Һургаал 6 - Библи

Юрэ байдалай хэшээлнүүд

¹ Хүбүүмни, ши ондоо хүнэй үри шэриин түлөө харюусалга бэедээ абажа бү бай. Үрииень бусаахаб гэжэ гар даабал,

² амалһан үгынгөө зангада ороо гээшэш.

³ Яанабши, тэрэ хүнэй гарта ороһон хойноо ши ошожо өөрыгөө абара. Тэрэ хүниие гуйжа, үриһөө сүлөөрхые оролдо.

⁴ Үргэһэ нойрто диилдэн олойржо бү бай.

⁵ Ангуушанай гарһаа зайлаһан гүрөөһэн мэтэ, шубуу баригшын торһоо мултарһан жэгүүртэн мэтэ тэрьелжэ гара.

⁶ Залхуу ши, шоргоолзоной хүдэлхые ажаглан хара, тэрэ ехэ сэсэн амитан.

⁷ Тэрээндэ ноён, ахалагша, ударидагша гэжэ байхагүй.

⁸ Өөрынгөө хоол тэрэ зунай сагта бэлдэжэ, ургаса хуряаха сагтаа нөөсэлэн хадагалдаг.

⁹ Залхуу ши, хэды болотор хэбтэхэбши? Нойрһоо хэзээ һэрихэ юмши?

¹⁰ Залхуунь харюусана: «Нэгэ жаахан унтаял даа, үргэһөө абаһуулби, гараа хабсараад хэбтэд гэһүүлби».

¹¹ Тиигэһээр байтаршни хооһон ядуу байдал хажуудаш ерэхэ, зайгуул хүндэ адли бии болохо, зоболон дээрмэшэн мэтэ дээрэш бууха.

^12-13 Муу, хорон һанаатай хүн нюдөөрөө эмнин, хүлөөрөө дохёо үгэжэ, хургаараа занган худалаар хэлэдэг.

¹⁴ Хара һанаандаа үргэлжэ хорото муу хэрэг һэдэжэ, хёморол үүсхэдэг.

¹⁵ Гэбэшье хүлеэгдээгүй гай гасалан гэнтэ тэрээн дээрэ бууха.

¹⁶ Эзэн зургаан мууе үзэн ядадаг, долоодохиһоо мүн лэ зэбүүсэдэг. Тэдэ гэбэл:

¹⁷ ехэрхүү хараса, худалша хэлэн, гэмгүй хүнэй шуһа урадхуулдаг гарнууд,

¹⁸ хара муухайе һэдэгшэ сэдьхэл, хорон муу руу яарагша хүл,

¹⁹ хуурмаг хэлэдэг гэршэлэгшэ, аха дүүнэрэй хоорондо хэрүүл наншалдаа үүсхэгшэ болоно.

Дахяад һамуу ябадалһаа һэргылэлгэ

²⁰ Хүбүүмни эсэгынгээ заабари сахи, эхынгээ захиһаниие бү мартаарай.

²¹ Тэдэнэй үгэнүүдые сэдьхэлдээ хадуужа аба, зүүдхэл мэтэ хүзүүндээ үлгэ.

²² Ябаһан замдашни тэдэ ударидажа, унтахадаш хамгаалха, һэрихэдэш шамтай ярилдаха.

²³ Эхэ эсэгыншни захяа заабари хадаа зүб харгы харуулһан дэн, һургаал – гэрэл, шанга заабари – амидаралай зам гээшэ.

²⁴ Тэдэнэй һургаал муу эмэһээ шамайе зайлуулха, үбгэнтэй эхэнэрэй альбан үгэһөө холо байлгаха.

²⁵ Тэрэ эмын тансаг һайханиинь шинии дура буляаха ёһогүй, харасань бэе тээшэ бү татаг.

²⁶ Ушарынь хадаа һамуун эмэ зүһэм талханһаа үнэгүй, ондоо хүнэй забхайрһан һамган ами наһыеш абажа болохо.

²⁷ Хүн хубсаһаяа галдангүй гал үбэртэлжэ шадахагүй,

²⁸ хүлөө шатаангүй халуун нүүрһэн дээгүүр ябажа шадахагүй.

²⁹ Хүршынгөө һамганда харгылха гээшэ эгээл тиимэ байна. Тэрэ эхэнэртэ дүтэлһэн хүн хэһээлтэ амасаха.

^30-31 Үлэсхэлэн байһандаа эдеэ хоол хулгайлһан хүниие ехэ харшалдаггүй. Гэбэшье баригдабал, тэрэ долоо дахин нугалжа түлэхэ, хамаг эд зөөриеэ үгэхэ болоно.

³² Харин эхэнэртэй забхайрһан хүн одоол тэнэг гээшэ, тэнэгээрээ тархяа эдинэ ха юм.

³³ Зоной дунда тэрэ хүндэеэ буураха, сохюулха, эшэгүүринь хэзээшье арилхагүй.

³⁴ Забхайрһан эмын үбгэнэй жүтөөрхэл уур хилэнгыень соробхилуулдаг, үһөөгөө абахаяа һанабал, тэрэ хайрлаха гэжэ мэдэхэгүй.

³⁵ Тэрэ ямаршье түлөөһэ хүлеэн абахагүй, бэлэг-сэлэг тэрэнэй сэдьхэл заһахагүй.