Эзраа 4 - Библи

Дайсадай туһалха гэһэн мэдүүлгэ

¹ Сүлэлгэ баряанһаа бусагшад Эзэндээ, Израилиин Бурханда, Һүмэ барижа байна гэжэ Иудатанай, Бэньямиинтэнэй дайсад дуулаба.

² Тиигээд Зэрубабээл болон угуудай гулбаануудта тэдэ ерэжэ: – Энэ Һүмыетнай бидэ тантай хамта барилсаябди. Тантай адли бидэ танай Бурханда мүргэнэбди. Маниие иишэ асарһан Ассириин хаан Эсархаддооной үеһөө тооложо, үргэл Тэрээндэ үргэнэбди, – гэбэ.

³ – Манай Бурханда мантай хамта таанар Һүмэ барилсахагүйт. Персиин хаан Киирэй захирһанай ёһоор, Израилиин Бурханда бидэ өөһэдөө Һүмэ барихабди, – гэжэ Зэрубабээл, Иисүүс болон Израилиин угуудай гулбаанар арсалта хэбэ.

⁴ Тиихэдэнь тэрэ газарай зон Һүмэ барилгада али болохоор һаалта хэдэг, Иудын зоной хүсэ шадалыень бууруулха гэжэ оролдодог болобо.

⁵ Персиин ноёд, түшэмэлнүүдтэ эдилгэ үгэжэ, хаан Киирэй байхаһаа эхилээд, Персиин Даарий хаанай хан шэрээдээ һууха хүрэтэр тэрэ барилга урагшань ябуулаагүй юм.

Хаанда хоб орожо, барилга зогсоогдобо

⁶ Хаан түрэеэ Ахашвероошой һая эзэлээд байхада Иудын газарта, Иерусалимда ажаһуугшадые гэмнэжэ, дайсалагша зон гомдол бэшэһэн юм.

⁷ Артагсээрэгс хаанай хан шэрээдэ һууха үедэ Бишлаам, Митрэдаат, Табээл гэгшэд бусад нүхэдтэеэ Персиин хаан Артагсээрэгстэ гомдол эльгээһэн байгаа. Тэрэ бэшэгынь араам хэлээр, араам үзэгөөр бэшэгдэнхэй һэн.

⁸ Тиихэдэ захирагша Рэхүүм бэшээшэ Шимшай хоёр Иерусалимайхидта эсэргүү үшөө нэгэ бэшэг Артагсээрэгс хаанда эльгээбэ:

⁹ «Динайнуудай, афарсатхайнуудай, тарпэлайнуудай, апарсуудай, аркевайнуудай, вавилоонойхидой, сүүзынхидэй, дэһайнуудай, элаамайхидай удамаршад болон

¹⁰ агууехэ хаан Аснаппаарай Самариин хотонуудаар, Евфрат мүрэнһөө баруулжаа нютагуудаар нүүлгэһэн бусадшье арадуудай түлөөлэгшэдэй зүгһөө захирагша Рэхүүм, бэшээшэ Шимшай гэгшэд бусад нүхэдтэеэ бэшэнэбди».

¹¹ Тэдэнэй эльгээһэн бэшэгэйнь буулгабаринь иимэ: «Евфрат мүрэнһөө баруулжаа нютагуудаар ажаһуудаг танай албата зонһоо эзэн хаан Артагсээрэгсдэ.

¹² Эзэн хаамнай мэдэжэ абыт. Танһаа гараад, наашаа нүүжэ, манда Иерусалим ерэһэн энэ буһалгаата иудейнүүд барилга хэжэ, хүреэлһэн хана бодхоожо байнал. Һуурииень табижа дүүргээ.

¹³ Эзэн хаамнай оюун ухаандаа ойлгожо абыт. Хэрбээ энэ муу зонтой хотынхид хотоёо барижа, хотын хана бодхоожо дүүргэбэл, алба татабаринуудаа түлэхэеэ арсажа, эзэн хаанаймнай жасада горитой хохидол оруулхал.

¹⁴ Хаанай ордонһоо ажамидаржа байдаг бидэ эзэн хаанайнгаа һан жасын үригдэхэ ушарые тэсэхэ аргамнай үгы. Ушар тиимэһээ энэ бэшэг эльгээбэбди.

¹⁵ Танай эсэгэнэрэй бэшэһэн дэбтэрнүүдые бэдэрүүлжэ, тэмдэглэлнүүдыень шэнжэлхэдээ, үнинһөө хойшо хаануудай урдаһаа буһалгаалдаг муу зонтой хото байгаа гэжэ мэдэхэлта. Тиимэл хадаа һандаргагдаһан байгаа гэбэ.

¹⁶ Ушар тиимэһээ, энэ хотын һэргээн баригдажа, хүреэлһэн ханаяа бодхооболнь, Евфратһаа баруулжанхи газартнай танай мэдэлһээ гараха байха гэжэ мэдүүлнэбди».

¹⁷ Захирагша Рэхүүмдэ, бэшээшэ Шимшайда, Самари болон Евфратһаа баруулжанхи хотонуудта ажаһуудаг бусад нүхэдтэ хаан харюу эльгээбэ: «Амар сайн!

¹⁸ Эльгээһэн бэшэгтнай оршуулагдажа, минии урда тодо һонороор уншагдаа.

¹⁹ Намһаа захиралта үгтэжэ, бэдэрэгдэжэ, энэ хото эртэ сагһаа урда тээхи хаашуулай урдаһаа бододог, буһалгаа үйдхэдэг байһаниинь мэдэгдээ.

²⁰ Евфратһаа баруулжанхи газарнуудые эзэмдэжэ, алба, татабари абажа байһан хүсэтэй хаашуул Иерусалимда байһан гэжэ элирээ.

²¹ Барилга хэхэеэ болигты гэжэ эдэ зондо захиралта үгэгты. Минии зүбшөөл үгөөгүй сагта энэ хото баригдаха ёһогүй.

²² Харин жэншэдгүй энээниие гүйсэдхэгты, үгы бол, ехэ хохидол гаража, хаан түрэдэ муу юумэн ушарха».

²³ Захирагша Рэхүүм, бэшээшэ Шимшай болон тэдэнэй бусад нүхэд Артагсээрэгс хаанай бэшэг уншаһан дары тэдэ Иерусалим хотын иудейнүүдтэ ошожо, сэрэгэй хүсөөр тэдэнэй ажал тогтообо.

²⁴ Тиигэжэ Иерусалимдахи Бурханай һүмын барилга зогсошоо. Персиин Даарий хаанай хан шэрээдэ һууһаар хоёрдохи жэл болотор иимэ байдал үргэлжэлөө юм.