Һургаал 7 - Библи

Забхай эмэ тухай һануулга

¹ Хүбүүн, үгыемни сахи. Захяануудыем дотороо хадагалжа яба.

² Минии заабари сахижа амидара. Минии һургаал нюдэнэй сэсэгы мэтэ сахи.

³ Тэрэниие хургандаа орёожо аба, зүрхэнэйнгөө хабтаһан дээрэ бэшэ.

⁴ Оюун ухааниие амараг гансадаа адли болгогты. Бэлиг мэдэсэдэ «ши минии эгэшэш» гэжэ хэлэгты.

⁵ Энэ хадаа забхай эмэһээ, нүгэлдэ түлхихэ альбан үгэнүүдһээ абархал.

⁶ Нэгэтэ гэрэйнгээ сонхоор, сонхын забһараар харахадам,

⁷ гэнэн залуушуулай дунда нэгэ ухаа муутай хүбүүн нюдэндэм торолдобо.

⁸ Тэрэ залуугай ойро байдаг гудамжые хүндэлэн гаража, эмэгтэйн гэр тээшэ шэглэхые харабаб.

⁹ Наран һуужа, үдэшын боро хараан тунажа, һүни боложо байгаа.

¹⁰ Тэрэ эхэнэр угтажа гараба. Янхан мэтэ хубсалһан, һабяаһаа таһарһан эмэ бэлэй.

¹¹ Аляа хошон, убайгүй шууяатай, гэртээ тогтодоггүй,

¹² гудамжа талмайгаар, зоной хүлгөөн соо ябагша бэлэй.

¹³ Тэрэ эхэнэр залууе тэбэрин таалаад, эшэхэ нюургүй хэлэбэ:

¹⁴ «Би мүнөөдэр үргэл үргөөб. Эдихэ юумэн үлэнхэй.

¹⁵ Шамайе угтажа, шинии хажууда байхые эрмэлзэн хүсэжэ, гаража ерээд шамтай ушарба гээшэб.

¹⁶ Алаг үнгэтэй Египедэй маалинга бүд оро дэрэдээ дэбдеэб.

¹⁷ Орондоо миро тоһоной, зуу наһатын, халуун үбһэнэй хангал һайхан үнэр оруулааб.

¹⁸ Ошоё, үглөө болотор хайра дурлал дүүрэн эдлэе.

¹⁹ Минии нүхэр гэртээ үгы, тэрэ холын аянда мордонхой.

²⁰ Тэрэ туламтай мүнгэ абажа ошоо, хахад һара гэртээ байхагүй».

²¹ Иигэжэ үгөөрөө үнөөхи залуу хүниие бэедээ татаха гэжэ оролдобо. Тэрэнь мэхэдэнь ороо.

²² Тэрэ залуу эрэ нядалагдахаа байһан бухадал адли, урьхада ороһон зээрэн мэтэ хойноһоонь дахажа ошобо.

²³ Һуршын зэбын эльгыень нэбтэ сохихоор бэлэн байһые мэдэхэгүй, урьхада орохо жэгүүртэ мэтэ аюулда орохоёо ойлгохогүй байба.

²⁴ Тиимэһээ, хүбүүдни, намайе шагнагты. Аманһаам гараһан үгэ анхарагты.

²⁵ Зүрхэ сэдьхэлтнай тэрэ эмэ тээшэ бү эрьег, замынь дахажа бү ябагты.

²⁶ Ушарынь хадаа тэрэ эмэһээ хохидогшод, тэрээндэ алуулһан зон олон.

²⁷ Тэрэнэй гэр – Үхэлэй орондо хүргэхэ харгы, үхэлэй танхимууд руу уруудаһан харгы болоно.