Һошээ 6 - Библи

Израильшууд гэмшэнэ

¹ Арад зон зоболон гасаландаа ядажа, иигэжэ хэлэжэ эхилхэ: «Эзэндээ бусая! Тэрэ бидэниие дайраа, тиигээ хадаа аргалжа шадаха; Тэрэ маанадые шархатуулаа, тиигэбэл, шархануудыемнай эдэгээхэ.

² Хоёр үдэрэй удаа Тэрэ маанадые амидыруулха, гурбадахи үдэрынь бидэ бодожо эхилхэбди, тиигээд Тэрэнэй хажууда ажамидаран байхабди.

³ Зай, иигээд Эзэниие мэдэхэеэ эрмэлзэдэг болоё. Тэрэнэй залархань үүрэй толон мэтэ яг сагтаа, газар дайдые уһалдаг бороо мэтэ Тэрэ заларжа, маанадые һэргээхэл».

Израильшууд Эзэнтэй баталһан хэлсээгээ эбдэбэ

⁴ Харин Эзэн иигэжэ үгүүлбэ: – Израиль болон Иуда, таанадта Би юу хэхэбиб? Танай үнэн шударга байдал үглөөнэй манан, түргөөр хатадаг шүүдэр мэтэ.

⁵ Тиимэһээ Би лүндэншэдөөр дамжуулан, айладхал үгөөрөө таанадые усадхан байгааб. Тиимэһээ Минии шүүбэри шиидхэбэри задаран байгаа үүрэй толон мэтэ яларжа байгаа.

⁶ Намда тахил тахихын орондо бусад зондо үршөөл хайратай байхатнай Намда хэрэгтэй. Намда түгэс шатаалта үргэл асархын орондо Намайе мэдэдэг зон байхатнай хэрэгтэй.

⁷ Адаамдал адли таанад хэлсээ эбдэжэ, Намда урбаат.

⁸ Галаад хадаа муу зоноор, алууршадаар дүүрэнхэй хото мүн.

⁹ Хүниие агнан отожо аладаг дээрмэшэдтэл санаартадай бүлэг Шэхээм руу ошодог харгы зам дээрэ зониие алажа, муу муухай хэрэг үйлэдэдэг.

¹⁰ Би Израиль соо жэгтэй муухай юумэ харанаб: арад зомни онгонуудта мүргэжэ байнал!

¹¹ Иудын арад зон, танайшье хюдуулха саг ерэхэ. Израилиин арад түмэнөө баряанһаа Би бусаахаб.