Һургаал 5 - Библи

Һамуу ябадалһаа һэргылэлгэ

¹ Хүбүүмни, минии мэргэн һургаалые анхара. Бодолыем ойлго.

² Бодомжотой даруугаар хамаг юумэ ажаглажа, аманһаашни сэсэн үгэнүүд гарахын тулада юм.

³ Ондоо хүнэй һамганай урал зүгын бал шэнги амтатай, тэрэнэй үгэнүүд тоһонһоо үлүү зөөлэн байдаг.

⁴ Харин түгэсхэлдэнь шаралжа мэтэ гашуун, хоёр таладаа эритэй элдэ мэтэ голхорол асардаг.

⁵ Тэрэ эмын хүлнүүд үхэл руу ябадаг, тэрэнэй алхаса Үхэлэй орон тээшэ шэглэлтэй.

⁶ Зүб харгыһаа тэрэ хадууранхай, замайнгаа буруутаһые өөрөөшье мэдэхэеэ болинхой.

⁷ Ушар иимэһээ, хүбүүдни, намайе шагнагты, үгыем мартажа бү байгты.

⁸ Һалихай тэрэ эхэнэрһээ холо бай, үүдэнэйнь богоһын ойрошье гаража болохогүй.

⁹ Тиигэбэл, хүсэ тэнхээгээ бусадта үгэхэш, хайрлаха сэдьхэлгүй зондо он жэлнүүдээ үрихэш.

¹⁰ Шинии хүсые ондоо хүнүүд ашаглаха, зөөришни ондоо зондо хүртэхэ.

¹¹ Наһанайнгаа эсэстэ тамир тэнхээгээ алдаад байхадаа, үзэхын ехэ зоболон үзэхэш.

^12-13 Тиихэдээ хэлэхэш: «Юундэшье һургаал заабари тоодоггүй, зэмэлхэдэ үсэрдэг байгаа гээшэбиб.

¹⁴ Мүнөө иигээд олоной үмэнэ нэрэ түрэеэ гутааха туйлдаа хүрөөд байнаб».

¹⁵ Өөрын сөөрэмһөө уһа уу ба өөрын худагһаа удха.

¹⁶ Уһаншни гудамжа руу халижа, урасхалынь талмай дээгүүр урдажа байха юм гү?

¹⁷ Энэ гансахан шинии байг, хүнүүдтэй бү хубаалда.

¹⁸ Булагһааш гараһан уһан буян хэшэгтэй байг, залуудаа гэрлэһэн эхэнэртээ энхэрэн баяса.

¹⁹ Энхэргэн марал болон һайхан һогоонтой адли эхэнэрэйшни хүхэнүүд ямаршье үедэ шамайе хангаха болтогой, инагай хайрада үргэлжэ хүртэжэ һэргэ.

²⁰ Яахадаа ондоо хүнэй эхэнэртэй бэеын жаргал эдлэжэ, хүнэй һамганай бэе тэбэрихэ болообши, хүбүүмни?

²¹ Ушарынь гэхэдэ, Эзэнэй нюдэнэй урда хүнэй наһан элихэн харагдажа байдаг юм, хүнэй замые Тэрэ анхаран шэртэжэ байдаг.

²² Хара нүгэлтын хуулигүй ябадал өөрыень барижа байдаг, өөрын нүгэл хилэнсэгэй уяанда тэрэ хүлеэтэй байдаг.

²³ Һургаал заабари дутаһанһаа боложо тэрэ үхэхэ, өөрын мунхагһаа замаа төөрихэ.