Һургаал 8 - Библи

Сэсэн мэргэнэй магтаал

¹ Сэсэн мэргэн дуудана бэшэ аал? Оюун ухаан дууниинь дуулдана бэшэ аал?

² Тэрэ харгын хажуудахи үндэртэ, замай уулзуурта зогсожо байдаг.

³ Хотын хашаагай дэргэдэ, хотын үүдэнһээ хандана:

⁴ – Хүнүүд, би таанадые дуудажа байнаб. Минии хандалга хүнэй хүбүүдтэ зорюулагдана.

⁵ Гэнэн хүнүүд, болгоомжотой ябахые анхаран ойлгогты. Тэнэгүүд, ухаандаа солоохой орогты.

⁶ Соносогты, би шухала зүйл хэлэхэм гээшэ. Минии аманһаа үнэниие дуулахат.

⁷ Би үнэниие үгүүлдэгби. Харин худалһаа минии урал аман зэбүүсэдэг.

⁸ Хамаг хэлэһэмни зүб мүрэй үгэнүүд гээшэ, хара мэхэ, нюуса бодол гэжэ минии хэлэһэн соо огтошье байхагүй.

⁹ Тэдэ хадаа ухаатай хүндэ тодорхой ойлгосотой, мэдэхэеэ һанаһан зондо зүйтэй һабагшатай.

¹⁰ Салин сагаан мүнгэнһөө үлүүгээр минии заабари сэгнэжэ абагты. Шэжэр алта шэлэнхаар мэдэлгэ абахые шэлэһэниинь дээрэ.

¹¹ Сэсэ мэргэн субад эрдэниһээ үлүү үнэтэй. Хүсэжэ болохо ямаршье зүйлые тэрээнтэй жэшэхын аргагүй.

¹² Би – сэсэн мэргэн, намтай болгоомжол ба һонор ухаан хамта оршодог, мэдэлгэ ба үлэмжэ соо харадаг шанар байха.

¹³ Эзэнһээ бэшэрэл хадаа хорото мууе үзэн ядаха ябадал юм. Бардамлал, ехэрхүү зан, хорото зам ба худалша амые би үзэн яданаб.

¹⁴ Амжалта, һонор ухаан, хүсэ шадал намтай оршодог. Би хадаа оюун ухаан мүн. Хүсэн намтай байха.

¹⁵ Хаадууд минии ашаар хаан болодог. Засаг түрэ баригшад минии ашаар үнэн шударга байдалые тогтоодог.

¹⁶ Тайжанар болон изагууртан, хэрэг шүүгшэ бүхы зон минии ашаар ударидаг.

¹⁷ Дура һаналтай хүндэ дура һаналаа харюудань мэдүүлхэб, намайе бэдэрдэг хүн намайе олохо.

¹⁸ Дундаршагүй зөөри баялиг ба алдар суу, хүгжэл һалбарал ба шударга үнэн намда байха.

¹⁹ Минии үрэ хэшээл шэжэр алтанһаа үлүү, минии ашаг үрэ сагаан мүнгэнһөө үлүү.

²⁰ Би зүб ёһын харгыгаар, үнэн шударгын зүргөөр ябанаб.

²¹ Энэ хадаа намайе хайрлагшадта баялиг үгэхын, эрдэниин сангыень дүүргэхын тулада юм.

²² Эртэ сагай ажалһаа урид, замайнгаа эхиндэ Эзэн намайе эзэмшэһэн юм.

²³ Би эхинэй эхинһээ, газар дэлхэйн һаяхан бии боложо байхада тогтоогдоо һэм.

²⁴ Оёоргүй гүнзэгы уһанһаа урид ба уһаар салгидаһан булагуудай үгы сагта бии болоо һэмби.

²⁵ Би уула хабсагайһаа урид, хада гүбээгэй үгы байхада мүндэлөө һэмби.

²⁶ Газар дэлхэйе болон тала дайдые, юртэмсын анха түрүүшын тооһые Тэрэнэй тогтоогоогүй байхада бии болоо һэмби.

²⁷ Тэрэнэй огторгой тогтоохо ба гүнэй гадарта хүреэ һиилэхэдэ,

²⁸ дээрэнь үүлэдые бии болгохо үедэ, мүн оёоргүй гүниие бэхижүүлхэдэ,

²⁹ Тэрэнэй зааһанһаа уһанай дээшэ болохогүйн тула тэнгис далайда хилэ хизаарыень тогтоожо үгэхэдэ, газарай үндэһэ һуури тэмдэглэн тогтоохо үедэ би тэндэ байгаа һэм.

³⁰ Тиихэдэ би Тэрэнэй хажууда уран дархан мэтэ байгаа һэм. Би Тэрэнэй үдэр тутамай баяр бахархал боложо, Тэрэнэй урда үргэлжэ баярлан урмашажа байгааб.

³¹ Газар дэлхэйдэ баярлан, хүнэй хүбүүдээр омогорхон байгааб.

³² Тиимэһээ, хүбүүдни, намайе шагнагты. Минии зам сахигшад үреэлтэй.

³³ Һургаалыем шагнажа, мэргэн ухаатай бологты, тэрэниие тоонгүй бү байгты.

³⁴ Хаалгымни дэргэдэ үдэр бүри харуул хаража, үүдэнэйм дэргэдэ хүлеэжэ намайе шагнадаг хүн үреэлдэ хүртэхэ.

³⁵ Намайе ологшо хүн амидарал оложо, Эзэнэй талархалда хүртэхэ.

³⁶ Харин намда эсэргүү болодог, нүгэл үйлэдэдэг хүн өөрыгөө гэмтээдэг. Намайе үзэн ядагша бүхэн үхэлдэ дура һаналаа мэдүүлнэ.