Гэршэлгэ 5 - Библи

Ном бэшэг, Үргэлэй Хурьган

¹ Тиигээд долоон тамгаар тамгалан хаагаатай, дотор, гадаргүй бэшээтэй номые хаан шэрээдэ Һуугаашын баруун гартань харабаб.

² Түгэлдэр хүсэтэ Эльгээмэлые харабаб. – Хэн тамгыень эбдэжэ, энэ ном нээжэ шадахаб? – гэжэ тэрэ Эльгээмэл шангаар дуугарба.

³ Теэд тэнгэридэшье, газар дээрэшье, газар дорошье энэ номые нээжэ, хаража шадаха хэншье байбагүй.

⁴ Энэ номые зүйтэйгөөр нээгээд, уншажа шадаха, угайдхадаа үзэжэ хаража шадаха нэгэшье хүнэй олдоогүйдэнь би ехээр гашуудан уйлааб.

⁵ – Бү уйла! Харалши! Илаашань Иудын угай, Давидай үри һадаһан болохо Арсалан тээ тэрэ байна. Долоон тамгыень эбдэжэ, энэ номые Тэрэл нээжэ шадаха, – гэжэ нэгэ ахамадынь намда хэлэбэ.

⁶ Харан гэхэдэмни хаан шэрээгэй урда дүрбэн амитадай, мүн ахамадуудай урда тахил болгогдон табигдаһан янзатай Үргэлэй Хурьган зогсожо байба. Тэрэ Хурьган долоон эбэртэй, долоон нюдэтэй. Эдэнь бүхы газар дэлхэйдэ Бурханай эльгээһэн долоон һүлдэнь байгаа.

⁷ Үргэлэй Хурьган хаан шэрээдэ дүтэлэн ерэжэ, тэндэ Һуугаашын баруун гарһаань ном абаба.

⁸ Номые Тэрэнэй абахадань, дүрбэн амитад, хорин дүрбэн ахамадууд Үргэлэй Хурьганай урда һүгэдэн, доро дохибо. Тэдэнэр тус бүридөө нэгэ нэгэ ятагануудые, хүжэ санзай дүүрэтэр хэһэн алтан аягануудые гартаа баряад байгаа. Эдэ бүгэдэнь Бурханай зоной бүтээдэг мүргэл зальбаралынь мүн бэлэй.

⁹ Тиин тэдэнэр иимэ шэнэ дуу дуулаба: Та энэ ном абажа, тамгыень эбдэжэ тайлаха эрхэтэйт, Та үргэл болгогдожо алуулаад, Өөрынгөө улаан шуһанай сэнгээр али бүхы угсаатаниие, элдэб янзын хэлэтэй зониие, бүхы уг изагууртаниие, үндэһэ яһатаниие Бурханда абажа үгөөт.

¹⁰ Та манай Бурханай аша туһада тэдэ хүнүүдые санаартад, хаашуул болгоот – тэдэнэр газар дэлхэйн зониие зонхилжо байха!

¹¹ Хаан шэрээе, амитадые, ахамадуудые тойроод, олон Эльгээмэлнүүдэй дуугаржа байхые би харааб, шагнааб. Тэдэнэр үй түмэн, тоо томшогүй олон байгаа.

¹² Тэдэ шанга шангаар иигэжэ хашхаралдаа: Тахил болгогдожо табигдаһан Үргэлэй Хурьган засаг түрэ, зөөри баялиг, сэсэн бодол, хүсэ шадал, нэрэ түрэ, алдар соло, магтаал юрөөлдэ хүртэхэ эрхэтэй.

¹³ Тэнгэри, газар дээрэ, газар доро, далайда байһан бүхы амитадай иигэжэ хэлсэхые би дуулааб: – Хаан шэрээ дээрэ Һуугаашада, мүн Үргэлэй Хурьганда хэтэ мүнхын магтаал юрөөл, нэрэ хүндэ, алдар соло, хуули засаг олгогдохонь болтогой!

¹⁴ Дүрбэн амитадынь: – Болтогой! – гэбэд. Ахамадуудынь газарта дохин унажа, һүгэдэн мүргэбэ.