Һургаал 11 - Библи

Ниитын журамшаһан ёһо

¹ Алдуутай шэгнүүр Эзэнэй зэбүүсэл түрүүлдэг, зүбөөр шэгнэлгэ Тэрэнэй һанаанда таараха.

² Дээрэлхүү зантай хүн нэрээ хухална, даруу зантай хүн сэсэн ухаатай болодог.

³ Сэхэ сэбэр хүнүүдые үнэн шударга байдал хүтэлдэг, хара һанаатай зониие хуурмаг байдалынь һүнөөдэг.

⁴ Эзэнэй шүүн хараха үдэртэ баялиг ямаршье туһа болохогүй. Харин үнэн шударга хэрэгүүд үхэлһөө абарха.

⁵ Сэхэ сэбэр хүниие зүб байдалынь тэгшэрүүлдэг, харин хара һанаатан өөрын муу һанаанһаа һандардаг.

⁶ Сэхэ хүниие үнэн шударга байдалынь абарна. Харин этигэлгүй хара һанаатан үйлэдэһэн муу хэрэгтээ баригдаха.

⁷ Нүгэлтэ хүнэй үхэлтэй сугтаа этигэл найдабаринь мүхэдэг, тэрэнэй зөөридэ найдалгань таһаран хосордог.

⁸ Үнэн шударга хүн тодхорһоо мултардаг, нүгэлтэй муу тэрэнэй орондонь ородог.

⁹ Һүзэггүй хүн амаараа хүршэдөө хоро хүргэдэг, харин үнэн хүниие мэдэлгэнь абарна.

¹⁰ Үнэн хүнэй дэбжэлтэдэ хотын зон булта баясана, хорон һанаатын мүхэхэ сагта баяр хүүр баһал болодог.

¹¹ Үнэн шударга хүнэй үреэлөөр хото суурхадаг, нүгэлтэнэй хэлэһэниинь хотые доройтуулжа болодог.

¹² Ухаа муутай хүн хүршэдөө үзэн ядаһанаа мэдүүлдэг, мэргэн хүн дуугай байдаг.

¹³ Задагай аматай хүндэ нюуса юумэ хэлэжэ болохогүй, харин этигэхээр үнэн хүн нюуса барижа шададаг.

¹⁴ Ударидалга муутай арад түмэн унадаг, харин олон бэрхэ зүбшэлэгшэдтэй зон абарагдадаг.

¹⁵ Хари хүнэй түлөө гар даагша хүн үнэхөөрөө зобоно, харин даалга абаагүй хүн аюулгүй байна.

¹⁶ Нигүүлэсхы сэдьхэлтэй эхэнэр зоной хүндэдэ хүртэдэг. Удамаршад баялиг олоно.

¹⁷ Буянтай хүн сэдьхэлээ тэдхэдэг. Хэрзэгы шэрүүн хүн сэдьхэлдээ зоболон асардаг.

¹⁸ Нүгэлтэй хүн хуурмаг шагнал олоно, харин үнэн шударга хүн ёһотой шагналда хүртэнэ.

¹⁹ Шударга үнэниие дахагша амидаралда хүрэнэ. Хорото мууе дахагша өөрын үхэл тээшээ яарана.

²⁰ Забхайрһан сэдьхэлтэй хүн Эзэнэй зэбүүсэл түрүүлдэг. Гэмгүй хүн Тэрэнэй талархалда хүртэдэг.

²¹ Хара һанаатан зайлашагүй хэһээлтэдэ орохо. Харин үнэн шударга хүнэй үрэ удамынь сүлөөлэгдэхэ.

²² Уймар эхэнэрэй сэбэр гоёнь гахайн хоншоорто зүүһэн алтан гарьха мэтэ.

²³ Үнэн шударга хүнэй хүсэлэй бэелэл үргэлжэ һайхан, харин хоротой хүнэй хүсэл Эзэнэй хилэнсэдэ асардаг.

²⁴ Зөөриеэ хубаан тараажа байдаг хүнэй зөөри нэмэжэ байха, тиихэдэнь харамнадаг хүн үгырхэ ушар байха.

²⁵ Элбэг гартай, харуу бэшэ хүн зөөритэй байха, бусадые тэнхэрүүлэгшэ өөрөө тэнхээ орохо.

²⁶ Таряагаа нюужа нөөсэлэгшэ зоной хараалда хүртэнэ. Харин тэрэнээ худалдаһан хүн үреэл абана.

²⁷ Һайниие үйлэдэхэ гэжэ оролдоһон хүн аша хайрада хүртэхэ, мууе бэдэрэгшэдэ тэрэнь олдоод байха.

²⁸ Гансал баяндаа найдагша хүн унаха. Үнэн шударга хүн ургажа байһан ногоон набша мэтэ һалбарха.

²⁹ Өөрын гэртэ гай тодхор ушаруулдаг хүн хооһон үлэдэг. Тэнэгынь сэсэ мэргэнэй зараса болохо.

³⁰ Үнэн шударга хүнэй үрэ жэмэс хадаа амидаралай модон болоно. Сэсэн хүн зоной сэдьхэл өөр тээшээ татана.

³¹ Үнэн шударга хүн хүртэхэ ёһотойгоо энэ дэлхэй дээрэ хүртэдэг һаань, хара һанаатан ба нүгэлтэн хэды дахин үлүү харюуда хүртэхэ ушартай.