Гашуудал 2 - Библи

א Алээп

א Алээп

¹ Оо, гай даа! Уур сухал дундаа Эзэн Сионой басагые шэб харанхыгаар хүреэлөө. Израилиин гоо һайханиие огторгойһоо газар руу шэдээ. Уур хилэнтэ үдэртөө нангин үргөө тухайгаашье мартаа.

ב Бээт

ב Бээт

² Эзэн Яковай гэр байрануудые хайра гамгүй хюдаа, уур хилэн дундаа Иудын бүхэлэлтэнүүдые усадхаа, хааниие болон түшэмэлнүүдые бузарлаа, газар руу шэдээ.

ג Гиимэл

ג Гиимэл

³ Бушаганаһан сухал дундаа Израилиин бүхы хүсэ шадалые үгы хээ. Гарынь дайсанһаа аршалхаа болёо. Тойроод бүхы юумэ залгидаг галдал Яковые шатаан дүрэлзөө.

ד Даалэт

ד Даалэт

⁴ Эзэн дайсандал һурша номоо татаа, дайсан мэтэ, һэлмэ гартаа баряа, нюдэндэ таатай бүхы юумэ усадхаа! Тэрэ Сионой басаганай майхан руу уур хилэнгээ гал дүлэн мэтэ адхаа!

ה Һээ

ה Һээ

⁵ Эзэн дайсан шэнги болоо, Израилиие усадхаа, ордонгуудынь һандаргаа, бүхэлэлтэнүүдынь ниса сохёо, Иудын нютаг орониие гай гашуудал, бархираагаар дүүргээ.

ו Ваав

ו Ваав

⁶ Тэрэ сэсэрлигтэхи үбһэн майхан мэтээр Өөрын үргөөе һалгаа, суглаанай газараа һандаргаа. Эзэн Сиондо һайндэрнүүдые болон амаралтын үдэрнүүдые мартуулаа, уурлан, хааниие болон санаартаниие буруушаагаа.

ז Заайин

ז Заайин

⁷ Тэрэ үргэлэй шэрээгээ буруушаагаа, нангин үргөөһөө буруу хараа. Эзэн Сионой бүхэлэлтэнүүдые дайсадта эзэлүүлээ. Дайсад мүнөө Эзэнэй нангин үргөө соо шууялдана, мүнөө тэдэнэй һайндэр гээшэ!

ח Хээт

ח Хээт

⁸ Эзэн Сионой ханануудые һандаргааха гэжэ шиидээ, газартай адли болгоно, эсэхэ сусахаяа мэдэхэгүй һалгаана. Бүхэлэлтэ болон хананууд гашуудана, гай гасаланда нэрбэгдээ.

ט Тээт

ט Тээт

⁹ Бартаанууд газарта унаа, Тэрэ шэбхыень сохижо унагаагаа. Хаан болон түшэмэлнүүд баряанда туугдан ошоо, һургаал эбдэгдээ. Лүндэншэдтэ Эзэнһээ үзэгдэл эльгээгдэнэгүй.

י Ёд

י Ёд

¹⁰ Сионой аха захатан шэмээгүй газарта һууна, толгойдоо үнэһэ сасаа, гашуудалай шэрүүн хубсаһа үмдөө. Иерусалимай басагад толгойгоо газар руу гунхуулаа.

כ Каап

כ Каап

¹¹ Нёлбоһодһоо боложо һохор болонхойб, доторни хабданхай, арад түмэнэйнгөө хосоржо байхада, бага хүүгэдэй үлдэжэ-хооһоржо, хотын үйлсэнүүдтэ үхэжэ байхада зүрхэмни хахаран байна.

ל Лаамэд

ל Лаамэд

¹² «Эдихэ эдеэ, ууха унда үгыт!» гэжэ тэдэ эхэнүүдээ гуйна, хотын үйлсэнүүдтэ согсо мэтэ амяа табижа хэбтэнэ, эхэнүүдэйнгээ гар дээрэ аалихан үнгэржэ байна!

מ Мээм

מ Мээм

¹³ Иерусалим! Шамда юу гэжэ хэлэхэбиб, юунтэй жэшээлхэбиб? Сионой басаган, шамайе юунтэй сасуулха, яажа һатааруулхабиб? Гай зоболоншни тэнгис далайдал хизааргүй. Хэн шамайе аргалжа шадахаб?

נ Нүүн

נ Нүүн

¹⁴ Лүндэншэдшни шамда дэмы юумэ, худал хэлэжэ байгаа, шинии нүгэлнүүдые буруушаагаагүй, баряанда туугдан ошохыешни болюулаагүй. Тэдэ шамда худал хуурмаг үгэнүүдые хэлэжэ, туугдан ошохо туйлдаш хүргөө.

ס Саамэх

ס Саамэх

¹⁵ Харгыгаар үнгэржэ ябаашад шамайе хаража, гараараа занган, эшхэржэ, толгойгоо һэжэржэ, «Угаа һайхан хото, дэлхэйн баяр баясхалан гэжэ нэрлэдэг хото энэ гээшэ гү?!» гэжэ Иерусалим тушаа хэлэхэ.

פ Пээ

פ Пээ

¹⁶ Иерусалим, дайсадшни шамда хараал эльгэжэ, шүдөө хабиран шооложо, «Манай хүлеэһэн үдэр ерээ! Хараабди тэрэниие! Иерусалимые залгяабди!» гэжэ шиигэнэнэ.

ע Аайин

ע Аайин

¹⁷ Шиидэһэн хэрэгээ Эзэн бүтээгээ, эртэ урдын үдэрнүүдтэ айладаһан үгөө бэелүүлээ. Тэрэ хайра гамгүй һалгаана, дайсадаар шамайе баһуулан баясуулаа, дайсадые үргэмжэлөө.

צ Цадээ

צ Цадээ

¹⁸ Эзэниие бүхы зүрхэ сэдьхэлһээ гуй! Сионой басаганай хана! Үдэр, һүнигүй нюдэнһөө нёлбоһо гол горхон мэтэ урдахуула! Агшамшье зуура амгалан бү бай, нёлбоһод бү хатаг лэ!

ק Кооп

ק Кооп

¹⁹ Бодо, бүхэли һүниндөө Эзэниие дуудан зальбара! Зүрхэншни уһан мэтэ урдан байг, Эзэн энэниие үзэг лэ! Гудамжануудай углуу бүхэндэ үлэсхэлэн хооһон байдалһаа үхэжэ байгаа хүүгэдэйнгээ түлөө гараа һунган, Эзэниие гуй!

ר Рээш

ר Рээш

²⁰ Эзэн, нам руу хараагаа шэглүүлыт, харыт! Бэшэ хэндэ иимэ хэрзэгыгээр хандаа бэлэйт?! Эхэнүүд тэжээһэн хүүгэдээ эдижэ байна! Танай нангин үргөө соо санаартад, лүндэншэд алуулна!

ש Шиин

ש Шиин

²¹ Хүүгэд, хүгшэд газарта, харгын захаар хэбтэнэ! Залуу хүбүүд, басагадни һэлмээр сабшуулан алуулаа! Хилэнтэ үдэртөө Та тэдэниие алаат, хайра гамгүй усадхаат!

ת Таав

ת Таав

²² Та бүхы зүгһөө һайндэртэл мэтэ аймшагтай зүйлнүүдые дуудан асаруулаат. Эзэнэй хилэнтэ үдэр хэншье абарагдаагүй, амиды үлөөгүй. Тэнжэн тэдхэһэн хүүгэдым дайсан хюдаа!