Эзэкээл 8 - Библи

Эзэкээл дахин үзэл харана

¹ Сүлэлгэдэ байһанай зургаадахи жэлэй зургаадахи һарын табадахи үдэр Иудын хан түрын ахамадууд намтай хамта гэртэмни һуужа байгаа бэлэй. Гэнтэ Эзэн Бурханай хүсэ шадал намда халин ороо һэн.

² Хүнэй түхэлтэй гал дүрсэ харабаб. Уусаһаань доошоо гал, уусаһаань дээшээ ялагар гуулин мэтэ тэрэ дүрсэ яларжа байгаа.

³ Тэрэ гарай дүрсэ мэтэ юумэеэ һарбайгаад, намайе үһэнһөөм абаба. Тиигээд Бурханай Һүлдэ намайе агаарта үргэжэ, Иерусалим руу абаашаба. Нангин үргөөгэй дотор хашаагай хойто бартаануудай хажууда табяатай Бурханда харша онгоной байгааша газар руу Тэрэ намайе асарба.

⁴ Хэбаар голой эрьедэ байхадаа харагша гоё һайхан гэрэл туяа, Эзэн Бурханай заларһые гэршэлэгшэ гэрэл туяа, би тэндэ хараа һэм.

⁵ Бурхан намда айладхаба: – Хүнэй үри Эзэкээл! Хойто зүг руу харыш. Хойто зүг руу харабаб. Үргэлэй шэрээгэй хажуудахи бартаануудай дэргэдэ байгааша тэрэ үнөөхи Бурханда харша онгониие обёорбоб.

⁶ Эзэн Бурхан айладхаба: – Хүнэй үри Эзэкээл! Юун боложо байһые харана гүш? Израилиин улад зоной хэжэ байгааша жэгшүүритэй муухай хэрэгүүдые харыш. Иигэжэ тэдэ Намайе нангин үргөөһөөм холодуулна. Энээнһээшье муу муухай үйлэ хэрэгүүдыень үзэн харахаш.

⁷ Удаань Тэрэ намайе дотор хашаагай үүдэнүүд руу абаашажа, ханада байгааша нүхэ харуулаа һэн.

⁸ Тэрэ иигэжэ айладхаа: – Хүнэй үри Эзэкээл, ханые эндэ бүри нүхэлжэ, нүгөө таладань гара. Би хана улам нүхэлөөд, саашаа гарахадам, ямаршьеб үүдэн харагдаба.

⁹ Тэрэ иигэжэ айладхаба: – Орожо, тэндэ хэжэ байгааша жэгшүүритэй муухай юумэнүүдыень харыш.

¹⁰ Тиихэдэнь би оробоб. Элдэб мүлхидэг, юрэдөө, сээртэй бузартай амитадай олон дүрсэнүүд, Израилиин улад зоной мүргэдэг элдэб онгонууд ханада зураатай байба.

¹¹ Израилиин далан удамаршад, Шапаанай Яазаанияа хүбүүнтэй хамта, тэдэнэй урда зогсожо байна, хүн бүхэнэй гарта бойпуур, уталгын утаан анхилан дээшээ бааяжа байба.

¹² Бурхан намһаа асууба: – Хүнэй үри Эзэкээл, Израилиин ахамадуудай нюусаар юу хэжэ байһые харана гүш? Дүрсэ зураатай өөһэд өөһэдынгөө таһалганууд соо тэдэнэй юу хэдэгые харана гүш? «Эзэн маанадые анхарнагүй, энэ орон нютагые орхёо» гэжэ тэдэ өөһэдынгөө үйлэ хэрэгүүдые сагааруулхаяа оролдоно.

¹³ Удаань Эзэн намда иигэжэ айладхаба: – Саашадаа ши тэдэнэй энээнһээшье бүри муухай жэгшүүритэй юумэ хэжэ байһые харахаш.

¹⁴ Тиигээд Тэрэ намайе нангин үргөөгэй хойто бартаанууд руу асарба. Би тэндэ Таммууз бурханай эсэс болоһондо уйдан гашуудан байгааша эхэнэрнүүдые харабаб.

¹⁵ – Хүнэй үри Эзэкээл, харана гүш? Энээнһээшье жэгшүүритэй муухай юумэ харахаш, – гэжэ Тэрэ айладхаба.

¹⁶ Тиигээд Тэрэ намайе нангин үргөөгэй дотоодо хашаа руу оруулба. Тэндэ үүдэнэй болон үргэлэй шэрээгэй хоорондо нюргаараа Эзэнэй нангин руу, нюураараа зүүн зүг руу зогсон, мандажа байгаа наран руу мүргэжэ байгааша хорин табан хүн харагдаба.

¹⁷ – Хүнэй үри Эзэкээл, харана гүш? Иудын хан түрын улад зоной эндэ хэжэ байгааша жэгшүүритэй муухай хэрэгүүдынь багадаад, газар дэлхэйе тэдэ хүсэрхэл, алалсаагаар дүүргэбэ. Тэдэ Намайе дахин сухалдуулхаяа һанана, элдэб янзаар онгонуудта мүргэнэ.

¹⁸ Тиимэһээ тэдэ Минии уур хилэнгэй бүхы хүсые мэдэрхэ! Хайрлахагүйб, энэрэл үзүүлхэгүйб! Намайе гуйжа хашхаралдаашье һаань, Би тэдэниие шагнахагүйб!