Һургаал 17 - Библи

Бурхан мунхагые тэбшэхэгүй

¹ Найрай хүндын эдеэгээр элбэг хэрүүлтэй гэрһээ тэнигэр оршондо хатаһан талханай хэлтэрхэй дээрэ.

² Бэрхэ зараса эзэнэй тулюур хүбүүе захиржа, аха дүүгэй дундахи хүрэнгэдэ хүртэнэ.

³ Галай дүлөөр мүнгэ алта хайлуулан сэбэрлэдэг. Эзэн хүнүүдэй сэдьхэл туршадаг.

⁴ Хорон һанаатан нүгэлтэнэй хара мэхэтэ хүүр шагнадаг. Худалша хүн эбдэн һүйдхэгшын үгэдэ анхардаг.

⁵ Ядуу хүниие баһамжалагша Бүтээгшые доромжолно. Гай тодхорто баясагша хэһээлтэ абаха.

⁶ Үтэлһэнэй жаргал аша гушанар болодог. Эсэгэ хүн хүбүүдэйнгөө һүр алдарынь болодог.

⁷ Уран үгэ мунхаг хүндэ тааранагүй, дээдэ изагууртанай худал хэлэхэнь бүришье зохисогүй.

⁸ Эдилгэ үгэдэг хүндэ тэрэнь шэдитэ шулуун шэнги. Хайшаншье эрьюулхэдэнь адли бариисатай.

⁹ Гомдохооһон хүниие хүлисэхэдөө нүхэртэй болохош. Харин гомдол тухай дахин һануулбал, анда нүхэрөө алдажа болохош.

¹⁰ Ухаатай хүниие зэмэлхэ гээшэ тэнэгые зуу дахин наншахаһаа дээрэ.

¹¹ Муу хүн гансал һамууралда эрмэлзэдэг. Эзэн тэрээндэ дошхон Эльгээмэлые заатагүй эльгээхэ.

¹² Мунхагтаа дашуурһан тэнэгтэй ушаранхаар гүлгэдөө төөриһэн баабгайтай уулзаһан дээрэ.

¹³ Һайниие муугаар харюулдаг хүнэй гэрһээ муу юумэн һалахагүй.

¹⁴ Хёморол хэрэлдээнэй эхин хадаа уһатай хаалтада нүхэ гаргаһантай адли. Даамжархаһаань урда хэрүүлээ тогтоогты.

¹⁵ Хара һанаатаниие зүб гэгшэ ба үнэн шударга хүниие буруушаагша хоёр Эзэнэй зэбүүрхэл адли түрүүлдэг.

¹⁶ Сэсэн мэргэниие худалдан абаха хүсэлгүй һаа, мунхагай гар дээрэ мүнгэн байгаад яагшаб.

¹⁷ Найза нүхэд ямаршье үедэ бэе бэеэ хайрладаг. Аха дүүнэр хэсүү сагта тулга болохын түлөө түрэдэг.

¹⁸ Ухаагаар хомор лэ хүн гар барин амалжа, хүршынгөө түлөө гар даагша болодог.

¹⁹ Хэрүүлдэ дуратай хүн гэм нүгэлдэшье дуратай. Бэеэ үлэмжэ дээгүүр абхуулхадаа, сүйдхэл эриһэн жэшээтэй.

²⁰ Хуурмаг хүн һайниие олохогүй. Хара мэхэтэй хүн зоболондо орохо.

²¹ Тэнэгые түрэһэн хүн өөртөө гашуудал асарна. Тэнэгэй эсэгэдэ баяр баясхалан байхагүй.

²² Сэдьхэлэй баяр баясхалан эмдэ адли туһатай. Уйдхарта абталга яһа хатааһан үбшэнтэй адли.

²³ Шударга байдалые забхайруулхын тулада муу хүн эдилгэ үбэртэлжэ ябадаг.

²⁴ Ухаатай хүнэй нюдэн саг үргэлжэ сэсэн бодол руу шэглээтэй. Тэнэгэй нюдэн – дэлхэйн заха руу.

²⁵ Тэнэг хүн эсэгын халаглал, түрэһэн эхын гуниг.

²⁶ Гэмгүй хүниие хэһээхэнь үнэн шударга түшэмэлые хэһээгшэтэй адли һайн хэрэг бэшэ.

²⁷ Үгэдөө хинамгай хүн мэдэлгэ ехэтэй, ухаатай хүн доро зүрхэтэй.

²⁸ Тэнэгшье һаа, шэмээгүй байхадаа мэргэндэ тоологдоно. Амаа хабшаад һуубалшни ухаатай гэжэ тоолохо.