Һургаал 24 - Библи

¹ Муу зондо бү атаарха, тэдэнэй нэгэн болохые бү хүсэ.

² Тэдэ хүсэрхэл һэдэжэ ябадаг, ама хэлэниинь гай зоболон түхеэржэ байдаг.

³ Гэр орониие сэсэн мэргэн зохёодог, оюун ухаагаар тэрэ бэхижэдэг.

⁴ Мэдэлгын ашаар ордон үргөөнүүд эрхим баялигаар дүүрэнэ.

⁵ Сэсэн хүн шадалтай, ухаатай хүн хүсөө батадхана.

⁶ Дай хэхэдээ заабари шагна. Олон зүбшэлэгшэдтэй байхада илалта туйлагдаха.

⁷ Сэсэн мэргэн хадаа тэнэг мунхагта хүртэшэгүй үндэр. Хотын хаалгын дэргэдэ тэрэ амаашье нээхэгүй.

⁸ Мууе хэхээр түсэблэдэг хүниие муу мэхэтэй гэжэ нэрлэдэг.

⁹ Тэнэгэй һэдэлгэнүүд нүгэл гээшэ. Эшэхэ гайхахаяа мэдэхэгүй, һэнгэргүй хүндэ зон дурагүй.

¹⁰ Хэрбээ ши хүндэ сагта доройтохо һаа, тэнхээ шадалшни һула байна.

¹¹ Алагдаха газар руугаа туулгажа ябаһан хүнүүдые абара. Үхэлэй һабарта орогшодто туһалхаһаа арсаха юм аалши?

¹² «Бидэ энээн тухай мэдээгүйлби» гэжэ ши хэлэхэш. Зүрхые Туршагша энээниие анхаралдаа абана, һүнэһыеш Хамгаалагша энэ бүхэниие мэдэнэ. Хэһэн үйлын харюу Тэрэ хүнүүдтэ үгэхэ.

¹³ Зүгын бал эди, тэрэ ехэ һайн, балтай һархинаг шинии хоолойдо аятай байха.

¹⁴ Сэдьхэлдэшни сэсэ мэргэн тэрээндэл адли гэжэ мэдэ. Сэсэниие оложо абабалшни, шамда ерээдүй байха, этигэл найдабариш мүхэхэгүй.

¹⁵ Хара нүгэлтэ этэгээд, үнэн шударга хүнэй гэрэй хажууда тэрэниие отожо бү хэбтэ. Ажаһуудаг газарынь бү һандарга.

¹⁶ Юундэб гэхэдэ, үнэн шударга хүн долоо бүдэрөөшье һаа, бодохо, харин нүгэлтэд нэгэ бүдэрбэл, өөдэлхэгүй.

¹⁷ Дайсанайнгаа унахада хүхихэ хэрэггүй, бүдэрхэдэнь сэдьхэлээ баярлуулжа бү бай.

¹⁸ Мууда баярлаха гээшэ Эзэнэй нюдэндэ һайхашаагдахагүй, дайсанһааш уур хилэнгээ зайлуулжа магад.

¹⁹ Хорон һанаатанда бү сухалда, муу нүгэл үйлэдэгшэдтэ атаархажа бү бай.

²⁰ Юундэб гэхэдэ, хорото хэрэгүүдтэ ерээдүй гэжэ байхагүй, хара нүгэлтэнэй дэн бүхэдэг.

²¹ Хүбүүмни, Эзэнһээ болон хаанһаа түбэгшөөдэг бай. Урбагшадһаа холо бай.

²² Юундэб гэхэдэ, гай гамшаг тэрээнһээ гэнтэ ерэхэ. Хэды ехэ эбдэрэл асархыень мэдэхэгүйш.

Сэсэшүүлэй үшөө хэдэн һургаал

²³ Сэсэшүүл иигэжэ хэлэдэг. Хэрэг шүүлгэдэ али нэгэнэй тала бариха гээшэ һайн хэрэг бэшэ.

²⁴ Хуулигүй нүгэлтэниие зүб гэжэ хэлэгшэдтэ арад зоной хараал хүртэдэг, хамаг обог угсаатан тэдэниие үзэн ядадаг.

²⁵ Харин нүгэлтэниие хэһээгшэдтэ аша туһатай, тэдээндэ һайн үреэл хүртэхэ.

²⁶ Зүб харюу үгэлгэ урал руу таалаһантай адли.

²⁷ Гэр барихын урда газаахи ажалаа дүүргэжэ, хээрэ талада байһан юумэеэ суглуулан бэлэн болго. Тииһэн хойноол гэрээ бари.

²⁸ Шалтаггүй дүтын хүндэ эсэргүү гэршэлжэ болохогүй. Шинии аманда мэхэ бү байг.

²⁹ «Тэрэ намда яажа ханданаб, тиимээр лэ би ханданаб, харюуень тэнсүүгээр хүргэнэб» гэжэ бү хэлэ.

³⁰ Нэгэтэ би залхуугай таряалангай хажуугаар, ухаагүй хүнэй уһан үзэмэй сэсэрлигэй хажуугаар үнгэрбэб.

³¹ Бүхы талмайнь бог үбһэндэ дарагданхай, хаа хаанагүй үүргэнэ ургашанхай, шулуун хашаань унанхай байба.

³² Энээниие би өөр дээрээ түйжэ үзөөд, иимэ юумэ ойлгобоб:

³³ «Нэгэ жаахан унтая, бага зэргэ зали абая, гараа жаахан амараае» гэһээр байтар,

³⁴ үгытэй байдал зольбо мэтэ ерэжэ, ядарал дээрмэшэн мэтэ бууха.