Һургаал 19 - Библи

Эхэ, эсэгэеэ хүндэлэ

¹ Мэхэшэ хуурмаг, тэрээн соогоо тэнэг хүнһөө үгытэй ядуу аад, үнэн шударга ябадаг хүниинь дээрэ.

² Мэдэлгэгүй байха гээшэ хүнэй хубида һайн бэшэ. Яаруу хүн хии гэшхэдэг юм.

³ Хүнэй тэнэг мунхагынь тэрэнэй замые балартуулдаг. Харин тэрэ гэмээ Эзэндэ тохон хилэгнэдэг.

⁴ Эд баялиг олон нүхэдые асардаг, ядуу хүниие найза нүхэрыньшье орхидог.

⁵ Хүниие хардагшада хэһээлтэ бууха. Худалша хүн зугадажа шадахагүй.

⁶ Изагууртантай нүхэсэхэ дуратайшуул олон. Бэлэг сэлэг үгэдэгтэй хүн бүхэн ханилха дуратай.

⁷ Ядуу хүниие аха дүүнэрыншье үзэн ядахадань, хани нүхэдэйнь хүйтэрэн холодохонь гайхалгүй. Үгэ хэлэн шарайшалхадань, тэдэнь олдохошьегүй.

⁸ Сэдьхэлээ хайрладаг хүн оюуниие бэдэрдэг. Сэсэн ухаае дээдэлдэг хүн һайниие олоно.

⁹ Хуурмаг гэршэ хэһээлтэдэ ороно. Худал хэлэдэг хүн мүхэхэ.

¹⁰ Һүрөөтэй гоё байдал тэнэг хүндэ таарахагүй. Тайжануудые богоол хүнэй зонхилходо бүришье зохидгүй.

¹¹ Ухаансар бодомжо хүниие тэсэбэритэй болгодог, гэм зэмэ хүлисэхэ гээшэ ехэ аша габьяа мүн.

¹² Хаанай уур хилэн арсаланай хэрхирхэтэй адли, тэрэнэй талархал ногоон дээрэ унаһан шүүдэр мэтэ.

¹³ Тэнэг хүбүүн эсэгын ядарал зоболон. Яршаг хэрүүлшэ эхэнэр оройн хушалтада гараһан нүхэндэ адли.

¹⁴ Гэр бууса ба эд хүрэнгэ эхэ эсэгэһээ хүртэдэг, ухаатай эхэнэр Эзэнһээ ерэдэг.

¹⁵ Залхуу хүн унтаанаг, нобшо хүн үлэсхэлэндэ нэрбэгдэнэ.

¹⁶ Зарлиг хуули сахидаг хүн сэдьхэлээ хамгаална. Харин өөрын зам тухай һанаа зободоггүй хүн үхэхэ болоно.

¹⁷ Үгытэй хүндэ харамнангүй үгэхэнь Эзэндэ зээлеэр үгэһэнтэй адли. Тэрэ хүнэй һайн үйлын түлөө Эзэн бусаажа түлэнэ.

¹⁸ Хүбүүгээ хэһээн хүмүүжүүлхэдээ, тэрээндэ һайниие хүсэнэ гээшэш. Тиигээгүй һаа, муу эсэстэ хүрэхыень хүсэнэ гээшэш.

¹⁹ Ууртай хүн хэһээлтэ амасаха зэргэтэй. Тэрэниие хэһээлтэһээ зайлуулбал, үшөө ехээр хэһээхэ хэрэг гараха.

²⁰ Заабари дуулажа, зэмэлэл хүлеэжэ абаха гээшэ хожомоо сэсэн бодолтой болохын шэнжэ.

²¹ Хүнэй зосоо олон һанаан байбашье, Эзэнэй түсэбөөр лэ болохо.

²² Үгэдөө найдамтай байха гээшэ сэгнэгдэдэг. Худалша хуурмагһаа үгытэй ядуу байһаниинь дээрэ.

²³ Эзэнһээ бэшэрэл ами наһа үршөөдэг: хүн муу юумэнһээ айнгүй амгалан унтадаг.

²⁴ Залхуу хүн табагта хэһэн гараа амандаа хүргэтэрөө залхууржа үрдинэ.

²⁵ Убайгүй баһамжалагшые хэһээбэл, гэнэн нэгэн ухаа орохо. Ухаатайе зэмэлбэл, тэрэ һургаал абадаг.

²⁶ Эсэгэдээ хэрзэгыгээр аашалжа, эхэеэ үлдэдэг хүн нэрэ хүндэеэ алдаһан, эшэгүүритэй зүдэг амитан мүн.

²⁷ Хүбүүмни, сахилгата һургаал шагнаагүй һаа, мэдэлгын үгэһөө холодохош.

²⁸ Худалаар гэршэлэгшэ үнэн шударгые доромжолдог. Хара нүгэлтэнэй хэлэһэниинь муу юумэ олошоруулдаг.

²⁹ Убайгүйдэ хэһээлтэ байха, мунхагай нюрга сохихо арга олдохо.