Филиппынхидтэ 2 - Библи

Христоос номгон даруу, тиихэдээ агууехэ

¹ Христоос таанадые урмашуулжа, хайра дурань һанааетнай заһадаг, Һүлдэ таанадые нэгэдхэдэг юм бол, таанадай бэе бэеэ анхаржа, хайрлажа ябадаг юм бол,

² таанад нэгэ һанал бодолтой, бэе бэедээ хайра дуратай, һанал нэгэн, бодол нэгэн байжа, намайе бүрин баярлуулыт даа.

³ Юумэ хэхэдээ, өөр тухайгаал бү бодогты, али хүнэй магтаалда хүртэхын лэ тула бү оролдогты. Зүгөөр даруу номгон байгты, бусад зониие өөрһөө дээгүүр бодожо байгты.

⁴ Гансал өөһэдынгөө бэшэ, харин бусадайнгаа һайн һайханай түлөө һаналаа табижа байгты.

⁵ Таанад Иисүүс Христоостол адли һанал бодол түрүүлэгты:

⁶ Тэрэ анханһаа Бурханай шанартай аад, Бурхантай нэгэ зиндаада байха ёһотойб гэжэ Өөр тухайгаа бодоогүй.

⁷ Харин орондонь хамаг эрхэ түрэеэ Тэрэ дуратайгаар орхёод, зарасын дүрсэ дүрсэлжэ, маанадтал адли болон, хүн түхэлтэй мүндэлбэ.

⁸ Тэрэ номгон даруу байгаа, үхэн үхэтэрөө, хэрээһэн дээрэ үхэтэрөө Бурханай үгэ дууладаг байгаа.

⁹ Тиимэһээ Бурхан Тэрэниие дээгүүр үргэжэ, бусад алдарнуудһаа ушаргүй үндэр нэрэ түрэдэ хүртөөбэ.

¹⁰ Тиимэһээл Иисүүсэй алдарта нэрэ түрэдэ дээдэ огторгойн, газар дэлхэйн, доодо тамын амитан бүхэн мүргэн һүгэдэхэ,

¹¹ тиигээд Эсэгэ Бурханай алдар солодо, Иисүүс Христоос болбол Эзэн юм гэжэ хүн бүхэн айладхажа байха.

Энэ дэлхэйн гэрэл туяа болохот

¹² Инаг хайрата нүхэдни, таанадтайгаа суг байхадамни, үгыемни ходо дууладаг һэнта. Теэд мүнөө хажуудатнай үгы байхадамни, бүришье һайнаар үгыемни дуулажа байха ёһотойт. Гүйсэд абарагдахын тула һүрдэн һүгэдэн ажаллажа байгты.

¹³ Ушарынь гэхэдэ, Бурхан Өөрөө сэдьхэлдэтнай хүсэлнүүдые бадараадаг, хэхэ ёһотой юумэеэ хэжэ байха тээшэ таанадые хүтэлдэг.

^14-16 Ямаршье гэмгүй, арюун сэбэр, эрхим һайн Бурханай үхибүүдынь байхын тула таанад юушье хэхэдээ, бү гэмэрэлдэгты, арсалдаа бү гаргагты. Забхай зальхай, нүгэл шэбэлтэй зоной дунда амидархадаа амидарал хайрладаг мэдээсэлые хатуугаар баримталан, таанад тэдэ зоной дунда тэнгэридэ гэрэлтэжэ байһан одо мүшэдтэл адли яларан толоржо байха ёһотойт. Тиигэбэлтнай, Христоосой заларан ерэхэ үдэр би таанадаар бахархан омогорхохо шалтагаантай байхаб, бүхы оролдолгонуудни, үйлэ хэрэгүүдни дэмы үнгэрөөгүй гэжэ мэдэхэлби.

¹⁷ Танай этигэл һүзэгтнай, албантнай Бурханда үргэгдэһэн үргэлдэ адли юм. Тэрэ үргэлтэйтнай хамта миниишье шуһан үргэл болон адхарха ёһотой байжа магадгүй. Тиигэбэл би та бүхэнтэй хамта баярлажа байнаб.

¹⁸ Тон тиигэжэл таанадшье намтай суг баярлаха ёһотойт.

Тимофей Эпапродиит хоёр

¹⁹ Таанад тухай мэдээ дуулажа, өөрыгөө урмашуулха һанаатайб. Тиимэһээ Эзэн Иисүүсэй эрхэ мэдэлээр таанадта һаядаа Тимофейе эльгээхэб гэжэ найданаб.

²⁰ Минии хажууда Тимофейһээ ондоо хэншье тиигэжэ ехээр таанадта һаналаа табижа ябадаггүй.

²¹ Бусад зон бүгэдөөрөө Иисүүс Христоосто һайшаагдаха юумэ бүтээхэ тухай огто бодонгүй, өөрынгөө амидаралай түлөө оролдожо ябадаг.

²² Тимофейн үнэн шударгуу байһанаа баталһыень, тэрэ бидэ хоёрой эсэгэ хүбүүн хоёртол адляар хамта Һайн Мэдээсэл дэлгэрүүлхын түлөө хүдэлжэ байһые таанад өөһэдөө мэдэнэт.

²³ Намтай юунэй ушарха тухай мэдэхэтэйгээ сасуу би таанадта тэрэниие эльгээхэб гэжэ найданаб.

²⁴ Би өөрөөшье Эзэнэй эрхэ мэдэлээр һаядаа таанадта ошохоб гэһэн бата этигэлтэйб.

²⁵ Намда туһалхаар таанадай эльгээһэн, намтай хамта эндэ ажаллажа, тэмсэжэ байһан манай һүзэглэгшэ дүү Эпапродиитые бусаажа таанадта ябуулха хэрэгтэй гэжэ би бодобоб.

²⁶ Тэрэ та бүгэдые харахаяа аргагүй ехээр хүсөө, өөрынь үбдэһэн тухай таанадай дуулаһанда тон ехээр шаналаа.

²⁷ Тэрэ үнэхөөрөө үбдэжэ, үхэхэеэ байгаа. Гэбэшье Бурхан тэрэниие хайрлан үршөөгөө; намайешье баһа үшөө ехэ гашуудал зоболондо дарагдахаһаа хамгаалан үршөөгөө.

²⁸ Тэрэниие хараад, таанад дахин баясахат, тиигээд бишье голхорхоёо болихоб гэһэн бодолтойгоор тэрэниие таанадта бушуухан ябуулбаб.

²⁹ Эзэнэй тэрэ һүзэглэгшые баяртайгаар угтажа абагты. Тэрээндэл адли хүнүүдые бултыень хүндэтэйгөөр угтажа байгты.

³⁰ Эпапродиит Христоосой түлөө ажаллажа байхадаа үхэлэй хажууда байгаа, таанадай хэхэ аргагүй юумэ намда хэжэ, тэрэ ами наһаяа хайрлаагүй.