Һошээ 14 - Библи

Израиль, Эзэн Бурхандаа эрьеыш!

¹ Минии урдаһаа буһалгаалһанайнгаа түлөө Самари усадхагдаха. Улад зониинь һэлмээр сабшагдаха, нарай нялхануудынь тэһэ хаюулагдаха, хээлитэй эхэнэрнүүдынь хаха зүһэгдэхэ.

² Израилиин улад зон, Эзэн Бурхандаа эрьеыт! Нүгэл шэбэлтнай таанадые бүдэрүүлэн унагаажа байна.

³ Эзэндээ эрьежэ, үгэнүүдээ зорюулан, иигэжэ хэлыт: «Нүгэлымнай арюудхыт, зальбаралыемнай дуулыт! Найдуулһанайнгаа ёһоор, бидэ Таниие магтан байхалди.

⁴ Ассири маанадые абархагүй, дайнай моридто һуугаашье һаа, абарагдахагүйбди. Манай бурхад гэжэ онгонуудые бэшэ нэрлэхэгүйбди. Эзэмнай! Үншэн хэнзэ маанартаа энэрэл хайраяа бэлэглыт!»

Эзэн Израилиие дахин һалбаруулан мандуулха, элбэг дэлбэгээр үршөөхэ

⁵ Эзэн иигэжэ айладхана: Өөрын арадые һөөргэнь бусаахаб, үнэнхэ зүрхэнһөө тэдэндэ дурлахаб. Би тэдээндэ бэшэ уурлахагүйб.

⁶ Хатаһан газарые уһалһан бороодол адли Би Израильда болохоб. Тиихэдэм тэрэ сарнай сэсэгтэл һалбаржа, Ливаанай үнэтэ мододтол бүхэ үндэһэтэй болохо.

⁷ Мүшэрынь һаглагар-саглагар боложо, оливадал адли һайхан болохо, Ливаанай үнэтэ хушадал адли анхилма үнэр хангалтуулха.

⁸ Минии хамгаалалта доро тэдэ дахин ажаһуудаг болохо, үрэжэл ехэтэй таряандал, жэмэс олон уһан үзэмэй модондол, Ливаанай үзэмэй дараһан архидал адли алдар суутай болон байха.

⁹ Израилиин улад зон онгонуудта бэшэ мүргэхэгүй. Би тэдэнэй гуйлтануудыень дуулажа, тэдээн тушаа һанаа табин байхаб. Жэлэй дүрбэн сагта ногоорон байдаг модондол, Би тэдэниие аршалан хамгаалан байхаб, үршөөл хайраяа бэлэглэхэб.

Түгэсхэл

¹⁰ Энээниие ойлгохо сэсэн мэргэн ухаатай хэн байнаб? Энээниие мэдэхэ ухаан түгэлдэр хэн бииб? Эзэнэй харгы зам зүб. Залан сэхэ һайн зон тэрэ харгыгаарнь ябадаг, харин нүгэлтэйшүүл бүдэрэн унадаг юм.