Һошээ 13 - Библи

Израиль, ши усадхагдааш, – хэн Минии урдаһаа гаража, шамда туһалхаб?

¹ Эпрааимай обогой зоной үгэ хэлэхэдэ, бусад обогуудай улад зон шэшэрэлдэн айжа байдаг бэлэй. Эпрааимайхид бусадта хүндэтэй һэн. Теэд тэдэ Баалда шүтэжэ, нүгэл үйлэдэжэ, хосоржо байна.

² Мүнөө тэдэ нүгэлөө бүри олошоруулба: дархашуулай гараар өөһэдын тухайлһанай ёһоор мүнгэн онгонуудые урлуулба. Тиигээд тэдэ эдэ онгонуудта тахил үргэгты гэжэ хэлэнэ.

³ Энээнэйнгээ түлөө тэдэ үглөөнэй манан, түргэн хатадаг шүүдэр, таряа сохиходо гарадаг мэхиинэ, соргоор бааяһан утаан мэтэ үгы болохо!

⁴ Теэд Би, Эзэн Бурхантнай, Египедэй газар дайдаһаа таанарые абарааб. Таанад Намһаа бэшэ ондоо бурхадта мүргэхэ ёһогүйт. Намһаа бэшэ ондоо бурхан таанадые абархагүй.

⁵ Хатаһан хуурай газарта Би таанад тушаа һанаагаа табин байгааб.

⁶ Үрэжэлтэй һайн газар олоходоо, таанад садхалан боложо, бардамлажа эхилээт, тиигээд Намайе мартаат.

⁷ Арсалан мэтэ Би таанадта добтолхоб! Ирбэс мэтэ таанадые амадан, харгы замдатнай хэбтэхэб.

⁸ Гүлгэдөө алдаһан эмэ баабгайдал тэдээн руу добтолхоб, яһа ууһыетнай хухалан удара татахаб, эмэ арсаландал залгихаб, хээрын амитад тэдэниие таһа татахал.

⁹ Израиль, ши өөрыгөө һалгаалши даа! Намайе түшэг тулгуубарим гэжэ ойлгоогүйш.

¹⁰ Хааниие болон удамаршадые эреэ бэлэйш, теэд тэдэ яагаад улад зонииеш абаржа шадахаб?!

¹¹ Уур сухал дундаа Би таанадта хааниие үгөө һэм, бушаганаһан сухалайнгаа үедэ тэрэниие танһаа таһалан абааб.

¹² Израилиин зоной нүгэл болон гэмынь хэмһээ ехэ болоо, тиигээд бүрин бүтэн зандаа хадагалаатай байна.

¹³ Эхын умайһаа гарахаяа арсажа байгааша үхибүүндэл Израиль тэнэг хонгор байна. Теэд тэрэ гэмээ амасаха.

¹⁴ Үхэлэй оронһоо таанадые Би абархагүйб, үхэлһөө мултаруулхагүйб. Ай, Үхэл, зоболонгуудшни хаанаб? Үхэл, хадхуураараа зониие хадхан алыш, бултыень усадхыш! Би энээн тушаа оройдоошье халаглахагүйб.

¹⁵ Бусад обогуудта орходоо Эпрааим үнэр олоншье хадаа, зүүн зүгһөө бодоһон һалхинда, сүл губиһаа Минии эльгээһэн һалхинда тэрэнэй үрэжэл хаташаха, булагынь шэргэхэ. Би үнэтэ сэнтэй юумэ нөөсэлһэн һангыень хооһолхоб.