Һошээ 5 - Библи

¹ Санаартад, энээниие шагныта! Израилиин улад зон, соносогты! Хаанай гэр бүлэ, шэхээ табигты! Таанадые шүүн, заргада оруулхань! Ушар юуб гэхэдэ, таанад Мицпаада болон Табоорто улад зондо занга табижа байгаат.

² Тэдэ забхайрһанай гүнзэгы нүхэндэ унаа. Тиимэһээ Би бултыень хэһээхэб.

³ Израиль, Би шам тушаа бүхы юумэ мэдэнэб. Ши Намһаа буруу хаража, ондоо бурхадта мүргэжэ байнаш.

⁴ Хэжэ байгаа хэрэгүүдынь Бурхандаа дахин тэдэнэй эрьен ерэхые табинагүй. Онгонуудта мүргэхэ гээшэнь досоонь байһан зандаа, Эзэниие тэдэ мэдэнэгүй.

⁵ Израилиин зоной дээрэлхүү зан өөһэдтэнь мууе хэнэ. Хэһэн нүгэлһөө боложо Израиль бүдэрэн унаха, Иудашье тэрээнтэй хамта унаха.

⁶ Эзэндэ хони, үхэр тахил болгон үргэхэеэ тэдэ ошохо, Эзэниие бэдэрхэ, теэд олохогүй. Эзэн тэдээнһээ холодоо.

⁷ Эзэндэ тэдэ урбаа, үхи хүүгэдынь өөрынь бэшэ. Тиимэһээ мүнөө тэдэ газар уһантаяа хамта һандаргаагдахань.

Израиль Иуда хоёр хоорондоо дайлалдана

⁸ Гибаада үхэр бүреэгээр үлеэжэ, һэргылһэн дохёо үгэгты! Рамаада бүреэ дуугаргагты! Бэньямиинэй зон, Бэт-Аавэндэ добтолгын тэмдэг үгэгты!

⁹ Хэһээлтын үдэр Израилиин газар үрэжэлгүй, амигүй хооһон болохо! Энээниие хэхэб гэжэ Израилиин обог бүхэндэ дуулганаб!

¹⁰ Иудын ноёд Израилиин газар уһанай хилын тэмдэгүүдые хүдэлгэжэ, газар өөһэдтөө хулгайлан абана. Тэдээндэ уурлажа, уур хилэнгээ уһан мэтэ тэдээн дээрэ адхахаб.

¹¹ Израиль гайтай ехэ сохилто абанхай. Ондоо бурхадта мүргэһэнэйнь аша энэл даа!

¹² Израилиие хибэн мэтэ химэлэн һалгаахаб, Иудые модоной хорхой мэтэ эдин үгы хэхэб!

¹³ Израиль үбшэ хабшангаа ойлгоходоо, Иуда шарха ярануудаа харахадаа, Ассири руу ошожо, асари ехэ хүсэ шадалтай хаанһаа туһа эрибэ. Теэд тэрэ танай шарха, үбшэнгые эдэгээжэ шадахагүй.

¹⁴ Арсаландал адляар Би Израилиин арадта, Иудын уладта добтолон орохоб. Тэдэниие таһа татан, шэрэн абаашажа байхадам, хэншье тэдэниие Намһаа абаржа шадахагүй!

¹⁵ Тэдэнэй өөрынгөө гэм мэдэржэ, Намайе бэдэржэ эхилтэр Би тэдээн тушаа мартаад, огтолон орхёод байхаб.