Һургаал 9 - Библи

Сэсэн мэргэн, үгы гэбэл, ухаан дутуу

¹ Сэсэн мэргэн байшангаа бодхоожо, долоон бахана дээрэ бариба.

² Мяха бэлдэжэ, үзэмэй дараһан архи худхажа, шэрээгээ түхеэрбэ.

³ Тэрэ зараса эхэнэрнүүдые ябуулан, хотын хамагай үндэр газарһаа дуудаба:

⁴ «Гэнэн хонгорнууд, наашаа эрьегты». Ухаа муутайнуудые тэрэ баһа уриба:

⁵ «Ерэгты наашаа, минии талха эдигты, минии үзэмэй дараһан архи уугты.

⁶ Мунхаг ябадалаа орхин амидарагты, оюун ухаанай замаар ябагты».

⁷ Убайгүйдэ заабарилһан хүн өөрөө доромжолуулдаг, муу хүниие зэмэлхэдэ нэрэ түрөө гутаахаһаа ондоо юумэн байхагүй.

⁸ Һэнгэргүй хүниие бү зэмэлэ, тэрэш шамайе үзэн ядаха. Харин сэсэн хүн зэмэлэлгые үнэтэйдэ тоолохо.

⁹ Мэргэн хүндэ заабари үгэхэдэш, бүришье мэргэн болохо. Шударга үнэн хүниие һургахадаш, тэрэ мэдэлгэеэ арьбажуулна.

¹⁰ Эзэнһээ бэшэрхэ гээшэ мэргэн ухаанай эхин юм. Гэгээн шанарыень танин мэдэжэ абаха гээшэ оюун ухаан мүн.

¹¹ Үдэр хоногшни минии ашаар утадаха, амидаралай он жэлнүүд шамда нэмэгдэхэ.

¹² Хэрбээ ши мэргэн һаа, өөрынгөөл түлөө мэргэн байхаш, харин дээрэлхэн хүниие баһадаг һаа, өөрөөл тэрээнһээ хохидохо болонош.

¹³ Уймар тэнэг – дуутай шуутай эмэ

¹⁴ гэрэйнгээ үүдэндэ болон хотын үндэрлиг газарта ендэр дээрэ һуун,

¹⁵ өөрынгөө харгыгаар ябажа ябаһан зониие дуудадаг юм.

¹⁶ Тэрэ эмэ «гэнэн нэгэн, наашаа эрьежэ хара» гэжэ хэлэдэг.

¹⁷ Тэнэг хүндэ «хулууһан уһан шэхэрлиг, нюусаар эдиһэн талхан амтатай» гэдэг.

¹⁸ Харин тэндэнь үхэгшэдэй һүүдэрнүүд байдаг, тэрэ эмые зохидшоодогууд Үхэлэй орон руу дуудаһыень мэдэхэгүй.