Һургаал 23 - Библи

¹ Засаг баригшатай хамта зооглохоёо һуухадаа урдаа байһан юумэ һайтар ажагла.

² Зооглохо ехэ хүсэлэн байгаа һаань, хоолойдоо хутага тулга.

³ Тэрэнэй амтан эдеэндэ бү обто, тэрэ эдеэн хуурмаг юм.

⁴ Баялиг суглуулхын тулада үргэһэ нойргүй бү зүдхэ, хэзээ тогтохоёо мэдэхэ хэрэгтэй.

⁵ Баялигаа һайнаар харажашье үрдеэгүй байтаршни тэрэшни үгы болошоод байха: эд баялигта дали ургадаг, тэнгэри өөдэ дүүлиһэн бүргэд мэтэ ниидэжэ арилшаха.

⁶ Муу һанаатай хүнтэй сугтаа бү зоогло, тэрэнэй амтан эдеэндэ бү обто.

⁷ Зосоогоо юушье бодоһыень мэдэхэ аргагүй. «Эди, уу» гэжэ хэлээшье һаа, зүрхэ сэдьхэлынь шамһаа холо байдаг.

⁸ Эдиһэн хоолоо бөөлжэжэ гаргахаш. Наартай үгэнүүдшни дэмыдэ хэлэгдэн үнгэрхэ.

⁹ Мунхагта юумэ бү хэлэ. Ухаатай үгэнүүдые тэрэ наада бариха.

¹⁰ Урданай хилэ мужаа бү хүдэлгэ, үншэдэй газарта булимтаран бү оро.

¹¹ Тэдээндэ хүсэтэ Үмэглэгшэ байха. Тэдэнэй талаһаа Тэрэ зарга бариха.

¹² Зүрхэ сэдьхэлээ сахилта һургаалда зорюула, эрдэм мэдэсын үгэнүүдые шагна.

¹³ Хүбүүгээ һургаалгүй бү орхёорой, һабаагаар шабхадаашье һааш, тэрэ үхэшэхэгүй.

¹⁴ Һабаагаар шабхадаашье һаа, үхэлэй һабарһаа һүнэһыень мулталхаш.

¹⁵ Сэдьхэл зүрхөөрөө сэсэн байгаа һаань, миниишье зүрхэндэ баяр баясхалан тогтожо болоно.

¹⁶ Зүб юумэ хэлээ һааш, үнэхөөр баярлаха гээшэб.

¹⁷ Шинии зүрхэн нүгэлтэндэ бү атаархаг, харин Эзэнһээ бэшэржэ байг.

¹⁸ Ерээдүй саг гэжэ байха, этигэл найдабаришни таһархагүй.

¹⁹ Хүбүүмни соносо, сэсэн байха хэрэгтэй, зүрхэ сэдьхэлээ зүб харгыгаар шэглүүлэ.

²⁰ Үзэмэй дараһан архи үлүү уудаг, мяха хэтэрхүү эдидэг зоной дунда бү бай.

²¹ Ушарынь хадаа архинша болон мяханда хомхой үгырэн хооһорхо. Һула һуняагүй байбал, соорхой хубсаһатай үлэхэш.

²² Түрэһэн эсэгэеэ шагна, эхынгээ үтэлхэдэ үзэн ядажа бү бай.

²³ Үнэниие абаһан хойноо тэрээндэ бү урбаарай. Мэргэн ухаае, заабари хүмүүжэл, мэдэлгэ ухаа алдажа болохогүй.

²⁴ Үнэн шударга хүнэй эсэгэ үнэн зүрхэнһөө баясаха, сэсэ мэргэниие түрэһэн хүн тэрээндээ жаргана.

²⁵ Эхэ эсэгэшни жаргал эдлэхэ болтогой, түрэһэн эхэшни урма баяртай байха болтогой.

²⁶ Хүбүүмни, зүрхэ сэдьхэлээ намда үгэ. Нюдэеэ минии зам тээшэ шэглүүлэ.

²⁷ Янхан эхэнэр ба хүнэй забхай һамган уйтан амһартай гүнзэгы худагтал адли, тэрээн сооһоо абиржа гарахагүйш.

²⁸ Тэрэ дээрмэшэн мэтэ нэгэниие отожо, гэмтэ ябадалай тоо олошоруулдаг.

²⁹ Хэн сэдьхэлээ зобоноб? Хэн гэншэнэ ёолоно гээшэб? Хэн хэрүүл хэнэб? Хэн гомдоноб? Хэн шалтагаангүй шарха абанаб? Хэн улаан нюдэтэйб?

³⁰ Тэдэ үзэмэй дараһан архинда шунахайрагшад, архиин шоробто һанаатай бэдэрээшэд.

³¹ Архиин улааниие һайхашаан, аяга соо хөөһэрэн долгисохыень харахаяа боли, зөөлэхэнөөр зосоо орохыень тамшаахаяа боли.

³² Эсэстэнь тэрэ мүлхигшэ шэнги хазадаг, хорото могой шэнги хадхадаг.

³³ Нюдэншни ондоо эхэнэрнүүдые харадаг болохо, ухаан бодолшни һамуурха.

³⁴ Ши тэнгис далайн гүн соо унтахаа хэбтэһэндэл, онгосын далбагын модоной үзүүртэ нойрсоһондол болохош.

³⁵ Ши «Тэдэ намайе наншаа, наншаһыеньшье ойлгоогүйб, сохихо түлхихэдэнь намда үбшэнтэй бэшэл. Унтажа садаад, үнөөхиеэл уухаб даа» гэжэ хэлэхэш.