Һургаал 1 - Библи

Һургаалай үнэ сэн

¹ Израилиин хаан, Давидай хүбүүн Соломооной һургаал.

² Энэ хадаа зондо мэргэн ухаа ба сахилта һургаал мэдэжэ абахыень, ухаатанай хэлэһэн гүнзэгы бодолтой үгэнүүдые ойлгохынь тулада,

³ болгоомжотой нарин, үнэн ёһоной, шударга, сэхэ сэбэр ябадалай ёһо гуримда орохынь тулада;

⁴ гэнэн хүндэ ухаансар долонгирые, эдир залууда эрдэм, бодолготой холын хараа олгохын тулада үгтөө юм.

⁵ Сэсэн мэргэн хүн шагнажа, мэдэлгэеэ арьбажуулха, ухаатайшье зон зүбшэл заабари тэрээнһээ олохо.

⁶ Хүнүүд үгүүлэлэй далда удхые, һургаал үгэ, сэсэшүүлэй уран үгэ ба тэдэнэй таабаринуудые ойлгодог болохо.

Муу зонһоо һэргылэлгэ

⁷ Эзэнһээ бэшэрхэ гээшэ сэсэн мэргэн ухаанай эхин юм. Харин мунхаг тэнэгүүд лэ сэсэн ухаае, һургаал заабариие үзэн ядадаг.

⁸ Хүбүүмни, эсэгынгээ һургаал шагнажа бай, эхынгээ заабари тоонгүй бү бай.

⁹ Үнэн дээрэ энэшнил үзэсхэлэнтэ сэсэгэй титим, хүзүүнэйшни шэмэг бололтой.

¹⁰ Хүбүүмни, нүгэлтэнэй шинии толгойе эрьюулхэдэнь, үгэдэнь орожо бү байгаарай.

¹¹ Тэдэнэй шамда: «Бидэнтэй яба, гэмгүй нэгэниие отожо һүнөөе.

¹² Үхэлэй орон мэтэ амидыгаар ба доогуур нүхэн мэтэ бүхэлеэрнь залгин һалгая,

¹³ үнэтэй зөөрииень сүм хуряажа, гэрээ баялигаар дүүргэе.

¹⁴ Бидэнтэй хамта жээрэб хаяарай, хүрэнгэ зөөриеэ хамта эдлэхэбди», – гэжэ хэлэбэл,

¹⁵ хүбүүмни, тэдэнтэй суг бү ябаарай, нүгэлтэй зоной харгыһаа дары зайлаарай.

¹⁶ Тэдэ зоной хүлнүүд муу тээшэ зоридог, тэдэнэр шуһа урдахуулха гэжэ яарадаг.

¹⁷ Шубуунай хараһаар байтар урдань урьха табиһантай адли хэрэг бэзэ.

¹⁸ Харин тэдэ өөһэдын шуһа урадхуулха, өөһэдын ами хороохо урьха тодхоно гээшэ.

¹⁹ Хүсэрхэн оложо абаха юумэнэй түлөө ябагшадай замынь тиимэ. Тэрэ эд зөөриинь эзэрхэн абагшын ами наһые эсэстээ абажа һаладаг.

Сэсэн мэргэнэй уряа

²⁰ Сэсэн мэргэн гудамжа талмайнуудта зарлан дуулгажа,

²¹ олон зоной үмэнэ, хотын хашаагай үүдэнэй хажууда үгэеэ тунхаглана:

²² «Гэнэн мунхаг таанар, хэды болотор гэнэнээ энхэрэн хайрлахабта? Хэды болотор убайгүй зон убайгүйгөө урдаа барихаб? Хэды болотор тэнэгүүд мэдэлгэ үзэн ядахаб?

²³ Анхарагты, минии зэмэлэл шагнагты, би таанарта сэсэн ухаанай һүр һүлдэһөө дуһаан хүртөөхэм, тиин хэлэхэ үгэеэ хэлэхэм.

²⁴ Минии дуудахада, таанар буруу хараат, гараа һарбайхадам, хэншье анхараагүй.

²⁵ Бүхы заабаринуудһаамни арсаат, шүүмжэлгэнүүдыемни шагнаагүйт.

²⁶ Харюудань таанарай гай тодхорто баярлахам гээшэ; дээрэтнай бууһан аймшаг зоболон харан эльгэ хатахаб.

²⁷ Таанар руу аймшаг зоболон аадар шэнги адхарха, гай тодхор шуурган мэтэ сохижо бууха. Үзэгдөөгүй гашуудал, ядарал тархи дээрэтнай бууха.

²⁸ Тэрэ үедэ намайе дуудахада, харюу байхагүй. Тэдэ намайе бэдэрхэдээ, олохогүй.

²⁹ Тэдэнэр мэдэлгэ үзэн ядажа, Эзэнһээ бэшэрхэ гэжэ байгаагүй.

³⁰ Минии заабари тоогоогүй, минии зэмэлэл хайхараагүй.

³¹ Тиин тэдэ өөрын үйлэһөө хэһээлтэ амсаха болоно.

³² Гэнэн мунхагууд өөрын үсэдһөө хосорхо табилантай. Тэнэгүүдэй алмайрал тэдэниие һүнөөхэ.

³³ Харин намайе шагнадаг хүн аюулгүй байжа, гай тодхорһоо айнгүй амгалан тайбан һууха».