Һургаал 29 - Библи

Магталга ба зэмэлэл

¹ Хүжүүндээ найраад, зэмэлэл шагнадаггүй хүн нэгэ үдэр гэнтэ бусалтагүй унана.

² Зүб шударга хүнүүдэй дэбжэхэдэ, арад түмэн баяртай байдаг. Харин нүгэлтэнэй засагта байхада, арад зон халагладаг.

³ Сэсэн мэргэндэ дуратай хүн эсэгэеэ баярлуулдаг. Янхан эмэнүүдтэ харгылагша эд зөөриеэ баража дууһана.

⁴ Хаанай шударга ёһо улас орониие бэхижүүлнэ. Харин эдилгэ абадаг ёһо тэрэниие доройтуулдаг.

⁵ Нүхэртөө билдагуушалдаг хүн урьха тэрээндэ түхеэрнэ.

⁶ Хуулигүй хүн нүгэл хилэнсэгтээ урьхадуулдаг. Харин үнэн шударга хүн хүхюутэй байдаг.

⁷ Үнэн шударга хүн ядуугай эрхын түлөө һанаагаа табидаг. Харин хуулигүй хүн энээниие ойлгодоггүй.

⁸ Убайгүй һамуун хүнүүд хотодо үймөө үүсхэдэг. Харин сэсэшүүл уур хилэн номгоруулдаг.

⁹ Сэсэн тэнэг хоёрой хэрэг шиидхэлгэдэ уур сухал, энеэдэн таһархагүй.

¹⁰ Алууршад гэмгүй хүниие үзэн ядадаг, сэхэ сэбэр хүнүүд ами наһан тухайнь һанаагаа табидаг.

¹¹ Тэнэг мунхаг уураа барижа шададаггүй, харин сэсэн хүн бэеэ баридаг.

¹² Удамарша хүн хуурмаг үгэ шагнадаг һаань, тэрэнэй түшэмэл туһалагшад нүгэлтэн боложо хубирна.

¹³ Ядуу хүн ба дарлагша хоёрой адли зүйл гэхэдэ тэдэнэй нюдэндэ гэрэл Эзэнһээ носодог.

¹⁴ Хэрбээ хаан үгытэй ядуушуулые шударгаар шүүн шиидхэдэг һаань, хаан шэрээнь мүнхэ байха.

¹⁵ Һабаа бургааһан, зэмэлэл хоёр сэсэ мэргэниие үгэдэг. Зоргон соонь орхигдоһон хүүгэд эхэеэ эшэбэритэй байдалда оруулха.

¹⁶ Нүгэлтэнэй олошорхо тума нүгэл нэмэнэ. Гэбэшье үнэн шударга хүнүүд тэдэнэй уналга үзэхэ.

¹⁷ Хүбүүгээ хэһээдэг бай. Тиигэбэл тэрэнэй түлөө һанаагаа зобохоёо болихош, сэдьхэлыш тэрэ баярлуулха.

¹⁸ Дээрэһээ зүн мэдэлгэ үгы байхадаа, арад түмэн журамгүй байна. Харин Хуули сахигша жаргалтай.

¹⁹ Зарасада үгөөрөө заабарилжа болохогүй. Ойлгоһоншье һаа, хэбэрээ мэдүүлхэгүй.

²⁰ Урид аматай хүниие хараа һэн гүш? Тиимэ хүндэ найданхаар тэнэг нэгэнэй заһаралгада найдаһан дээрэ.

²¹ Хэрбээ зарсые багаһаань эрхэлүүлбэл, хожомынь эзэнэйнгээ мэдэлһээ гарааб гэхэ жэшээтэй.

²² Ууртай хүн хэрэлдээ үүдхэнэ, түргэн сухалтай хүн гэм нүгэлдэ абтана.

²³ Бардам зан хүниие дарана, харин гудагар номгон хүн хүндэдэ хүртэнэ.

²⁴ Хулгайшантай хамтарагша бэедээ дайсан болоно. Хараал дуулаашье һаа, тэрэ абяагүй һуудаг.

²⁵ Хүнһөө айха гээшэ занга юм. Харин Эзэндэ этигэдэг хүн аюулда орохогүй.

²⁶ Олон хүнүүд засаг баригшын талархал бэдэрдэг. Үнэн шударга ёһо Эзэнһээ гэжэ тэдэ мартадаг.

²⁷ Үнэн шударга хүнүүд хуулигүй нүгэлтэһөө зэбүүсэдэг. Сэхэ замаар ябагшадһаа нүгэлтэн зэбүүсэдэг.