Һургаал 28 - Библи

Баянһаа үнэн шударгань дээрэ

¹ Муу хүн хүнэй мүрдөө мүшхөөгүй байхада зугадажа ябадаг, үнэн шударга хүн арсалан шэнги доро зүрхэтэй.

² Улас орондо һамуурал үймөөнэй болоходо удамаршад олон. Харин ухаалиг, мэдэлгэ ехэтэй хүнэй ударидал доро орон нютаг бүтэн үлэдэг.

³ Ядуушуулые зобоодог үгытэй хүн таряалангые урыда урадхуулха аадар бороотой адли.

⁴ Хуули тоодоггүй зон нүгэлтэниие магтадаг. Харин хуули сахидаг зон тэдээнтэй тэмсэдэг.

⁵ Хара һанаатан шударга ёһые ойлгодоггүй, харин Эзэниие бэдэрэгшэд тэрээниие ойлгохо.

⁶ Худал харгытай баянһаа үнэн шударга үгытэйнь дээрэ.

⁷ Ухаатай хүбүүн Эзэнэй Хуули сахидаг, харин мүргүй зонтой нүхэсэдэг хүн эсэгынгээ нэрэ гутаадаг.

⁸ Мүнгэ зээлилэн баялигаа арбижуулагша ядуушуулда энэрхыгээр хандадаг хүнэй түлөө мүнгэ нөөсэлдэг.

⁹ Эзэнэй Хуули тоодоггүй хүнэй зальбаралшье зэбүүрхэмээр.

¹⁰ Сэхэ харгытай зониие хорон муугай замда хүтэлэгшэ этэгээд өөрын малтаһан нүхэндэ унана. Харин гэмгүй хүн ашаг туһада залгамжалан хүртэхэ.

¹¹ Баян хүн өөрыгөө сэсэнби гэжэ тоолодог. Үгытэйшье һаа, ухаатай хүн тэрэниие дары ойлгодог.

¹² Үнэн шударга хүнүүдэй баярлахада олон зон омогорхон хүхидэг. Харин хара һанаатанай үргэмжэлэгдэхэдэ, зон нюураа хоргодуулдаг.

¹³ Нүгэлөө нюун далдалагша амжалтада хүрэхэгүй. Харин гэмээ мэдэрэн наманшалагша хайрада хүртэдэг.

¹⁴ Эзэнһээ бэшэрдэг хүндэ үреэл оршоно. Харин сэдьхэл хатуу хүн гай гасаланда ородог.

¹⁵ Хуулигүй нүгэлтэй засаг баригша ядуушуулда хандахадаа, хэрхирһэн арсалан, үлэн баабгай мэтэ.

¹⁶ Ухаагаар дутуу удамаршын дарлалга бүришье ехэ. Хомхой сэдьхэлээр олдоһониие үзэн ядадаг хүнэй үдэр хоногуудынь ута болохо.

¹⁷ Хүнэй шуһа урадхуулһан хэрэгтэ хамаатай хүн үхэтэрөө бодхуул ябаха. Тиимэ хүниие бү дэмжэ.

¹⁸ Гэм нүгэлгүй хүн абарагдаха болоно. Харин буруу харгыгаар ябадаг хүн нэгэтэ унажа магадгүй.

¹⁹ Газараа элдүүрилдэг хүн талха таряагаар элбэг байха. Харин хии бодол намнан миин байһан хүндэ ядарал элбэг байха.

²⁰ Үнэн этигэлтэй хүн үреэлөөр баян һууха. Баяжаха гэжэ яарадаг хүндэ хэһээлтэ байха.

²¹ Нэгэнэй тала бариха гээшэ һайтай бэшэ хэрэг: тиимэ хүн зүһэм хилээмэнэй түлөө нүгэл үйлэдэдэг.

²² Хомхой хобдог хүн зөөри баялиг намна намнаһаар, тэрэнэй хойноһоо ядаралай ерэхые анхаржа ойлгодоггүй.

²³ Үлүүдэ магтагшада орходоо зэмэлэгшэ хүниинь эсэстээ һайн.

²⁴ Эхэ эсэгынгээ зөөри буляахадаа, «Энэ нүгэл бэшэ» гэжэ хэлэдэг хүн дээрмэшэнтэй адли.

²⁵ Бардам хүн хэрэлдээ үүсхэдэг, харин Эзэндэ этигэдэг хүн хүгжэн дэбжэдэг.

²⁶ Гансал өөртөө найдадаг хүн тэнэг гээшэ. Сэсэнэй харгыгаар ябадаг хүн аюулһаа зайладаг.

²⁷ Ядуушуулда үгэдэг хүн юугээршье дутахагүй. Ядуушуулһаа нюдөө далтируулдаг хүндэ хүртэхэ хараалынь олошорхо.

²⁸ Хуулигүй нүгэлтэнэй үргэмжэлэгдэхэдэ, хүнүүд бэеэ нюудаг. Харин тэдэнэй унахада, үнэн шударга зон олошорно.