Гэршэлгэ 1 - Библи

Энэ ном соо юун тухай хэлэгдэнэб

¹ Һаяар юун болохоёо байнаб гэжэ бүгэдыень зарасанартаа харуулхын тула, Иисүүс Христоосой гэршэлгые Бурхан Тэрээндэ даалгаа. Христоос Өөрынгөө зараса Иоаннда Эльгээмэлые ябуулжа, энээн тухай соносхоо.

² Иоанн хараһан үзэһэнөө бултыень үнэн зүб гэжэ баталба. Энэнь Бурханай үгэ, Иисүүс Христоосой гэршэлгэ мүн.

³ Энэ ном дотор бэшээтэй Бурханай хэлэһэн үгэнүүдые уншадаг, шагнадаг ба сахидаг хүнүүд жаргалтай, юуб гэхэдэ, саг ойртожо байна.

Һүзэглэгшэдэй бүлгэмүүдые мэндэшэлгэ

⁴ Аси можын һүзэглэгшэдэй долоон бүлгэмүүдтэ би Иоанн ханданаб. Бурхан бии, байһаншье, байхашье юм. Бурханһаа, Тэрэнэй хаан шэрээгэй урдахи долоон Һүлдэнүүдһээ,

⁵ мүн үнэн бодото Гэршэ байһан, үхөөд, анха түрүүн амидырһан, газар дэлхэйн хаашуулай Эзэн бологшо Иисүүс Христоосһоо таанадта амгалан байдал, буян хэшэг үршөөгдэнэ. Иисүүс Христоос манда дуратай, тиимэһээ Өөрынгөө шуһа адхажа, бидэниие нүгэлһөөмнай сүлөөлөө.

⁶ Иисүүс Христоос бидэниие хаан түрэ дотор нэгэдүүлээд, Эсэгэ Бурхандаа алба хэдэг санаартаниинь болгоо. Иисүүс Христоосто хэтэ мүнхын алдар соло, эршэ хүсэн байхань болтогой!

⁷ Хаража байгты: үүлэн соогуур Тэрэ ерэхэ. Бүхы хүнүүд, мүн жадаар хадхаашадшье Тэрээниие хараха. Газар дэлхэйн бүхы арадууд Тэрээниие шаналан хайрлаха. Үнэхөөрөө тиихэ. Болтогой!

⁸ «Би хадаа Альфа, Омега гээшэб!» – гэжэ Эзэн Бурхан хэлэнэ. Тэрэ хододоо байгаа, байнашье, байхашье, Хамагые зонхилогшо мүн.

Амидырһан Иисүүсые Иоанн хараба

⁹ Би Иисүүсэй шаби, Иоанн ахатнай гээшэб. Бурханай хаан түрын эрхэтэн мүн туладаа би таанартал адляар зобон тулижа, тэбшэн тэсэжэ байнаб. Бурханай үгэ номноһонойнгоо, Иисүүсые гэршэлһэнэйнгээ түлөө би Патмос гэжэ олтирогто сүлэгдөө һэм.

¹⁰ Эзэнэй үдэр би Арюун Һүлдын нүлөөдэ абтабаб – ара тээмни бүдүүн дуутай бүреэ шэнги юумэнэй хүнхинэтэр дуугархые дуулабаб.

¹¹ Тэрэ абяан намда иигэжэ хэлэбэ: – Хаража байһан юумэеэ ном соо бэшээд, Эфесэй, Смирнын, Пээргэмэй, Тиатирай, Сардисай, Филадельфиин, Лаодикиин һүзэглэгшэдэй бүлгэмүүдтэ эльгээлши.

¹² Намтай хэн хөөрэлдэнэб гэжэ һонирхон гэдэргээ эрьехэдээ, алтан долоон дэнгүүдые харабаб.

¹³ Долоон дэнгүүдэй дундань Хүн түрэлхитэнэй Хүбүүнтэй адлирхуу Хүнэй зогсохые харааб. Тэрэ болбол уужам ута хубсаһатай, сээжээрээ бооһон алтан бэһэтэй һэн.

¹⁴ Тэрэнэй үһэниинь сагаанаар будаһан нооһондли, саһан шэнги саб сагаан, нюдэниинь дүлэтэн носожо байһан гал шэнги байгаа.

¹⁵ Хүлнүүдынь шатама халуун пеэшэндэ халаажа улайлгаһан зэд шэнги, хоолойнь хүүюур уһан мэтэ хүнхинэжэ байгаа һэн.

¹⁶ Тэрэ хүн баруун гартаа долоон одонуудые баринхай, хоёр тээшээ хурса эритэй элдэ аманһаань бултайнхай, шарайнь шатама шанга гэрэлтэй наран шэнги байгаа.

¹⁷ Тэрэниие харамсаараа, би үхэһэн шэнгеэр хүлэйнь хажууда унашабаб. Тиихэдэмни Тэрэ баруун гараа мүрэ дээрэмни табяад, намда иигэжэ хэлэбэ: – Бү ай; Би хадаа Түрүүшынхинь, Һүүлшынхинь гээшэб,

¹⁸ Би амидыб; үхөөд байһанаа мүнөө хэтэ мүнхэдөө амиды ябахаб; үхэлэй ба үхэлэй ороной түлхюурнүүдынь Намда бии.

¹⁹ Ши юу хараабши, мүнөө ямар юумэн боложо байнаб, хожом юун болохоб – энээн тухай ши бэшээрэй.

²⁰ Минии гартаа баряад байхые шинии хараһан долоон одонуудай, алтан долоон дэнгүүдэй нюусань иимэ: долоон одонууд һүзэглэгшэдэй долоон бүлгэмүүдэй Эльгээмэлнүүд мүн, шинии хараһан долоон дэнгүүд һүзэглэгшэдэй долоон бүлгэмүүд мүн гээшэ.