Һургаал 3 - Библи

¹ Хүбүүмни! Минии һургаалые бү марта, зүрхэншни минии заабари сахиха болтогой.

² Үдэрнүүдые ба амиды ябаха олон жэлнүүдые, амар тайбаниие тэдэ шамда нэмэхэ болоно.

³ Этигэл ба үнэн сэхэ шамайе бү орхиг. Эдэниие зүрхэнэйнгөө хабтаһан дээрэ бэшэ, хүзүүндээ орёо.

⁴ Тиин Бурханай болон хүнүүдэй нюдэндэ талархал ба хүндэтхэл олохош.

⁵ Үнэн зүрхэнһөө Эзэндэ этигэ. Өөрын ойлголтодо бү түшэглэ.

⁶ Өөрын бүхы замда Тэрэниие танижа мэдэ. Тэрэ шинии замые шууд сэхэ болгоно.

⁷ Өөрыгөө мэргэн гэжэ бү тооло, Эзэнһээ түбэгшөөн бэшэрэ, мууһаа зайла.

⁸ Энэ хадаа бэедэшни эм болохо, яһышни бэхи болгохо.

⁹ Эд зөөриһөө ба бүхы бүтээгдэһэнэй дээжэһээ Эзэндэ үргэн хүндэлэ.

¹⁰ Амбааршни таряагаар дүүрэхэ, үзэмэй архинайш амһарта шэнэ үзэмэй дараһан архяар салгидаха.

¹¹ Эзэнэй заһабариие бү буруушаа, Тэрэнэй зэмэлэлдэ бү дурагүйлхэ.

¹² Юуб гэхэдэ, хүбүүндээ дуратай эсэгэ шэнги Эзэн зэмэлэн хэһээдэг ба энхэрдэг.

Сэсэн ухаанай баялиг

¹³ Сэсэн ухаа бэдэрэн олоһон, ухаа нэмэһэн хүн тэнюун жаргалантай.

¹⁴ Ушарынь хадаа сэсэн мэргэниие олобол, сагаан мүнгэнһөө үлүү, ашаг олзонь шэжэр алтанһаа үлүү.

¹⁵ Энэнь эрдэни шулуунһаа сэнтэй. Шинии хүсэһэн ямаршье зүйлтэй жэшэмээр бэшэ.

¹⁶ Тэрэнэй баруун гарта ута удаан амидарал заларха, зүүн гартань алдар суу болон баялиг байха.

¹⁷ Сэсэн мэргэнэй харгынууд – баяр баясхаланай ба энхэ тайбанай харгынууд юм.

¹⁸ Оложо шадаһан зондо тэрэ амидаралай модон болодог, тэрээнтэй хахасадаггүй хүн жаргалтай.

¹⁹ Эзэн сэсэн ухаагаар газарые бии болгожо, оюун мэдэлгээр огторгой тогтоогоо.

²⁰ Тэрэнэй мэдэлгээр гүн нээгдэжэ, үүлэнһээ шүүдэр унана.

²¹ Харааһааш эдэ бү хоргодог, оюун ухаан, холын бодол бүрин гамнаарай.

²² Тэрэ хадаа сэдьхэлыш тэдхэхэ, зоной талархал хүзүүнэйш зүүлтэ болохо.

²³ Ши аян замдаа аюулгүй ябахаш, хүлшни бүдэрхэгүй.

²⁴ Ши унтаха-хэбтэхэ үедөө айхагүйш, үргэһэ нойршни амгалан байха.

^25-26 Гэнтын аймшагһаа бү сошо, хара һанаатын хорото һэдэлгэһээ бү ай, юуб гэхэдэ, Эзэн хажуудашни байха, хүлыншни зангаһаа зайлуулха.

Үнэн шударга ябадал

²⁷ Шинии хүсэн хүрэхэ һаань, зондо туһа хэхэеэ бү марга.

²⁸ Туһалха боломжотой һаа, эриһэн хүндэ «үглөө ерээрэй» гэжэ бү хэлэ.

²⁹ Шамда этигэдэг, хажуудаш байгааша хүндэ эсэргүү юумэ бү үүдхэ.

³⁰ Хүнэй шамда хорото мууе ушаруулаагүй һаань, тэрээнтэй бү заргалда.

³¹ Хүсэрхэдэг хүнтэй адли бү боло, тэрэнэй зам бү шэлэ.

³² Муу залитай хүнһөө Эзэн зэбүүрхэдэг, үнэн сэдьхэлтэй хүндэ Тэрэ найдадаг.

³³ Эзэнэй хараал муу хүнэй гэр дээрэ буудаг, харин шударга зүб байгшын орон гэрые Тэрэ үреэдэг.

³⁴ Шог шашаг зониие Эзэн наада баридаг, номгон хүндэ Тэрэ нигүүлсэлээ үгэдэг.

³⁵ Сэсэн мэргэн хүнүүд алдар солодо хүртэдэг, тэнэгүүд муу суутай болодог.