Эзэкээл 6 - Библи

Онгонуудта мүргэһэнэй хойшолон тухай

¹ Эзэн намтай хөөрэлдөө бэлэй.

² – Хүнэй үри Эзэкээл! Израилиин хада ууланууд руу эрьежэ, Минии уридшалан буулгаһан айладхал дамжуула, – гэжэ Тэрэ хэлэбэ. –

³ Израилиин хада уулануудта Минии, Эзэн Бурханай, үгэ шагнагты гэжэ хэлэ. Хада уулануудта, гүбээнүүдтэ, жалга, хүндынүүдтэ иигэжэ дуулга: «Би зоной мүргэдэг обоонуудые һэлмээр хюдан үгы хэхэб.

⁴ Иигэжэ үргэлэй шэрээнүүдтнай һандаргагдаха, уталгын шэрээнүүд бута сохигдохо. Онгонуудайнгаа урда тээ зон алуулагдаха.

⁵ Израилиин зоной үхэһэн бэенүүдые онгонуудайнь урда табихаб, яһануудыень үргэлэйнь шэрээнүүд тойрон тараан хаяхаб.

⁶ Израилиин бүхы хотонууд һандаргагдажа, үргэлэйнь шэрээнүүд, онгонуудынь бутаран һалаха, хэһэн зүйлнүүдынь үгы хэгдэхэ.

⁷ Хаа-хаанагүй зон алуулан алдалан унажа, амиды мэндэ үлэгшэдынь Намайе Эзэн гэжэ баталан мэдүүлхэ.

⁸ Гэбэшье үсөөхэн зарим зонииетнай абаржа, ондоо үндэһэ яһатадай дундуур сасан байлгахаб.

⁹ Баряанда байхадаа тэдэ зон Нам тушаа һанаха, Намһаа холодоһондоо, онгонуудта мүргэжэ эхилһэндээ тэдэ өөһэдһөө жэрхэжэ эхилхэ.

¹⁰ Тиигээд тэдэ Намайе Эзэн гээшэ гэжэ мэдэржэ эхилхэ, дэмы хооһон хэһээгээ бэшэ ха юмбиб».

¹¹ Эзэн Бурхан иигэжэ айладхажа байна: – Альгаа таша! Хүлөөрөө дэбһэ! Израилиин улад зоной хэһэн булай муухай хэрэгүүдһээ боложо гай тодхор тохёолдоол гэжэ уйлан хашхаран байгыт! Эдэ зон дайн дажарта, үлэсхэлэн хооһон байдалһаа, тахал үбшэнһөө үхэхэл.

¹² Холо байгаашань халдабарита үбшэнһөө боложо наһа бараха, дүтэ байгаашань дайнда алуулха, амиды мэндэ үлөөшэнь туража үхэхэ. Иигэжэ Минии уур хилэнгэй хүсэн бушаганахал.

¹³ Алуулһан зоной һэенүүд онгонуудай дунда, үргэлэй шэрээнүүдые тойрон, үндэр гүбээ бүхэн дээрэ, үндэр хада дээрэ, һаглагар модон бүхэн доро, мантан сарса модон доро, онгонуудта үргэл асаржа байгааша газар бүхэндэ хэбтэхэ.

¹⁴ Иигэжэ Би тэдээн руу хүрэжэ, орон нютагыень һандаргахаб. Урда зүгэй сүл губиһаа хойто зүгтэхи Риблаа хото хүрэтэр газарые хооһон ханха зайдан болгохоб, Израилиин улад зоной ажаһуугша ямаршье газарые иимэ болгохоб. Иигэжэ хүн бүхэн Намайе Эзэн гээд ойлгон мэдэрхэ.