шабинартайгаа хамта байба.

⁵⁵ Еврейнүүдэй Паасха ойртожо байгаа. Һайндэрэй урдахана арюудхуулдаг заншалаа сахижа, орон нютагайнь олон зон Иерусалим ерэбэ.

⁵⁶ Һүмэ дотор сугларһан хүнүүд Иисүүсые бэдэрэн, өөһэд дундаа: – Таанар юун гэжэ бодонобта? Һайндэртэ ерэхэгүй гү? – гэжэ хөөрэлдэбэ.

⁵⁷ Түрүү санаартан болон фарисейнүүд: – Иисүүсые барижа хаахымнай тула, Тэрэнэй хаана байһые мэдэһэн хүн бүхэн бидэндэ дуулгаха ёһотой, – гэһэн захиралта гаргаба.