Филиппынхидтэ 3 - Библи

Бурханай урда үнэн сэдьхэлтэй байлга

¹ Аха дүүнэрни, Эзэнтэй нэгэдэһэндээ баяр жаргалтай байгты гэжэ түгэсхэлдөө хэлэхэ байнаб. Урда бэшэһэн юумээ дахин дабтахадамни намда хүндэ бэшэ, харин таанадта аша туһатай юм.

² Нохойнуудтал адли өөһэдыгөө абажа ябадаг зонһоо бэеэ һэргылэгты, нүгэл шэбэл үйлэдэдэгшэдһөө һэргылжэ байгты, бэлгээ отолуулагты гэжэ баадхадаг зонһоо һэргылжэ байгты.

³ Тэдэнэр бэшэ, харин бидэнэр жэнхэни «отолуулга» хэһэн зон гээшэбди, юуб гэбэл, бидэ Бурханай Һүлдын ашаар Бурханда мүргэжэ, Иисүүс Христоостой нэгэдэһэндээ бахархан баясанабди. Бидэ бэеын эрхэтэнэй отолуулха ёһололдо найданагүйбди.

⁴ Гэхэтэй зэргэ би тиимэ мэтын юумэндэ найдаха аргатай байгааб. Хэрбээ бэеын эрхэтэниие отолуулха ёһололдо найдаха һанаатайшуулай байбалнь, би хэнһээшье үлүү тиигэжэ найдаха шалтагаантай хүнби.

⁵ Би түрэһөөр наймадахи үдэртөө бэлгээ отолуулаа һэм. Би болбол Израилиин уг изагууртай, Бэньямиинэй обогой жэнхэни еврей хүнби. Моисейн Хуули хэшээлтэйгээр сахидаг фарисей байхадаа,

⁶ би һүзэглэгшэдые гайтайгаар хашан мүрдэдэг һэнби. Бурханай урда үнэн сэдьхэлтэй байхын тула би Хуулиин бүхы заабаринуудые сахижа, ямаршье гэмнэмээр юумэ хээгүйб.

⁷ Урдань ехэ хэрэгтэй, шухала гэжэ тоолодог байһан юумэнүүдээ мүнөө, Христоосһоо боложо, хэрэггүй хооһон гэжэ тоолоноб.

⁸ Бүри үнэтэй сэнтэй юумэнһээ, минии Эзэн Иисүүс Христоосые мэдэрхэһээ гадна бусад бүхы юумэнүүдые би хэрэггүй ба дэмы хооһон гэжэ тоолоноб. Христоосһоо боложо би бүхы юумэнһээ арсааб. Христоосые оложо, Тэрээнтэй сүм нэгэдэхын тула би бусад бүхы юумые юун дээрэшье тоолоногүйб.

⁹ Тиимэһээ би Хуули сахижа байһанаараа бэшэ, харин Христоосто һүзэгтэй байһанаараа Бурханай урда үнэн сэдьхэлтэн болоноб. Бурхан этигэл һүзэгөөрнь лэ хүниие үнэн сэдьхэлтэнэй тоодо оруулдаг.

¹⁰ Христоосые, Тэрэниие амидыруулһан хүсые мэдэрхэ гэжэ хүсэнэб. Тэрээндэл адляар зобохо, Тэрээндэл адляар үхэхэ дуратай байнаб,

¹¹ тиигэбэл би өөрөө үхөөд амидырха байгааб.

Зорилго эрмэлзэлдээ хүрэлгэ

¹² Би зорилго эрмэлзэлдээ хүрөөб, хэхэ ёһотой юумэеэ бүгэдыень хээб, эрхим түгэс болооб гэнэгүйб. Гэхэдээ Иисүүс Христоос намайе ямар шагналда хүртөөхөөр Өөртөө татаа һэм, тэрэ шагналыень абаха гэжэ би оролдоноб.

¹³ Аха дүүнэрни, тэрэ шагналыень абааб гэжэ би үнэхөөрөө һананагүйб. Яаба тиибэшье, би үнгэрһэн юумэеэ мартажа, ерээдүй юумэндээ хүрэхэ гэжэ бүхы шадалаараа шармайнаб.

¹⁴ Тиимэһээ би мүнхын амидаралай шагналые абахаар сэхэ зорижо ябанаб. Тэрэ амидаралда Бурхан намайе Иисүүс Христоосоор дамжуулан дуудаа.

¹⁵ Оюун сэдьхэлээрээ болбосон хүн бүхэмнай иимэл һанал бодолтой байха ёһотой. Хэрбээ зариманайтнай ондоо һанал бодолтой байбал, Бурхан тэрэнииетнай эли болгожо харуулхал.

¹⁶ Яабашье бидэ мүнөө ойлгожо абаһан гуримаа саашадаашье баримталха ёһотойбди.

¹⁷ Аха дүүнэрни, намайе һажаажа байгты. Манай таанадта харуулһан жэшээ даган ажамидардаг хүнүүдые хаража, дуряажа байгты.

¹⁸ Олон хүнүүд Христоосой хэрээһэндэ хадуулжа үхэһэн ябадалда эсэргүүсэһэн дайсад мэтэ ажамидардаг гэжэ би таанадта урдань оло дахин хэлээ һэм, мүнөөшье нулимсаа гарган дабтанаб.

¹⁹ Бэе махабадайнь хүсэлэнгүүд тэдэнэй бурханиинь юм. Тэдэ эшэжэ байха ёһотой юумээрээ бахархана, энэл дэлхэйн юумэнүүд тухай тэдэ бододог. Тиимэһээ тэдэ тамада орожо хосорхол!

²⁰ Харин бидэнэр тэнгэриин харьяалай хүнүүд гээшэбди, бидэ тэнгэриһээ өөһэдынгөө Абарагша, Эзэн Иисүүс Христоосой ерэхые аргагүй ехээр хүлеэнэбди.

²¹ Бүхы юумые Өөрын эрхэ мэдэлдэ оруулха аргатай хүсэ шадалаараа Тэрэ манай ахир һулахан бэенүүдые хубилгажа, Өөрынгөө алдарта бэетэй адлихан болгохо.