Һургаал 13 - Библи

Оюун ухаан – амидаралай эрилтэ

¹ Хүбүүнэй сэсэн эсэгын һургаалһаа гарадаг, харин һэнгэргүй хүн зэмэлэл шагнадаггүй.

² Хэлэһэн үгынгөө үрэ жэмэсһээ һайханииень хүн амасадаг. Харин хуули эбдэгшэд хүсэрхэлөөр амидардаг.

³ Хэлэ амандаа болгоомжотой хүн амяа хамгаалдаг. Харин шашаг хүниие гай тодхор хүлеэхэ.

⁴ Залхуу хүнэй хүсэхэ һанаха юумэн биишье һаа, хүртэхэ гэжэ байхагүй. Харин ажалша хүнэй хүсэл бэелдэг.

⁵ Зүб ябадалтай хүн худал хуурмагые үзэн ядадаг. Харин хуулигүй хүн эшэгүүритэй гутамшаг зүйл хэдэг.

⁶ Зүб ябадал гэмгүй хүниие үмэглэн хамгаалдаг. Нүгэлтэнэй хара ябадал өөрыень нэрбэн сохидог.

⁷ Зөөригүй аад, баян хэбэртэй болодог хүнүүд байдаг. Баян аад, өөрыгөө ядуу болгодог хүн байха.

⁸ Баялигынь хүнэй ами наһа аршалдаг. Харин ядуу хүн тиимэ аюул ойлгохогүй.

⁹ Зүб шударга хүнэй дэн хурсаар гэрэлтэдэг, харин хуулигүй зоной гэрэл мүхэдэг.

¹⁰ Бэеэ дээгүүр абхуулдаг зан гансал хэрэлдээндэ асардаг. Заабари шагнадагынь сэсэн байна.

¹¹ Хуурмагаар олоһон эд зөөри түргэн хородог. Хүсэлжэ олоһон баялиг арбижадаг.

¹² Удаан хүлеэгдэһэн этигэл найдабари гуниг түрүүлдэг. Бэелһэн хүсэл амидаралай модон мэтэ.

¹³ Зарлиг шагнадаггүй хүн өөртөө хохидол асардаг. Зарлигһаа айдаг хүн шагналда хүртэнэ.

¹⁴ Сэсэн хүнэй һургаал ами оруулдаг, үхэлэй зангаһаа холодуулдаг.

¹⁵ Ухаатай хүниие зон хүндэлдэг. Харин этигэл найдабари эбдэгшын зам хүндэ.

¹⁶ Сэсэн хүн юумэ хэхын урда бодожо үзэдэг. Тэнэг хүн тэнэг мунхагаа һайрхадаг.

¹⁷ Муу элшэн зоболондо унана, этигэлтэй элшэ илалта асарна.

¹⁸ Һургаал сахидаггүй хүн ядарал гутамшагта ороно, зэмэлэл шагнаһан хүн аша туһа абана.

¹⁹ Бэелһэн хүсэл баяр асардаг. Харин тэнэг хүн мууһаа холодохоһоо жэгшэн айдаг.

²⁰ Сэсэнтэй ябагша сэсэн болоно. Харин тэнэгтэй нүхэсэгшэ зоболон амсана.

²¹ Гай тодхор нүгэлтэниие дахадаг. Үнэн шударга хүнэй шагнал дэбжэлтэ мүн.

²² Һайн хүн үри хүүгэдтээ зөөри үлөөдэг. Нүгэлтэнэй эд баялиг үнэн шударга хүнэй түлөө хуряагдадаг.

²³ Ядуу хүнэй таряаланда ехэ ургаса гаражашье болодог. Хуулигүй байдал тэрэниие хосороохо.

²⁴ Һабаагаар шэрбэхэеэ дүмэдэг хүн үнэн дээрээ хүбүүгээ хайрланагүй. Дуратай хүн багаһаань хэһээн хүмүүжүүлдэг.

²⁵ Үнэн шударга хүн эдеэндэ садаһан байдаг. Хуулигүй хүнэй гэдэһэн ходол хооһон.