Эзраа 8 - Библи

Эзраатай сугтаа ерэлсэгшэ хүнүүдэй тоо

¹ Артагсээрэгс хаанай хан шэрээдэ һууха үедэ Вавилоонһоо намтай суг гаралсаһан угууд болон тэдэнэй гулбаанар эдэ:

² Пинэһаасай хүбүүдһээ Гэршоом, Итамаарай хүбүүдһээ Даниил, Давидай хүбүүдһээ Хаттууш

³ (Шэханьяагай хүбүүдһээ), Пароошой хүбүүдһээ Захарияа, тэрээнтэй хамта угайнь зуун табин эрэ хүн,

⁴ Паһаат-Моһаабай хүбүүдһээ Зэраахияагай хүбүүн Эльйэһоэнай, тэрээнтэй хамта хоёр зуун эрэ хүн,

⁵ Яхазиһээлэй хүбүүн Шэханьяа, тэрээнтэй хамта гурбан зуун эрэ хүн,

⁶ Адиинай хүбүүдһээ Ёнатаанай хүбүүн Ээбэд, тэрээнтэй табин эрэ хүн,

⁷ Элаамай хүбүүдһээ Атаалияагай хүбүүн Ешайя, тэрээнтэй суг далан эрэшүүл,

⁸ Шэпаатияагай хүбүүдһээ Михаээлэй хүбүүн Зэбаадьяа, тэрээнтэй наян эрэшүүл,

⁹ Ёһаабай хүбүүдһээ Ехиһээлэй хүбүүн Обадияа, тэрээнтэй хоёр зуун арбан найман эрэшүүл,

¹⁰ Шэломиидэй хүбүүдһээ Ёсифьяагай хүбүүн, тэрээнтэй сугтаа зуун жаран эрэшүүл,

¹¹ Бэбэйн хүбүүдһээ Бэбэйн хүбүүн Захарияа, тэрээнтэй хорин найман эрэ хүн,

¹² Азгаадай хүбүүдһээ Һаккатаанай хүбүүн Ёханаан, тэрээнтэй хамта зуун арбан эрэ хүн,

¹³ Адонихаамай хүбүүдһээ һүүлшынхидэйнь нэрэнүүд эдэ: Элипээлэт, Еиһээл, Шэмаяа, тэдэнтэй суг жаран эрэ хүн,

¹⁴ Бигбайн хүбүүдһээ Утай Заххуур хоёр, тэдэнтэй суг далан эрэ хүн.

Левидүүд болон Һүмын албатанай үүргэ

¹⁵ Аһаваада шудхадаг уһанай эрьедэ би эдэ зониие суглуулжа, тэндээ гурбан хоногто байрлабабди. Зоноо, санаартадаа бүридхэхэдэмни, Левиин хүбүүдһээ нэгэшье хүн олдобогүй.

¹⁶ Тиигээд удамаршадһаа Элиээзэр, Ариээл, Шэмаяа, Элнатаан, Ярииб, Элнатаан, Натаан, Захарияа болон Мэшуллаамые, эрдэмтэдһээ Ёярииб Элнатаан хоёрые дуудуулжа асаруулаад,

¹⁷ Касипияа нютагай ахамад Иддоодо, тэрэнэй аха дүүнэр болохо Һүмын албатанта ошожо: – Манай Бурханай гэртэ алба хэхэ хүнүүдые томилогты, – гэжэ хэлэхэ даабари үгөөд, тэдэниие эльгээбэб.

¹⁸ Бурханаймнай манаа хаража байһан тула Маһлиигэй хүбүүдэй нэгэн болохо Шэрээбияа гэжэ сэсэн хүниие хүбүүдтэйнь, аха дүүнэртэйнь хамта арбан найман хүниие манда эльгээбэ. Маһлиинь Левиин хүбүүдэй нэгэн, Левиинь Израилиин.

¹⁹ Мүн Мэрариин хүбүүдһээ Хашаабияа Ешайя хоёрые хүбүүдтэйнь, аха дүүнэртэйнь, хамтадаа хорин хүниие үгөө.

²⁰ Левидүүдэй албан туһамаршад болгожо, Давид хаанай болон түшэмэлнүүдэйнь табиһан Һүмын албатанай угһаа үшөө хоёр зуун хорин хүниие нэмэбэ. Тэдэнэй нэрэнүүд булта дэбтэртэ бэшэгдэнхэй.

²¹ Бурханай урда сэдьхэлээ номгоруулжа, үхи хүүгэдтэеэ, зөөри зөөшэтэеэ аян замаа амгалан гаталхые Тэрээнһээ гуйхын тула бидэ масаглаха ёһотойбди гэжэ Аһаваа голой эрьедэ байхадаа соносхобоб.

²² Замда ушарһан дайсадһаа маниие хамгаалха сэрэг хаанһаа эрихэеэ эшэдэһэмни хүрөө һэн. Юуб гэхэдэ, «Манай Бурхан Тэрээндэ мүргэн һүгэдэгшэдтэ бултандань туһалдаг, харин буруу харагшадта уураа хүсэн түгэсөөр харуулдаг» гэжэ хаантай хөөрэлдэхэдөө хэлэһэн байгаа бшууб.

²³ Тиигээд бидэ масаглаабди, боложо байгаа үйлэ хэрэгтэмнай туһалхые Бурханаа гуйгаабди, манай мүргэлые Бурхамнай анхараа.

Һүмын үргэл

²⁴ Санаартадые хүтэлбэрилхэ арбан хоёр удамаршые томилбоб: Шэрээбияа Хашаабияа хоёрой хажууда тэдэнэй арбан аха дүүнэр.

²⁵ Хаан, тайжанар, түшэмэлнүүд болон тэндэ байһан бүхы израильшуудай Бурханай гэртэ үргэһэн алта, сагаан мүнгэ, амһартануудые бултыень шэгнүүрээр шэгнэжэ, эдэ арбан хоёр ноёдто даалгабаб.

²⁶ Шэгнүүрээрнь тэдэндэ үгэһэн юумэнүүд гэхэдэ: зургаан зуун табин талаант сагаан мүнгэн, зуун талаант мүнгэн амһарта болон элдэб зүйлнүүд, зуун талаант алта,

²⁷ нэгэ мянган драахмын сэнтэй хорин алтан аяга, алтан мэтэ сэгнэгдэдэг ялагар зэдээр хэһэн хоёр амһарта.

²⁸ Тиигээд тэдэндэ иигэжэ хэлэбэб: – Эсэгэнэрэйтнай Бурхандаа һайн дураараа үргэһэн алта мүнгэн, эдэ амһартанууд Эзэнэймнай нангин зүйлнүүд болоно. Таанаршье Эзэн Бурханайнгаа урда ехэ үүргэтэй, нангин хүнүүд болобо гээшэт.

²⁹ Иерусалимдахи Эзэнэй гэрэй санда абаашажа, Израилиин угуудай аха захатанай, санаартадай, левидүүдэй хараһаар байтар эдэ бүгэдые шэгнүүрээрнь тушаагаагүй сагтаа тон һэримжэтэй ябагты, наринаар харууһалагты!

³⁰ Санаартад, левидүүд шэгнэгдэһэн алта, мүнгэ, амһартануудые Иерусалимдахи Эзэнэй гэртэ абаашахаяа даажа абаба.

Эзраагай Иерусалим ерэлгэ

³¹ Нэгэдэхи һарын арбан хоёрой үдэр Аһаваа голһоо бидэ Иерусалим ошохо замдаа гарабабди. Бурхамнай мантаяа һэн тула харгыдамнай отоһон дайсадһаа маниие ходо абаржа ябаа.

³² Одоол Иерусалимаа хүрэжэ, тэндээ гурба хонобобди.

³³ Дүрбэдэхи үдэртөө бидэ Бурханай гэртэ ошожо, Урияагай хүбүүн санаартан Мэрэмоодто, тэрээнтэй суг байһан Пинэһаасай хүбүүн Эльазаарта, Иисүүсэй хүбүүн Ёзабаадта, Биннуйн хүбүүн Ноһаадьяада – левидүүдэй гарта асарһан алтаяа, мүнгэеэ ба амһартануудаа шэгнүүрээрнь тушаажа үгэбэбди.

³⁴ Булта шэгнүүрээрээ, тоогоороо тушаагдаа. Шэгнэгдэһэн бүхы юумэн тэрэ дары тэмдэглэн бэшэгдээ.

³⁵ Вавилоонһоо нүүжэ ерэгшэд Израилиин Бурханда түгэс шатаалта үргэл хэхэеэ бүхы Израилиин түлөө арбан хоёр буха, ерэн зургаан хони, далан долоон хурьга, арбан хоёр тэхэ нүгэл сагааруулгын үргэлдэ асарба. Эдэ бүгэдөөр Эзэндээ түгэс шатаалта үргэл хээ.

³⁶ Удаань хаанай нэрээр харшалдагуудта ба Евфратһаа баруулжаа можын ноёдто хаанай эльгээһэн зарлиг абаашажа барюулба, тиихэдэнь Израилиин арадые, мүн Бурханай һүмэ тэдэнэр хүндэлдэг болобо.