Һургаал 2 - Библи

Сэсэн мэргэнэй үлүү ашагынь

¹ Хүбүүмни, ши минии хэлэхые хүлеэн абажа, минии заабари дотороо хадагалбал,

² сэсэн ухаанда анхаран шэхээ табижа, ухаан соогоо шүүжэ үзэдэг,

³ мэдэлгэеэ элсүүлэн, ухаан бодолдо түшэглэдэг,

⁴ тэрээниие сагаан мүнгэ мэтэ эрижэ, нюуса эрдэни мэтэ бэдэрдэг болобол,

⁵ Эзэнһээ бэшэрхые ойлгохош ба Бурхан тухай мэдэлгэ олохош.

⁶ Юуб гэхэдэ, Эзэн сэсэн мэргэниие үршөөдэг, Тэрэнэй аманһаа ухаан ба мэдэлгэ гарадаг.

⁷ Тэрэ сэбэр сэхэ ябадалтай зондо илалта, үнэн шударга ябагшын хубида халхабша болодог.

⁸ Тэрэ шударга ёһын зам хамгаалдаг ба Өөрын нангин гэгээнтэдэй зам һэргылдэг.

⁹ Тиин ёһото шүтэлгэ болон үнэн шударга ябадалые, һайхан замай сэхэ сэбэрые ойлгохош.

¹⁰ Сэсэн ухаан сэдьхэлдэшни орожо, ухаандаш мэдэлгэ таатай болоходонь,

¹¹ болгоомжол шамайе һэргылнэ ба ухааншни шамайе хамгаална.

¹² Энэнь шамайе муу замһаа, худалшаһаа зайлуулхын,

¹³ харанхын замаар ябаха гэжэ сэхэ замһаа хадуурһан хүнүүдһээ,

¹⁴ муу үйлэ хэхэдээ баярладаг, һальхай һамуугаар бахархадаг,

¹⁵ һарюу мурюу харгытай зонһоо ба зам төөригшэдһөө,

¹⁶ мүн хүнэй һамган аад, альбан үгөөрөө ондоо эрые бэедээ татадаг эмэнүүдһээ һалгахын түлөө юм.

¹⁷ Тэрэ эмэ эдир наһанайнгаа хани нүхэрые орхижо, Бурхантай хэлсээе мартаа.

¹⁸ Тэрэнэй үргөө – мүхэлгэ тээшэ, замынь – үхэгшэдэй һүнэһэн тээшэ.

¹⁹ Тиишээ ябаһан хүнүүдэй нэгэнииньшье эрьежэ ерэдэггүй ба амидаралай замда ородоггүй.

²⁰ Тиимэһээ ши һайн һанаатанай замаар ябажа, үнэн шударга хүнүүдэй зүргэ даха.

²¹ Үнэн сэдьхэлтэй хүн газар дэлхэй дээрэ ажамидарха, гэмгүй зон байһаараал байха.

²² Харин хара һанаатан дэлхэй дээрэ усадхагдажа, этигэл эбдэгшэ хүн газарай нюрууһаа һалгагдаха.