Һошээ 12 - Библи

¹ Израилиин арад зон бүхэли үдэрөө хэндэшье хэрэггүй ажал хэнэ. Худал хуурмаг ябадал, хархис муухай хэрэгүүд үдэр бүри олошорно. Ассиритэй тэдэ хэлсээ батална, Египет руу оливын тоһо абаашана».

² Иудын улад зониие Эзэн гэмнэжэ, зарга шүүбэридэ оруулха. Тэрэ мүн лэ Яковай үринэрые хэһэн хэрэгүүдэйнь хэмээр гэмыень амасуулха.

³ Яков эхын умайда үшөө байхадаа ахаяа мэхэлээ. Тиигээд томо болоходоо, Бурханай урдаһаа тулаба.

⁴ Бэт-Ээлдэ тэрэ Бурханай Эльгээмэлтэй тулалдажа, диилээ һэн. Бурханһаа үреэл эрижэ, тэрэ уйлан-хайлан байгаа бэлэй. Тиихэдэнь Бурхан маанадта зарлигаа айладхаа һэн.

⁵ Энэ хадаа Түмэн Сэрэгтэ Эзэн Бурхан мүн, ой ухаанда хадуугдаха нэрэнь Эзэн мүн!

⁶ Тиимэһээ ши Бурхандаа буса. Үнэн сэхэ, шударга бай, Бурхандаа хододоо найда!

⁷ Эзэн иигэжэ айладана: «Ханаһаанай зондол адли, Израилиин арад худал шэгнүүрээр зониие мэхэлхэ дуратай байна.

⁸ Бидэ баямди, олон зөөритэйб, тиигээд хэншье намайе нүгэл хэжэ, эдэ бүгэдые үбэршэлөө гэжэ хэлэжэ шадахагүй гээд тэдэ хэлэнэ.

⁹ Теэд Би, Египедһээ эхилэн таанадые дахуулан байгааша Эзэн Бурхантнай, сүл губида таанадай байрлаһандал адляар, майхангуудта таанадые байрлуулхаб.

¹⁰ Би лүндэншэдтэ айладхаа бэлэйб, үзэгдэлнүүдые олоор үзүүлээб, лүндэншэдөөр дамжуулан, арадта һэргылтэнүүдые эльгээгээб.

¹¹ Галаад угаа нүгэлтэй болоо, энэ һандаралаар дүүрэхэ. Гилгаалда буруудые үргэл болгон үүсэлээ, теэд үргэлэй тэдэ шэрээнүүд таряалангай хажуугаар байгша шулуун мэтэ һандаргагдан хаа-хаанагүй хаягдаха».

¹² Яков Араамай талмайнууд руу тэрьедэн ошожо, һамга абахын тула хони адуулан байгаа.

¹³ Египедтэхи богоол ядуу байдалһаа Израилиин арад түмэниие абархын тула Эзэн лүндэншөө эльгээгээ, лүндэншөөр дамжан, арадаа харууһалаа һэн.

¹⁴ Израилиин арад зон Эзэниие угаа уурлуулаа, аламаар хэрэгүүдые хээ. Тиимэһээ Эзэн доромжолһонойнь түлөө өөһэдыень усадхаха.