Һошээ 10 - Библи

Эзэн Израилиин хаан орониие эсэстэнь хүргэнэ

¹ Израиль хадаа угаа олон жэмэстэй һаглагар уһан үзэмэй модон мэтэ. Гэбэшье тэрэ хэды олон жэмэстэйб, тэды ехээр үргэлэй шэрээнүүдые олошоруулна. Газар дайдань хэды ехэ үрэжэлтэйб, тэды ехээр тэрэ мүргэдэг модонуудаа шэмэглэнэ.

² Урбадаг зүрхэ сэдьхэлтэйшүүл хэһээгдэхэ. Бурхан тэдэнэй үргэлэй шэрээнүүдые һандаргаха, мүргэдэг модонуудыень бута сохихо.

³ Эдэ зон удахагүй иигэжэ хэлсэхэ: «Эзэнһээшье бидэ айгаагүйбди. Хаанһаашье айхагүйбди, тэрэ маанадта юу хэжэрхихэб даа».

⁴ Дэмы хооһон үгэнүүдые тэдэ хэлэнэ, хэлсээ баталхадаа хуурмаг тангариг үргэнэ. Таряалангай хажуугаар бии болодог хоротой зэрлиг ургамалдал адляар зарга шүүбэри энээнэйнь түлөө бии болохо.

⁵ Бэт-Аавэндэ шудхаһан алтан бухынгаа түлөө Самариин арад түмэн шэшэрэлдэн айха, бархиралдаха. Онгоноор омогорходог санаартад тэрээн тушаа гашуудажа эхилхэ. Юуб гэхэдэ, ялагар толон тэрэ онгонһоо бэшэ гарахаяа болихо.

⁶ Тэрэ онгон Ассири руу хаанда бэлэг болгон абаашагдаха. Израиль иигэжэ эшхэбтэр байдалда орохо юм.

⁷ Уһанай хөөһэн мэтээр Самариин хаан үгы болохо.

⁸ Израилиин нүгэл – зоной хариин бурхадта мүргэдэг Авээнэй обоонууд үгы хэгдэхэ. Тэндэхи үргэлэй шэрээнүүд дээрэ адаалхай һөөгүүд ургажа эхилхэ, тэдэ шэрээнүүд «Маанадые хушыт» гэжэ хада улануудта, «маанад дээрэ уныт» гэжэ гүбээнүүдтэ хандаха.

Израилиин бүхы хэрэмүүд һандаргагдаха

⁹ Эзэн иигэжэ айладана: – Гибаада нүгэл хэһэнһээ бүри ехээр Израилиин зон нүгэл үйлэдэжэ эхилээ. Гибаада урдаһаатнай эхилһэн дайн таанадые юундэшье һургаагүй!

¹⁰ Дураараа Би тэдэниие хэһээхэб. Бусад арадууд урдаһаань тулаха, дабхар гэм хэһэнэй түлөө тэдэ баригдаха.

¹¹ Таряа сохихо ажалда һурамхи гунжан үнеэн мэтэ Израиль. Би Өөрөө һайхан хүзүүн дээрэнь хөөмэгшэ тохохоб, хүндэ ажалда хүдэлүүлхэб. Иудые газар хахалха, Яковые борнойлхо ажалда зарахаб.

¹² Шэнэ газар хахалжа, үнэн сэхын ургамал тарибал, энэрэл хайра хуряан абахат. Эзэндэ эрьежэ, Тэрэниие бэдэрээ һаатнай, залархадаа, Тэрэ бороо мэтээр үнэн сэхые таанад дээрэ адхахал.

¹³ Таанад муу муухайе ургуулан байгаат, үнэн шударга бэшые хуряажа абанат. Худал хуурмагаар ургуулагша эдеэгээ эдин байнат. Юуб гэбэл, таанад дайшалхы тэргэнүүдтээ, олон сэрэгшэдтээ найдаһан байгаат.

¹⁴ Хүл үймөөн арад зонойтнай дунда үзэгдэжэ, дайн дажарай нэгэ үдэр Бэт-Арбээлые Шалмаанай һандаргаһандал, эхын хүүгэдтэеэ хамта алуулһандал, танай хэрэм хотонууд һандаргагдаха.

¹⁵ Бэт-Ээлэй арад зон, иимэл юумэн таанадтай тохёолдохол даа, юуб гэхэдэ, таанад жэгшүүритэй муу муухай хэрэгүүдые хэнэт. Үүр сайжа байхада Израилиин хаан алуулха.