Һургаал 16 - Библи

Хүнэй хүсэлэн – Бурханай табилан

¹ Хүсэл бодол хүндэ хабаатай, гэбэшье хэлэнэй харюу Эзэнһээ ерэдэг юм.

² Хүнэй хамаг зам өөрынь нюдэндэ зүб үзэгдэдэгшье һаа, Эзэн хүнэй сэдьхэл бодол туршадаг.

³ Ажал үйлэеэ Эзэндэ даалга – тиигэбэл, һанаһаншни бэелхэ.

⁴ Эзэн бүхы юумые зорилготойгоор бүтээгээ. Муу хүниие хэһээлгэ баһал Эзэнэй түсэбтэ ородог.

⁵ Бардам хүнүүдһээ Эзэн зэбүүсэдэг. Тэдэ эрхэ бэшэ хэһээлтэдэ хүртэдэг.

⁶ Этигэл ба үнэн гэмые сагаадхадаг. Эзэнһээ бэшэрэл хорон мууһаа холодуулна.

⁷ Хүнэй зам Эзэндэ таатай байбал, тэрэниие дайсадтайньшье эблэрүүлдэг.

⁸ Зүй бусаар олохо үлэмжэ ехэ оршоһоо зүб мүрөөр олохо багань дээрэ.

⁹ Хүн ухаандаа өөрын замые түлэблэн харадагшье һаа, Эзэн тэрэнэй алхаса шэглүүлдэг.

¹⁰ Хаанай үгэ Бурханай лүндэнтэй адли. Шүүхэ сагта тэрэнэй аманһаа алдуутай үгэ гараха ёһогүй.

¹¹ Зүб шэгнүүр ба хэмжүүр Эзэндэ хабаатай. Уута соо байһан гиирнүүд мүн лэ Тэрээнһээ.

¹² Хаанай шэрээ үнэн шударгада түшэглэдэг ушарһаа хорото муу ябадалтай холбогдохонь хаанай хубида жэгшүүритэй муухай хэрэг болоно.

¹³ Хаан үнэн ёһоной үгэнүүдые шагнаха дуратай. Үнэниие яридаг хүниие хаан хайрладаг.

¹⁴ Хаанай уур хилэн үхэлэй элшэ мэтэ, харин сэсэн хүн тэрэниие зөөлэрүүлдэг.

¹⁵ Хаанай сэлмэг харасада амидарал бии. Тэрэнэй эбигээл анхарал хабарай бороо мэтэ.

¹⁶ Алта абагшаһаа мэргэн ухаае олохонь үлүү. Бодото мэргэн ухаа абахань мүнгэнһөө үлүү үнэтэй.

¹⁷ Үнэн сэдьхэлтэй хүнүүдэй зам хадаа өөрыгөө хорото мууһаа холодуулха ябадал. Өөрынгөө зам анхаралтай ажагладаг хүн амияа хамгаална.

¹⁸ Һүйдхэлэй урда бардамлал ябадаг, бүдэржэ унахын урда дээрэлхүү зан ябадаг.

¹⁹ Бардам зонтой олзо хубаанхаар даруу зантай үгытэй зоной дунда байхань дээрэ.

²⁰ Хүнэй үгэ дууладаг хүн ажана тайбаниие олоно. Эзэндэ этигэгшэ хүн үреэл олохо.

²¹ Сэсэн хүн болгоомжотой гэдэг. Болгоомжотой зөөлэнөөр дуугардаг хүн һайнаар ойлгуулна.

²² Сэсэн ухаан тэрэниие эзэмшэһэн хүндэ амидаралай унда асарна. Харин тэнэг мунхагай һургаалынь мунхаглал юм.

²³ Сэсэн хүнэй сэдьхэлынь амаяа һургадаг, тэрэнэй хэлэһэниинь анхармаар.

²⁴ Һайн үгэнүүд зүгын балтай һархинаг шэнги. Тэрэнь сэдьхэлдэ амтатай ба яһанда эмтэй.

²⁵ Хүндэ зүб мэтэ һанагдаха түгэсхэлынь үхэл руу хүтэлдэг зам байдаг.

²⁶ Хүдэлмэришэ хүнэй үлэсхэлэн байдалынь тэрэниие хүтэлдэг.

²⁷ Яндан золиг муу юумэ сэдьхэдэг, тэрэнэй үгэ шатаадаг гал мэтэ.

²⁸ Муу һанаатай хүн хэрэлдээ үүсхэдэг, хоб тараагша хүн нүхэдые һалгаадаг.

²⁹ Хорон һанаата нүхэдөө уруу татажа, буруу замаар хүтэлдэг.

³⁰ Нюдөөрөө эмнидэг ба уралаа зуудаг хүн муу юумэ сэдьхэдэг.

³¹ Буурал толгой алдарай титим юм. Тэрээниие зүб ябадалаар олодог.

³² Тэсэбэритэй хүн зоригтойһоо дээрэ. Бэеэ барижа шададаг хүн хотые эзэлэгшэһээ дээрэ.

³³ Үбэрһөө жээрэб татаашье һаа, шиидхэбэринь Эзэнһээ ерэдэг.