Гашуудал 3 - Библи

א Алээп

א Алээп

¹ Бурханай уур сухалай баягһаа гай зоболон үзэһэн хүн би мүн.

² Тэрэ намайе туужа, шэб харанхы руу оруулаа.

³ Иигээд Тэрэ намайе дахин дахин, үдэр бүри сохино.

ב Бээт

ב Бээт

⁴ Мяхан бэе, арһым Тэрэ таһа татаа, яһым буталаа.

⁵ Намайе баряанда абажа, гашуудал, зоболонгоор хүреэлөө.

⁶ Намайе харанхы руу оруулаа. Би хадаа хүүр соо байгааша үхэһэн хүн мэтэб.

ג Гиимэл

ג Гиимэл

⁷ Гарахаар бэшээр намайе ханаар хүреэлөө, хүндэ гэнжээр гэнжэлээ.

⁸ Би хашхарнаб, бархирнаб, теэд Тэрэ минии зальбарал дуулаха дурагүй.

⁹ Минии зам дээрэ Тэрэ хана бодхоогоо, харгыем хаагаа.

ד Даалэт

ד Даалэт

¹⁰ Отожо байгааша баабгай шэнги, олзоёо харууһалагша арсалан мэтэл!

¹¹ Тэрэ намайе төөрюулээ, харгыһаам хадууруулаа, намайе гансаарым хаяа!

¹² Тэрэ һурша номоо татажа, годлиёо нам руу шэглүүлээ.

ה Һээ

ה Һээ

¹³ Һаадагайнгаа годлинуудаар минии бөөрэ харбаа.

¹⁴ Өөрын арад түмэнэй дунда би шоодбори нэгэн болооб, тэдэ үдэр бүри нам тушаа хэлээ бүлюудэнэ.

¹⁵ Тэрэ намайе бог үбһөөр хооллуулаа, гашуун ундаар ундалуулаа.

ו Ваав

ו Ваав

¹⁶ Шүдыем шулуугаар түүрүүлээ, амыем үнэһөөр дүүргээ.

¹⁷ Амидарални бэлэгүй болоо, баяр гээшые би мартааб.

¹⁸ «Хүсэ шадални, Эзэндэ найдални һалаа!» гэжэ би хэлээб.

ז Заайин

ז Заайин

¹⁹ Минии зобожо, тулижа байһые һаныт! Бог шорой, гашуун һүлһэн – минии хубита.

²⁰ Энээниие зүрхэ сэдьхэлни бата хадуунхай, зоригни мүхэнхэй.

²¹ Харин зүрхэ сэдьхэлдээ харюумни, найдални энэ:

ח Хээт

ח Хээт

²² «Эзэнэй хайра дууһаагүй, энэрэл хайрань эсэслээгүй.

²³ Үглөө бүри тэдэ мандана! Үнэнтнай агууехэ!»

²⁴ «Эзэн – минии хуби мүн, тиимэһээ Тэрээндэ найданаб!» гэжэ минии сэдьхэл хэлэнэ.

ט Тээт

ט Тээт

²⁵ Өөртэнь найдадаг зондо, Өөр руунь тэгүүлэгшэдтэ Эзэн һайнаар хандадаг.

²⁶ Эзэн абарха гэжэ абяа шэмээгүй хүлеэжэ байгааша хүндэ һайн байха.

²⁷ Эдир наһанһаа эхилэн, өөрын тээбэри өөрөө даагаад ябадаг хүндэ һайн.

י Ёд

י Ёд

²⁸ Тэрэ хүн гансаараа абяагүй һууна, юуб гэхэдэ, тээбэринь Эзэнһээ сэхэ даалгагданхай.

²⁹ «Найдал үшөө бии аалам?» гэжэ тэрэ амаа газарта шоройдон мүргэнэ,

³⁰ сохижо байгааша хүндэ хасараа табин үгэнэ, угаа ехээр баһуулна даа!

כ Каап

כ Каап

³¹ Үгы, Эзэн хэтэдээ орхёо бэшэ!

³² Зоболон эльгээшье һаа, агууехэ энэрэл хайраараа Тэрэ үршөөхэ.

³³ Юуб гэбэл, миин байхаһаа, ямаршье ушар шалтаггүй зониие хэһээнэ, гашуудуулна бэшэл.

ל Лаамэд

ל Лаамэд

³⁴ Харин дэлхэй дээр баряанда байгшадые хүлөөрөө дэбһэн үдьхэлжэ байхые,

³⁵ Дээдэ Бурханай урда хүниие буруу шүүбэрилжэ байхада,

³⁶ зарга шүүхэдэ хүниие мэхэлжэ байхада, Эзэн энээниие харанагүй юм аал?!

מ Мээм

מ Мээм

³⁷ «Эзэнэй захираашьегүй юумэн боложо магад» гэжэ хэн хэлэхэб?

³⁸ Дээдэ Бурханай зарлигаар гай гасалан, амар амгалан болодог бэшэ юм аал?

³⁹ Тиимэһээ нүгэл хэһэн аад, зоной шууялдахань юуштэб?

נ Нүүн

נ Нүүн

⁴⁰ Замаа бэдэржэ туршая, Эзэндэ эрьее!

⁴¹ Тэнгэридэ оршодог Бурханда зүрхэ сэдьхэлээ, гараа һунгая!

⁴² Бидэ хадуураабди, һөөргэдөөбди, Та маанадые хүлисөөгүйт.

ס Саамэх

ס Саамэх

⁴³ Уур сухалаар бушаганан, маанадые намнаат, хайра гамгүй хюдаат.

⁴⁴ Зальбаралымнай дуулахагүйн тула Та Өөрыгөө үүлээр халхалаат.

⁴⁵ Арадуудай дунда бидэниие жэгшүүритэй шабартай худхаат.

פ Пээ

פ Пээ

⁴⁶ Дайсаднай бултадаа маанадые залгихаар амаа ангайгаа.

⁴⁷ Һүрдэмэ аймшаг болон нүхэн, үгытэлгэ болон һандарал – манай хуби.

⁴⁸ Нюдэнһөөм нёлбоһод горхон мэтэ урдана – арад түмэнэйм басаган хосоржо байна!

ע Аайин

ע Аайин

⁴⁹ Нюдэнһөөм урдажал-урдажал байна, юуб гэбэл, һатааруулха юумэн үгы.

⁵⁰ Эзэнэй огторгойһоо харатар, анхартар иигэжэл байха.

⁵¹ Хотынгоо басагадые харахадаа, зүрхэ сэдьхэлни үбдэнэ.

צ Цадээ

צ Цадээ

⁵² Ямаршье гэмгүй шубуу барихаар забдаһандал дайсадни минии хойноһоо агнажа байна.

⁵³ Амидыгаар намайе нүхэн руу хаяа, шулуугаар дараа.

⁵⁴ Толгойем уһан хушаба, «һалааб!» гэжэ би хашхарбаб.

ק Кооп

ק Кооп

⁵⁵ Эзэн, Танай нэрые гүнзэгы нүхэн сооһоо дуудан дурданаб.

⁵⁶ Намайе соносыт, зальбаралдам, ёолоондом шэхээ бүглөөд бү байгыт!

⁵⁷ Дуудахадам, Та дүтэлөөт, «Бү ай» гэжэ айладаат.

ר Рээш

ר Рээш

⁵⁸ Та намайе абараат, ами наһым аршалаат.

⁵⁹ Эзэн, минии гомдол харанат, хэрэгым шүүбэрилэн шиидхыт!

⁶⁰ Дайсадайм угаа хэрзэгые, намтай юу хэхэеэ һанаһыень Та мэдэнэт.

ש Шиин

ש Шиин

⁶¹ Намайе шоо үзэжэ байхыень, намтай юу хэхэеэ һанаһыень Та харанат.

⁶² Дайсад намайе үдэр бүри хараажа, баһажа байна.

⁶³ Харыт: тэдэ һуужа байна гү, зогсожо байна гү, – хамаагүй, бултадаа намайе наада барижа байна.

ת Таав

ת Таав

⁶⁴ Эзэн, хэһэн хэмээрнь тэдээндэ харюулыт!

⁶⁵ Ухааень төөрюулыт, хараалаа тэдээндэ шэнгүүлыт!

⁶⁶ Эзэн, уур сухалаар бушаганан, тэдэниие мүрдыт, огторгой дороһоо үгы хыт!