Һошээ 1 - Библи

¹ Уззияа, Ётаам, Ахааз, Хэзэкияа гэгшэдэй Иудын хаашуул, Ехоһаашай хүбүүн Еробоһаамай Израилиин хаан байха үе сагта Бээриигэй хүбүүн Һошээдэ Эзэнэй дамжуулһан үгэнүүд эдэ мүн.

Забхай ябадалтай Гоомэр һамган болбол урбагша Израилиин дүрэ мүн

² Эзэн Һошээдэ анха түрүүн айладхажа эхилхэдээ, иигэжэ захирһан байна: – Энэ арад зон янхан эхэнэртэл адли угаа ехээр забхайран, Намһаа хадуураад байна. Яба, өөртөө забхай, үнэн шударга бэшэ эхэнэрые һамга болгон аба. Иимэрхүүл хүүгэдтэй болохош.

³ Һошээ ошоод, Диблааһимай басаган Гоомэрые һамга абаба. Гоомэр хээлитэй боложо, тэрээндэ хүбүү түрэбэ.

⁴ Эзэн Һошээдэ хандан: – Тэрээндэ Езрээл гэжэ нэрэ үгэ. Юуб гэхэдэ, Езрээлдэ Еһүү хаанай хэһэн алалга-хюдалгын түлөө Би өөрынь үринэрые удахагүй үгы хэхэб!

⁵ Тэрэ үдэр Езрээлэй нюрууда Израилиин хүсэтэ сэрэгые бута сохихоб, – гэбэ.

⁶ Удаань һамганиинь дахин хээлитэй боложо, басага түрэбэ. Эзэн Һошээдэ: – Басагандаа Ло-Рухамаа гэжэ нэрэ үгэ. Юуб гэхэдэ, Израилиин уладые Би бэшэ хайрлажа, хүлисэжэ байхагүйб.

⁷ Харин Иудын арад зониие хайрлахаб. Би, Эзэн Бурханиинь, тэдэниие абархаб. Гэбэшье дайн дажар – һурша номо, һэлмэ, морин сэрэг эндэ хэрэглэхэгүйб.

⁸ Ло-Рухамаае хүхэнһөө гаргаһанай удаа һамганиинь дахин хээлитэй боложо, үшөө нэгэ хүбүү түрэбэ.

⁹ Эзэн Һошээдэ айладхаба: – Тэрээндэ Ло-Аммии гэжэ нэрэ үгэ. Юуб гэбэл, Израилиин арад зон Минии бэшэ, Би тэдэнэй Бурхан бэшэб.

Нэгэдэһэн Израилиин хаан ороной һэргээгдэхэ тухай лүндэн табилга

¹⁰ Гэбэшье Израилиин арад зоной тоо далайн элһэн мэтэ хэмжэжэ тоолохын аргагүй болохо. Таанад Минии арад бэшэт гэжэ хэлэгдэһэн эгээл тэрэ һууринда тэдэнэр амиды Бурханай үхибүүд гэжэ нэрлүүлхэ.

¹¹ Иудын болон Израилиин улад зон хамтаржа, өөһэдтөө нэгэ удамаршые шэлэжэ табиха, өөрын газар уһанда бусаха. Энэ болбол Езрээлэй агууехэ үдэр болохо!