Иоанн 10 - Библи

Иисүүс шударгуу һайн адуулагша

¹ – Хониной хорёодо үүдээрнь оронгүй, ондоо тээгүүр шурган ородог хүн хадаа хулгайшан, дээрмэшэн гээшэ гэжэ үнэниие таанарта хэлэнэб.

² Үүдээрнь ородог хүн хонин һүрэгэй адуулагшань мүн.

³ Харуулшан тэрээндэ хониной байрын үүдэ нээжэ үгэдэг. Хонидынь тэрэнэйнгээ дууень дууладаг, адуулагшань хонидоо нэрэ нэрээрнь дуудаад, газаашань гаргадаг.

⁴ Хонидоо бултыень байраһаань гаргаад, хонишон хонидойнгоо урда ябадаг, харин хонидынь хонишоноо дуугаарнь танижа, хойноһоонь дахадаг.

⁵ Ондоо хүнэй хойноһоо хонидынь дахахагүй, тэрэ хүнһөө зугадажа арилшадаг, юундэб гэхэдэ, ондоо хүнэй дууниинь танигданагүй бшуу.

⁶ Иимэ һургаалта үгэнүүдые Иисүүс фарисейнүүдэй урдаһаа хэлэбэ, теэд тэдэнь ойлгобогүй.

⁷ Иисүүс үргэлжэлүүлбэ: – Таанарта үнэн зүбые хэлэнэб: хонидой байрын үүдэ гээшэнь Биб.

⁸ Намһаа түрүүн ерээшэд бултадаа хулгайшад, дээрмэшэд байгаа. Теэд хонид тэдэнэй үгэ дуулаагүй.

⁹ Үүдэ гээшэнь Биб. Хэн энэ үүдээр ороноб, тэрэ хүн абарагдаха. Тэрэ хүн үүдээр орожо, һүүлдэ газаашаа гараад, өөрынгөө бэлшээри олохо.

¹⁰ Харин хулгайшан гансал хулуухаяа, алахаяа, һандаргаха хюдахаяа ерэдэг. Харин би хүнүүдэй амидархын тула, тэрээнһээ гадна, хүнүүдэй юрын амидаралһаа үлүү амидаралда хүртэхынь тула эндэ ерээб.

¹¹ Би шударгуу һайн адуулагшаб, шударгуу һайн адуулагшань хонидоо абархын тула ами наһаяа үгэдэг.

¹² Харин хүлһэншэн хадаа хони адуулагша бэшэ, тэдэ хонид тэрэнэй бэшэ. Тиимэһээ хүлһэншэн хонидтонь орохоёо ябаһан шонын дүтэлжэ байхые харахадаа, хонидоо орхёод зугададаг. Тиихэдэнь шоно хонидыень бариха, хонид иишэ тиишээ гүйлдэжэ тараха.

¹³ Тэрэ хүн хони адуулагша бэшэ, харин хүлһэншэн гээшэ, тиимэһээ хонидто һанаагаа зобоногүй.

¹⁴ Би хадаа шударгуу һайн адуулагшаб. Би Өөрын хонидые мэдэдэгби, Минии хонидшье Намайгаа мэдэдэг.

¹⁵ Эсэгэмни Намайгаа мэдэдэгтэл адли, Бишье Эсэгэеэ мэдэдэгби. Би Өөрын хонидой түлөө ами наһаяа үгэнэб.

¹⁶ Энэ хорёо соохи хонидһоо гадна, мүн ондоошье хонид Намда бии. Тэдэниие Би баһа иишэнь асарха ёһотойб. Тэдэ хонид Минии үгэ дуулаха, тиихэдээ нэгэл һүрэг хонид байха, нэгэл хонишон байха!

¹⁷ Дахин амидырхынгаа тула Би ами наһаяа үгэхэб, тиимэһээ Эсэгэмни Намда дуратай юм.

¹⁸ Минии ами наһые хэншье хороохогүй, харин Би Өөрөө ами наһаяа үгэхэб. Би ами наһаяа үгэхэ эрхэтэйб, Би ами наһаяа һөөргэнь абаха эрхэ засагтайб. Эсэгэмни Намда тиигэжэ захяа юм.

¹⁹ Иигэжэ хэлэхэдэнь, еврейнүүд хоорондоо дахин асатаба.

²⁰ – Энэтнай досоогоо ада шүдхэртэй болоод, дэмыржэ байна. Таанар Энээниие юундэ шагнанабта? – гэжэ олониинь хэлэбэ.

²¹ – Энэ досоогоо ада шүдхэртэй хүнэй үгэнүүд бэшэ. Ада шүдхэр һохор хүнүүдые харадаг болгожо шадаха һэн аал? – гээд нүгөөдүүлынь буруушааба.

«Эсэгэ бидэ хоёр нэгэбди»

²² Үбэл ерээ. Һүмэ Шэнэлэлгын һайндэр Иерусалимда тэмдэглэжэ байба.

²³ Һүмын хорёодо Соломооной бахананууд гэгдэдэг һарабшатай газарта Иисүүс сэнгэжэ ябаа.

²⁴ Тэрэниие тойроод еврейнүүд сугларжа: – Та хэды болотор бидэнэй тэсэбэри туршаха һанаатайбта? Хэрбээ Та Бурханай табисуурта һаа, манда сэхэ хэлыт, – гэлдэбэ.

²⁵ – Би таанарта хэлээ һэм, теэд таанар Намда этигэнэгүйт. Эсэгынгээ нэрэһээ Минии бэелүүлдэг хэрэгүүд Минии гэршэ болоно.

²⁶ Теэд таанар Намда этигэнэгүйт, таанар Минии хонид бэшэ ха юмта.

²⁷ Минии хонид үгыемни дууладаг, Бишье тэдэнээ мэдэхэб, тэдэмни Минии хойноһоо дахажа ябана.

²⁸ Би тэдэндэ мүнхэ наһа үгэнэб, тэдэ хэзээшье хосорхогүй, тэдэниие Намһаа хэншье буляажа абахагүй.

²⁹ Тэдэниие Намда үгэһэн Эсэгэмни бултанһаа холо дээгүүр юм. Минии хонидые Эсэгэһээмни хэншье буляажа шадахагүй.

³⁰ Эсэгэ бидэ хоёр нэгэн хамтабди.

³¹ Тиихэдэнь еврейнүүд Иисүүсые алаха гэжэ дахин шулуунуудые бариба.

³² – Эсэгынгээ хүсөөр Би таанарта ехэ олон һайн юумэнүүдые харуулааб. Тэдэ юумэнүүдэймни алинайнь түлөө Намайе шулуудажа алаха һанаатайт? – гэжэ Иисүүс һураба.

³³ – Бидэ Таниие һайн юумэ хэһэнэйтнай түлөө бэшэ, харин Бурханиие доромжолһонойтнай түлөө шулуудажа алахабди! Та юрын хүн аад, Өөрыгөө Бурханби гэжэ айладханат.

³⁴ Иисүүс харюусаба: – «Таанад – бурхад гээшэт гэжэ Би хэлээб», – гээд танай Хуули соо бэшээтэй бэшэ гү?

³⁵ Хэдүүдтэ Бурхан Өөрынгөө үгэ хэлээб, тэдые Хуулитнай бурханууд гэжэ нэрлэнэ, тиихэдэ Нангин Бэшэг соо худал юумэн байха ёһогүй.

³⁶ Харин Намайе Эсэгэмни Өөртөө зорюулан, энэ дэлхэйдэ эльгээгээ юм. Тиимэһээ «Би Бурханай Хүбүүнби» гэхэдэмни, «Та Бурханиие доромжолнот» гэжэ таанар Намда юундэ хэлэнэт?!

³⁷ Эсэгынгээ хэрэг Би бүтээнэ бэшэ гүб? Юундэ таанар Намда этигэнэгүйбта?

³⁸ Эсэгынгээ хэрэгүүдые бэелүүлжэ байха үедөө хэлэһэн үгэнүүдтэмни этигээгүй һаа, Минии бүтээдэг хэрэгүүдтэ этигэгты! Тиихэдээ Эсэгэмни Минии досоо байна, Би Эсэгынгээ досоо байнаб гэжэ таанар мэдэхэт, мэдэжэшье байхат.

³⁹ Еврейнүүд Иисүүсые дахин барихаяа һэдэбэ, зүгөөр Иисүүс тэдэндэ баригдабагүй.

⁴⁰ Тиигээд Иисүүс Иорданай нүгөө эрьедэ ошоо. Урдань тэрэ газарта Иоанн хүнүүдые уһаар арюудхаһан байна. Тэндэ Иисүүс ойро зуура тогтобо.

⁴¹ Тэрээндэ олон зон ерэһэн байна. – Иоанн нэгэшье гайхамшаг хэрэг бүтээгээгүй һэн, теэд Иисүүс тухай хэлэһэн бүхэниинь зүб байна, – гэлсэбэ.

⁴² Тэндэ ерэһэн олон хүнүүд Иисүүстэ этигэбэ.