Һургаал 20 - Библи

Хоб үгэ тараажа бү бай

¹ Үзэмэй дараһан архи хүнэй ухаа балартуулдаг. Үлүүсэ уудаг хүн хэзээдэшье ухаатай байхагүй.

² Хаанай уур хилэн арсаланай хэрхирээнтэй адли. Тэрэниие уурлуулха гээшэ өөртөө муу һанаһантай адли.

³ Хэрүүл арсалдаанһаа зайлагшые хүндэлхөөр, харин тэнэгүүд хэрүүлдэ оролсоод лэ байдаг.

⁴ Залхуу хүн газараа үбэлдөө хахалдаггүй, хуряалгын үедэ юуншье тэрээндэ олдохогүй.

⁵ Хүнэй сэдьхэл һанаан гүнзэгы булаг мэтэ, ухаатай хүн тэрээнһээ удхажа абадаг.

⁶ Олон зон өөһэдыгөө үнэн сэхэб гэжэ һайрхадаг, теэд найдабаритай нэгэниие олохо аалши?

⁷ Үнэн шударга хүн гэм зэмэгүй ябадаг. Тиимэ хүнэй үри хүүгэд үреэлдэ хүртэнэ.

⁸ Хэрэг шүүлгын шэрээдэ һууһан хаан харасаараа хамаг муу зүйлые элирүүлдэг.

⁹ Хэн «Би зүб мүрөөр үйлэ хэнэб, нүгэл хилэнсэгһээ зайлааб» гэжэ хэлэжэ шадахаб?

¹⁰ Буруу шэгнэдэг шэгнүүрһээ, худалаар харуулдаг хэмжүүрһээ Эзэн зэбүүсэдэг.

¹¹ Өөрын үйлэ хэрэгүүдээр эдир залуушье һайн муугаа харуулдаг.

¹² Дуулаха шэхэн, хараха нюдэн – энээниие Эзэн бүтээгээ.

¹³ Унтаха дуратай һаа, үгырхэш. Сагаа ажалда гэжэ ашагла, тиигэбэл хоол хүнэһөөр элбэг байхаш.

¹⁴ Худалдан абагша «Энэш муу, тэрэш муу» гэдэг, абаад ябаһанай удаа тэрэнээ һайрхадаг.

¹⁵ Алта мүнгэн болон эрдэни зүүдхэл байбашье, ухаатай юумэ хэлэдэг аман бүришье үнэтэй.

¹⁶ Хари хүнэй үри шэриин түлөө харюусалга абаһан хүн самсаяа алдаха.

¹⁷ Буруу замаар оложо абаһан талхан амтатай байжа болохо юм. Гэбэшье эсэстээ аман соо хайр байжа болохо.

¹⁸ Түсэб зохёоходоо, зүбшэхэ хэрэгтэй. Мэргэн зүбшэлэй удаа дайлалда.

¹⁹ Суу тараадаг хүн нюуса задалдаг. Хоб шэрэдэг хүнтэй бү харилса.

²⁰ Эхэ эсэгэеэ хардаһан хүнэй амидаралай дэн унтарха.

²¹ Эхиндээ бэлэн олдоһон угай зөөри буян хэшэгтэй байхагүй.

²² «Хорон муугай түлөө хэһээхэм» гэжэ бү хэлэ. Эзэндэ найда, Тэрэ шамайе хамгаалха.

²³ Худал гиирнүүдһээ, зүб бэшэ шэгнүүрһээ Эзэн зэбүүрхэдэг.

²⁴ Хүнэй алхамуудые Эзэн шэглүүлдэг. Хүн өөрынгөө зам хэр мэдэжэ шадахаб?

²⁵ Тангариг түргэн үгөөд, удаань татагалзахань хүнэй хубида хабха юм.

²⁶ Сэсэн хаан муу нүгэлтэниие үлеэн һалгаха, дээрэнь тээрмын шулуу эрьюулхэ.

²⁷ Хүнэй һүнэһэ заяан хадаа тэрэнэй досоохиие үзэдэг Эзэнэй дэн юм.

²⁸ Этигэл ба үнэн хааниие хамгаалдаг, үнэн сэдьхэлээр хаан түрэ бэхижэдэг.

²⁹ Залуушуулые хүсэ шадалынь, үбгэдые буурал үһэниинь шэмэглэдэг.

³⁰ Муу бодолһоо хэһээлтэ зайлуулдаг. Хүнэй доторые сохилго сэбэрлэдэг.