Филиппынхидтэ 1 - Библи

¹ Филипп хотын һүзэглэгшэдэй бүлгэм, танай хүтэлэгшэд болон танай туһалагшад, таанадта Иисүүс Христоосой зарасанар болохо Павел Тимофей хоёр бэшэнэ.

² Манай Эсэгэ Бурхан болон Эзэн Иисүүс Христоос таанадые үршөөл хайрадаа хүртөөжэ, амгалан тайбан байлгахань болтогой!

Павел филиппынхидэй түлөө зальбарна

³ Таанадые һанаха бүхэндөө би Бурхандаа баяр баясхалан хүргэжэ байдагби.

⁴ Тиин та бүгэдын түлөө зальбарха бүхэндөө би баяр жаргалтайгаар зальбардаг хүнби,

⁵ юундэб гэхэдэ, таанад Һайн Мэдээсэл дэлгэрүүлхэдэмни анха түрүүшын үдэрһөө эхилэн мүнөө болотор намда туһалжа хамһалсажа байгаат.

⁶ Тиихэдэ таанадай дунда үлзы һайхан үйлэ хэрэг бүтээжэ эхилһэн Бурхан Иисүүс Христоосой заларан ерэхэ үдэр хүрэтэр тэрэ хэрэгээ залируулангүй бүтээжэл байха гэһэн хатуу этигэлтэй байнаб.

⁷ Таанад хододоо минии зүрхэ сэдьхэл соо оршонот! Тиимэһээл иигэжэ таанадта һанаагаа табижа байдагни зүб юм. Түрмэдэшье байхадамни, Һайн Мэдээсэлые хамгаалха, хатуугаар баталха эрхэ сүлөөтэйшье байхадамни, та бүгэдэ намда Бурханай даалгаһан ажалда хабаадалсажа туһалжа ябадаг һэнта.

⁸ Иисүүс Христоосой таанадта хайра дуратай байдагтал тон адляар миниишье та бүхэндэ хайра дуратай байһые Бурхан мэдэнэ.

⁹ Бурханда, бэе бэедээ бүри ехээр дуратай байһайт, үнэн зүб юун бэ гэжэ бүри һайнаар мэдэрһэйт, сэдьхэһэйт гэжэ би зальбарнаб.

¹⁰ Тиигэбэл таанад үнэн зүбые шэлэхэ аргатай байхат. Тиигээд Иисүүс Христоосой заларжа ерэхэ үдэр таанад арюун сэбэр, ямаршье гэмгүй байхат.

¹¹ Хэһэн бүхы үйлэ хэрэгүүдтнай Иисүүс Христоосой нүлөөгөөр үнэндөө һайн һайхан байхал. Тиигэжэл Бурхан алдаршаха, Тэрээндэ магтаал соло дуудаха.

Христоосто алба хэжэ ажамидарха тухай

¹² Аха дүүнэрни, намтай ушарһан бүхы юумэн Һайн Мэдээсэлэй бүри амжалтатайгаар дэлгэрхэдэ үнэхөөрөө аша туһатай байгаа гэжэ мэдэгты.

¹³ Христоосто алба хэдэг байһанһаа боложо түрмэдэ ороһон тухаймни бүхы ордоной харуулшад болон бусадшье эндэ байһан зон мэдэдэг болоо.

¹⁴ Түрмэдэ һууһан ябадални һүзэглэгшэдэй олоной һүзэг бүри бэхижүүлбэ, тэдэнэр бүри зоригтойгоор, айлтагүйгөөр Бурханай мэдээсэл номножо захалба.

¹⁵ Тиихэдээ нэгэ зариманиинь манда атаархаһан, маанадтай арсалдаһан шалтагаанһаа Христоос тухай номноно, харин нүгөө зариманиинь һайн дураараа, туһалхаяа хүсэжэ байһан дээрэһээ номноно.

¹⁶ Һайн дураараа номногшод Бурханай намда Һайн Мэдээсэл хамгаалха үүргэ даалгаһыень мэдэнэ ха юм.

¹⁷ Харин намда атаархаһан номногшод Христоос тухай үнэн зүрхэнһөө айладханагүй. Тэдэ намайе түрмэдэ бүри ехээр зобоолгохо зорилготойгоор лэ номноно.

¹⁸ Зай, яахаб даа. Христоос тухай үнэн зүрхэнһөөшье һургахада, үнэн зүрхэнһөөн номноһон хэбэр үзүүлэншье һургахада, би адлил баясанаб. Саашадаашье баясажа байхаб.

¹⁹ Ушарынь гэхэдэ, танай зальбаралай ашаар, Иисүүс Христоосой Һүлдын туһаламжаар би сүлөөдэ гарахаб гэжэ һайн мэдэнэб.

²⁰ Үүргэеэ дүүргэхэдээ, эшэхэ улайхаар юумэ хэхэгүйб, харин хэтын хэтэдэ, илангаяа энэ сагта зоригтой байхаб, тиин ямаршье юумэ хэхэдээ, амиды байна гүб, али үхэхэ гүб, илгаагүй, Христоосые алдаршуулхаб гэжэ бүхы һанал бодолоороо хүсэжэ, найдажа байнаб.

²¹ Минии ажамидаралай зорилго – Христоос гээшэ. Харин минии үхэл бүришье ехэ аша туһа асарха.

²² Тиихэдэ амиды ябахадаашье үрэ дүнтэй ажал хэхэ аргатай хүм. Тиимэһээ алинииень шэлэхэ ёһотойгоо мэдэнэгүйб.

²³ Тэрэ хоёр зүг хоюулан намайе өөр тээшээ татана. Үхөөд, Христоостой суг байхые аргагүй ехээр хүсэнэб. Энэнь ушаргүй һайн шэлэлтэ юм.

²⁴ Харин амиды мэндэ ябабални, таанадта үлүү шухала хэрэгтэй.

²⁵ Би энээниие һайн мэдэнэб, тиимэһээ таанадтайгаа үлэхэб, һүзэгэйтнай нэмэгдэн бэхижэхэдэ, баяр жаргал асархада та бүгэдэнтэйгөө байжа туһалхаб.

²⁶ Тиигээд дахин таанадта ошоходомни, намаар бахархаха бүришье һайн шалтагаан таанадта олгогдохо.

²⁷ Эдэ бүгэдэндэ нэмэжэ хэлэбэл, таанад Христоос тухай Һайн Мэдээсэлэй һургаһан ёһоор амидарха ёһотойт. Тиимэһээ таанадта ошоно гүб, али ошонгүй байна гүб, таанад булта нэгэ зорилготой, Һайн Мэдээсэлэй һүзэгэй түлөө һанал нэгэн тэмсэнэт гэжэ дуулаһайб.

²⁸ Дайсадһаа хэзээдэшье бү айгты, хододоо зоригтой зүрхэтэй байгты, тиигээ һаа, тэдэнэй хосорхые, харин өөһэдынгөө абарагдахые харуулхат. Бурхан таанадта тэрэ абаралга үршөөхэ.

²⁹ Ушарынь хэлэбэл, таанад Христоосто гансал һүзэглэн алба хэхэ бэшэ, харин Тэрэнэй түлөө зоболон амсан үүргээ бэелүүлхэ табилантайт.

³⁰ Мүнөө таанад намтай хамта тэмсээндэ хабаадалсагты. Тиимэ байлдаанда минии урдань тулалдажа байһые хараа һэнта, мүнөөшье тулалдажа байһан тухаймни дууланат.