Һургаал 4 - Библи

Сэсэн мэргэн – эгээл үнэтэй эрдэни шулуун

¹ Хүбүүдни, эсэгынгээ һургаал шагнагты. Оюун ухаанда һурахын тулада анхаралтай байгты.

² Юуб гэхэдэ, һайн һургаал, шухала заабари таанарта үгэнэб. Минии һургаал захяа бү орхёоройгты.

³ Бишье эхэ эсэгын эрхэ тангил байгааб.

⁴ Эсэгэм намайе һургажа хэлэгшэ һэн: «Зүрхэ сэдьхэлдээ минии үгэ хадуужа аба, минии захяа заабари сахибал, һайн һуухаш.

⁵ Сэсэн ухаа ба оюун мэдэлгэ оложо аба. Минии хэлэһэн үгэ бү буруушаа, бү марта.

⁶ Сэсэн ухаанһаа бү зайса, тэрэ шамайе хамгаалха, һэргылхэ, тэрээндэ дуратай бай.

⁷ Сэсэн ухаан тэрэниие оложо абахам гэһэн хүсэлһөөш эхилнэ, оложо абахын түлөө бүхыгөөрөө оролдо.

⁸ Сэсэн ухаае үнэлжэ сэгнэ, тэрэ шамайе үргэмжэлхэ, тэрэниие эгээн шухала гэжэ тэбэрин абаа һааш, шамайе алдаршуулха.

⁹ Сэсэн ухаан гээшэ шинии эгээл ехэ баялиг боложо, толгой дээрэш һайхан сэсэгэй титим табиха».

Сэсэн мэргэн – эгээл найдамтай зам

¹⁰ Хүбүүмни, соносо, хэлэгшыем хүлеэн абабал, амидаралайш он жэлнүүд нэмэгдэхэ болоно.

¹¹ Би шамайе сэсэн ухаанай замаар хүтэлхэб, сэхэ харгыгаар ябуулхаб.

¹² Энэ харгыгаар ябабал, алхамшни буруу болохогүй, гүйхэдөө бүдэржэ унахагүйш.

¹³ Эсэгын һургаалые алдангүй һанажа яба. Эсэгын һургаал хүбүүнэйнь амин гол мүн.

¹⁴ Хара нүгэлтэнэй харгыда хүлөө бү таби. Муу зоной замаар ябажа болохогүй.

¹⁵ Тэрэ харгыһаа зайла, буруу хараад хажуугаарнь үнгэрэ.

¹⁶ Тэдэ хорото муу юумэ үйлэдөөгүйдөө амар унтахагүй юм. Хэн нэгэниие бүдэрүүлжэ унагаагаагүй сагтаа тэдэнэй нойр хүрэдэггүй.

¹⁷ Тэдэ талха эдиһэн шэнги муу үйлөөр хооллодог, хүсэрхэлгын хорото үзэмэй дараһан архинһаа уудаг.

¹⁸ Харин үнэн шударга хүнүүдэй зам хадаа үүрэй толон мэтэ үдэрэй ерэхэдэ улам һаруул болодог.

¹⁹ Хара бодолтоной замынь харанхы мэтэ. Тэдэ хаана бүдэрхэ байһанаа мэдэдэггүй.

Сэсэн мэргэн – ажабайдал хүтэлэгшэ

²⁰ Хүбүүмни, минии үгэ соносо, үгэ хүүрыем анхаралтайгаар шагна.

²¹ Минии үгэ харааһаа алдажа болохогүй. Зүрхэндөө хадагалжа яба.

²² Минии үгэ хадаа тэрэниие шагнаһан хүндэ ами үгэдэг, бэеынь элүүр болгодог.

²³ Хамагай түрүүн зүрхөө хамгаала. Тэрээнһээ аминай булагууд гарадаг юм.

²⁴ Мэхэлэгшэ үгэнүүдые буруушаан зайлуулдаг бай. Мэхэтэй амые өөрһөө холодуула.

²⁵ Нюдэншни урдаа байһаниие сэхэ хараг, урдашни байһан һайн хэрэгүүдһээ зайлажа бү яба.

²⁶ Урдахи замаа сэхээр таби, тиигэбэл, замшни аюулгүй байха.

²⁷ Зүүн, баруун тээшээ годиронгүй яба, хорон мууһаа зайлажа яба.