Гэршэлгэ 10 - Библи

Гартаа багахан ном бариһан Эльгээмэл

¹ Удаань үүлэ нэмэрһэн бата хүсэтэй ондоо нэгэ Эльгээмэлэй тэнгэриһээ буужа ябахые харабаб. Толгой дээгүүрнь һолонго татанхай, нюур шарайнь наран шэнги, хоёр хүлынь гал баханануудтал адли.

² Дэлгээтэй багахан ном тэрэнэй гарта байба. Тиигээд баруун хүлөө далай дээрэ, зүүн хүлөө газар дээрэ табиба.

³ Тиигээд Эльгээмэл арсаланай хэрхирһэндэл шангаар хашхарба. Тиихэдэнь долоон аянганууд өөһэдынгөө абяагаар дуугаралдаба.

⁴ Тиигэжэ дуугаралдахадань, юумэ бэшэхэеэ бэлдээд байгааб, теэд: «Долоон аянгануудай хэлээшые бү бэшэ, нюугаад бай», – гэжэ тэнгэри дээрэһээ хэлэхые дуулабаб.

⁵ Далай дээрэ, газар дээрэ байхыень минии хараһан Эльгээмэл баруун гараа огторгой өөдэ үргэбэ.

⁶ Огторгой тэнгэриие, газар дэлхэйе, уһан далайе, тэндэхи бүхы юумэнүүдые заяаһан хэтэ мүнхэдөө Амидаран мандагшын алдар нэрээр тэрэ Эльгээмэл иигэжэ тангариглан хэлэбэ: «Саашадаа удааруулагдахагүй.

⁷ Теэд долоодохи Эльгээмэлэй бүреэгээ дуугаргахадань, Бурханай нюуса түсэб бүрин бэелүүлэгдэхэ. Бурхан энэ түсэб тухай Өөрынгөө зарасанар-лүндэншэдтэ урид мэдээсэһэн байгаа».

⁸ Удаань тэнгэриһээ дуулдаһан абяан дахин намда хандажа: «Далай газар хоёрой дээрэ зогсожо байһан Эльгээмэлһээ дэлгээтэй ном ошожо аба», – гэбэ.

⁹ Би тэрэ Эльгээмэлдэ ошожо, дэлгээтэй номыень эрибэб. Тэрэ намда иигэжэ хэлэбэ: «Энэ ном абаад эдижэрхи. Хото гэдэһэндэшни гашуун байха, теэд аман соошни зүгын бал шэнги амтатай байха».

¹⁰ Эльгээмэлэй гарһаа номыень абаад эдижэрхибэб. Аман доторни ороходоо, зүгын бал шэнги амтатай байһанаа, харин тэрэ номоо эдихэдэмни, хото гэдэһэн соомни ехэ гашуун байгаа.

¹¹ Тиигээд Эльгээмэл намда иигэжэ айладхаа: «Ши олон ондоо арадууд, үндэһэ яһатан, элдэб янзын хэлэтэй зон, хаашуул тухай урид мэдэжэ, дахин саашадаа абарал буулгадаг болохош».