Һошээ 11 - Библи

Израилиин үшөө үхибүүн байхада, Би тэрэниие хайрлан энхэрээб

¹ Эзэн иигэжэ айладхана: Израилиин эдир залуу байхада Би тэрээндэ дуратай бэлэйб, тиигээд Египедһээ Би Өөрынгөө Хүбүүе дуудааб.

² Теэд Минии дуудаха бүри тэрэ Намһаа буруу хаража байгаа. Минии арад түмэн Баалнуудта үргэл үргэжэ, онгонуудта уталга ууюулжа байгаа бэлэй.

³ Би Израилиин арад түмэниие Өөрын гар дээрэ абаад, хүлдэ оруулан һургаа бэлэйб. Теэд тэдэ Намайе арагалжа байна гэжэ ойлгоогүй.

⁴ Хүн шэнгеэр, эелдэр зөөлэнөөр тэдээнтэй хөөрэлдэжэ, амыень ангайлгажа, эдеэ хоол үгэдэг һэм.

⁵ Намда бусахын орондо тэдэ Египедтэ этигэнэ, тиимэһээ мүнөө Ассири тэдэниие хааншалан байха.

⁶ Дайн дажар хотонуудынь дайража, хаалгануудынь унагааха, муу муухай һанаатай байһанайнгаа түлөө тэдэ хосорхо.

⁷ Тэдэ Намһаа буруу хараһан зандаа. Тэдэ шангабди гээд һанана, теэд энэнь туһагүй.

⁸ Израиль, Би шамтай юу хэхэбиб, яагаад шамда урбахабиб? Адмаада яагаад хандаа һэнбиб, Цэбоһиимдо юу хээ һэнбиб, тон тиимээр шамтай хандаха гүб? Иимэ юумэ хэхыем сэдьхэлни тэбшээнэ, Би тэдэниие угаа ехээр хайрланаб!

⁹ Уур сухал дундаа иимэ юумэ хэхэгүйб, Израилиин арад түмэниие усадхахагүйб, юуб гэбэл, Би хүн бэшэ, таанадай дунда арюун Бурхан гээшэб! Би хото руу орохогүйб!

¹⁰ Минии арад түмэн хойноһоом дахан ябаха. Арсаландал Би архиран, дайсадынь һүрдөөхэб. Минии арад зон баруун зүгһөө шэшэрэлдэн бусаха.

¹¹ Тэдэ шубуудтал адли хөөрсэгэнэн-шэшэрэн, Египедһээ, тагтаануудтал Ассириин газарһаа бусаха. Тиихэдэнь Би тэдэниие гэр руунь оруулан һуурижуулхаб. Энэ болбол Би, Эзэн, айладхана мүн!

Эзэн Яковай, Эпрааимай болон Иудын үри һадаһадтай заргалдана

¹² Эзэн иигэжэ айладхана: «Израилиин улад Намайе тойруулан худал хуурмаг үгэ, мэхэ гохо дэлгэнэ. Иуда Минии, арюун Бурханай, урдаһаа һөөргэдөө.