Һургаал 25 - Библи

Дайсантай яажа харилсахаб

¹ Иудын хаан Хэзэкияагай зарасанарай суглуулан нэгэдхэһэн Соломооной бусад һургаалнууд.

² Хэрэг ябадал нюухань Бурханай алдар суу. Тэдээниие оложо элирүүлхэнь хаашуулай алдар суу.

³ Тэнгэриин үндэр, газарай намдуу гүн мэтэ хаашуулай зүрхэ сэдьхэл хүртэшэгүй холо.

⁴ Сагаан мүнгые холисоһоонь илган сэбэрлэ, мүнгэшэ дарханай саб амһарта бүтэхэ.

⁵ Хаанай хажууһаа хуулигүй нүгэлтэниие һалган холодуула, хаан шэрээ үнэн шударгада тулан бэхижэхэ.

⁶ Хаанай урда өөрыгөө бү үргэмжэлэ, амбан ехэшүүлэй зэргэдэ бү зогсо.

⁷ Ехэ ноёдой үмэнэ доромжодо оронхаар доохонуур зогсоод, «Дээшээ морилогты» гэжэ хэлүүлэгшэнь дээрэ бэшэ юм гү? Хараһан юумэндэ

⁸ заргалдахаяа бү яара. Хажуудахи хүншни шамайе аягүй байдалда оруулхадань юу хэхэ болонош?

⁹ Хажуудахи хүнтэй заргалдахадаа, өөрын хэрэгһээ гадуур бү гара. Бусадай нюуса бү соносхо.

¹⁰ Тэрээниие дуулаһан хүн нэхэн зэмэлжэ болохо. Тиигэбэл буруутан боложо нэрээ гутахаш.

¹¹ Саг соогоо хэлэгдэһэн зүб үгэ гээшэ мүнгэн хээ угалзада шэрэгдэһэн алтан алим шэнги.

¹² Зэмэлэлгын мэргэн үгэ гээшэ шэхээ табин соносогшодо алтан һиихэ ба шэжэр алтан зүүдхэл мэтэ.

¹³ Найдалтай элшэн тэрэниие эльгээгшэдэ таряа хадалгын халуун үедэ саһанай ороһон һэрюун мэтэ. Тэрэ эзэнэйнгээ сэдьхэл тэнхэрүүлнэ.

¹⁴ Үгэхэ бэшэ аад, бэлэгүүдээ һайрхагша бороогүй үүлэн ба һалхин мэтэ.

¹⁵ Засаг баригшыешье тэсэбэреэр идхажа болоно. Уян эелдэр үгөөр яһашье хухалжа болоно.

¹⁶ Зүгын бал олобол, садатараа эди. Хэтэрүүлээд, бөөлжэжэ бү бай.

¹⁷ Хүршынгөө гэртэ үсөөхэн ошо. Тиигээгүй һааш, шамһаа залхууржа үзэн ядадаг болохо.

¹⁸ Хажуудахидаа эсэргүү худал гэршэ болодог хүн һэлмэ, хурса үзүүртэй һурша болон шиидам мэтэ.

¹⁹ Хэсүү сагта этигэлгүй хүндэ найдаха гээшэ үмхирһэн шүдэн, дохолон хүл мэтэ.

²⁰ Зобоһон сэдьхэлдэ дуу дуулаха гээшэ шарха дээрэ дабһа адхаһантай адли, хүйтэн үдэртэ хубсаһаа тайлаад ябаһан хүн мэтэ.

²¹ Үлэсхэлэн дайсанда эдеэ үгэ, ангаа һаань, уһа уулга.

²² Иихэдээ ши тэрэнэй толгой дээрэ шатажа байһан нүүрһэ обоолно гээшэш, Эзэн шамда харюулха.

²³ Хойноһоо үлеэһэн һалхин хура бороо асардаг, хоб жэбтэй хэлэн нюурнуудые ууртай болгодог.

²⁴ Хэрүүлшэ эхэнэртэй хамта һуунхаар хушалта дээрэхи буланда амидарһаниинь дээрэ.

²⁵ Ангажа тулиһан хоолойдо хүйтэн уһан ямар байдаг шэнги холын оронһоо ерэһэн һайн мэдээн сэдьхэлдэ тиимэ байдаг.

²⁶ Үнэн шударга хүнэй хуулигүй нүгэлтын урда һалаганан унаха гээшэ булагай уһанай булангиртаһантай, худагай бузарлагдаһантай адли.

²⁷ Зүгын бал хомхойрон эдихэ һайн бэшэ, нэрэ алдарай хойноһоо үрдилдэн тэмсэхэ алдар бэшэ.

²⁸ Бэеэ баридаггүй хүн ханагүй һандарһан хото мэтэ.