Һургаал 26 - Библи

Занга бү таби

¹ Тэнэг хүнэй соло сууда гаралга хадаа зундаа саһа орохо ба ургаса хуряаха үеэр бороо ороһонтой адли.

² Борбилоогой буршагад гээд үгы болоһонтой, хараасгайн шуумар ниидэжэ арилһантай адли шалтагаангүй хараал хүсэдэггүй.

³ Ташуур мориндо, хазаар элжэгэндэ, харин һабаа модон тэнэгэй нюрганда.

⁴ Тэнэг хүндэ тэнэгээрынь харюулжа, тэрээнтэй адли болоно гээшэш.

⁵ Тэнэг хүнэй өөрыгөө сэсэн гэжэ тоолохогүйн тулада тэрээндэ тэнэг соонь харюусаха болоно.

⁶ Тэнэг хүндэ хэрэг ажалаа даалгаһан хүн хүлөө тайруулһандал хохидол амсаха.

⁷ Тэнэгэй аманда һургаалай сэсэн үгэ дохолон хүнэй хэрэгсээдэггүй хүлдэ адли.

⁸ Тэнэг хүниие үргэмжэлхэ гээшэ һэнгүүртэ харбаха шулуугаа уяһантай адли.

⁹ Тэнэгэй һургаалай сэсэн үгэ хэлэхэнь һогтуу хүнэй адаалхай үүргэнэдэ шагтагалдаһантай адли.

¹⁰ Дайралдаһан тэнэгые дары албанда хүлһэлэгшэ хадаа хараһан бүхы хүнүүдые шархатуулдаг һур харбагшада адли.

¹¹ Нохой бөөлжэһэндөө бусадаг, тэрээндэл тэнэг хүн тэнэг мунхагтаа найран үсэрхэ.

¹² Өөрыгөө сэсэн гэжэ тоолодог хүниие хараа һэн гүт? Тэнэг хүндэ тэрээнһээ үлүү найдахаар.

¹³ Залхуу хүн «Харгы дээрэм арсалан һууна. Талмай дээгүүр дошхон арсалан зайжа ябана» гэдэг.

¹⁴ Үүдэнэй сүйдөө һэнжэлзэдэгтэл залхуу унтаридаа тэршэлдэг.

¹⁵ Залхуу хүн аягаһаа амандаа гараа хүргэтэрөө эсэхэ.

¹⁶ Залхуу хүн боломжотой харюу үгэдэг долоон ухаатанһаа сэсэнби гэжэ өөрыгөө тоолохо.

¹⁷ Өөртэнь хамаагүй хэрүүлдэ оролсохонь нохойе шэхэнһээнь угзарагшатай адли.

¹⁸ Галтай һурша болон үхэл шэдэгшэ галзуу хүндэ

¹⁹ нүхэрөө мэхэлээд, «Би шоглоном» гэдэг хүн адли.

²⁰ Түлеэнэй дууһахада гал унтараа, хоб зөөгшын үгы болоходо хёморол замхаа.

²¹ Нүүрһэнһээ халуун, түлеэнһээ гал, хоб шэрэгшын үгэһөө хёморол.

²² Хоб шэрэгшын үгэ амтан эдеэн мэтэ, хүнэй мухар гэдэһэн хүрэтэр орохо.

²³ Хэбрэг шабараар хэһэн һуулгые хэдышье мүнгөөр үнгэлхэдэ, үнэ орохогүй. Муу сэдьхэлһээ хэлэһэн альбан үгэнүүд тэрээндэл адли.

²⁴ Муу һанаатан альбан үгөөр муугаа далдалжа болодог, муу мэхэеэ тэрэ зосоогоо баридаг.

²⁵ Тэрэ хүнэй зөөлэн үгэдэ бү этигэ. Зосоогоо долоон жэгшүүритэ зүйл тэрэ хадагалдаг.

²⁶ Тэрэнэй хуурмагайнь саана үзэн ядалгань нюугдаашье һаа, нүгэлынь зоной урда гаража ерэхэ.

²⁷ Нүхэ малтаһан хүн өөрөө тэрээн руу унана. Шулуу түлхихэдөө өөрөө тэрээндэ даруулха.

²⁸ Хуурмаг хүн хуурагдагшые үзэн ядадаг, билдагууша аман һүйдхэл түхеэрдэг.