Эзэкээл 48 - Библи

Хойто зүгтэхи обогуудта газар хубаарилга

^1-7 Газарай хойто хилэ зүүлжээ Дундада далайһаа Хэтлоон хото, Лэбоо-Хамаат, Дамааск Хамаат хоёрой хоорондо оршодог Хацаар-Энаан хүрэтэр үргэлжэлдэг, обог бүхэн өөрын хубиин газарые Израилиин зүүн хилэһээ Дундада далай хүрэтэр нэмжыһэн газарта хойноһоо эхилээд урда зүг хүрэтэр иимэ ээлжээгээр абаха: Даан, Ашээр, Напталии, Мэнашшээ, Эпрааим, Рэүбээн, Иуда.

Тусхай газар

⁸ Иудын обогой газарай удаа, урагшаа, тусхай хуби газар байха. Тэрэнэй утань хорин табан мянган тохой, үргэниинь бусад хуби газарнуудтай адли байха. Тэрэ тусхай хуби газар дээрэ Минии нангин үргөө оршохо.

⁹ Эзэндэ зорюулан гаргажа үгэһэн тэрэ тусхай хуби газарай тэг дунда Минии хубиин газар оршохо. Тэрэ хадаа хорин табан мянган тохой утатай, хорин мянган тохой үргэнтэй байха.

¹⁰ Энэ тусхай нангин газар санаартадай байха: хойто талань хорин табан мянган тохой утатай, баруун талань арбан мянган тохой үргэнтэй, зүүн талань арбан мянган тохой үргэнтэй, урда талань хорин табан мянган тохой утатай байха. Минии нангин үргөө тэгэн дундань оршохо.

¹¹ Бүхы санаартад бэшэ, гансал Цадоок санаартанай үри һадаһад энэ нангин газарай хубида хүртэхэ. Юуб гэхэдэ, левидүүдэй, мүн Израилиин бусад улад зоной нүгэл хэжэ эхилхэдэнь, тэдэл Намда үнэн сэхэ зандаа үлөө бэлэйл.

¹² Эдэ санаартадай газар эгээл нангин хуби гээд тоологдохо, левидүүдэй газарай хилэдэ оршохо.

¹³ Нангин газарайнгаа нүгөө хахадые левидүүдтэ үгэхэб. Мүн лэ хорин мянган тохой ута, арбан мянган тохой үргэн газар тэдэ абаха.

¹⁴ Энэ газар тэдэ худалдажа, андалдажа шадахагүй. Юуб гэхэдэ, энэ газар хадаа Минии болоно.

¹⁵ Үлөөшэ хорин табан мянган тохой ута, табан мянган тохой үргэн газар нангин бэшэ, улад зоной хамтын эдлэлэй гээд тоологдохо. Тэгэн дундань Хото оршохо. Арад зон тэрэ газар дээрэ гэр байра барин, адуу малаа үдхэн байха аргатай.

¹⁶ Тэрэ газар тэб тэбхэрхэн: хойто талань дүрбэ мянган табан зуун тохой, урда талань дүрбэ мянган табан зуун тохой, зүүн талань дүрбэ мянган табан зуун тохой, баруун талань дүрбэ мянган табан зуун тохой тэгшэ хэмжээтэй байха.

¹⁷ Хотые тойрон бэлшээриин газар: хойто зүгһөө хоёр зуун табин тохой, урда зүгһөө хоёр зуун табин тохой, зүүн зүгһөө хоёр зуун табин тохой, баруун зүгһөө баһал хоёр зуун табин тохой салуу газар нэмжыхэ.

¹⁸ Тусхай нангин газарай зүүн болон баруун таладань үлөөшэ газарнууд хотынхидой газарай эдеэ тариха хэрэгтэ үгтэхэ. Тэрэ газар тус тустаа арбан мянган тохой утатай, арбан мянган тохой үргэнтэй байха.

¹⁹ Хото соо ажаһуугша хүн бүхэн, ямаршье обогой хамаагүй, тэрэ газар элдүүрилхэ аргатай.

²⁰ Иигэжэ тусхай таһалагдаһан газарай тэг дунда хубинь Минии нангин газар гээд тоологдохо, тэндэ Хотошье оролсохо. Тэрэ газарай хэмжүүр гэбэл, алишье талаһаа хорин табан мянган тохой, тэгшэ тэбхэр бэлэй.

²¹ Тэрэ газарһаа зүүлжээ Иордан гол хүрэтэр, баруулжаа Дундада далай хүрэтэр газарнууд Израилиин зонхилогшын мэдэлэй байха. Тэрэнэй мэдэлэй газарай тэгэн дунда нангин үргөөтэй Минии нангин газар оршохо.

²² Левидүүдэй, мүн хотынхидой газарнуудай хоорондуур, мүн Иудын болон Бэньямиинэй обогуудай газарнуудай хоорондуур үлөөшэ газарай хубинууд мүн лэ Израилиин зонхилогшын мэдэлэй юм.

Урда зүгтэхи обогуудта газар хубаарилга

^23-27 Энэ тусхай газарһаа урагшаа оршодог газарнууд Израилиин обогуудта хүртэхэ. Хүртэхэ ёһо гуримаарнь, хойто зүгһөө урда зүг руу, тоолобол, иимэ: Бэньямииндэ, Симеондо, Иссахаарта, Зэбүлүүндэ, Гаадта.

²⁸ Гаадай урда хилэ хадаа Израилиин урда хилэ болоно. Тэрэ хилэ Тамаар хотоһоо эхилээд, Мэрибаа-Кадээшэй сэсэрлиг, саашадаа Египедэй хүндыгөөр Дундада далай хүрэтэр үргэлжэлхэ.

²⁹ Энэл даа, Израилиин обогуудта хубаарилха газар. Энэ болбол Би, Эзэн Бурхан, айладхана мүн!

Хотын хаалганууд

^30-34 Хото дүрбэн талаараа тус тустаа гурба-гурбан хаалгануудтай байха. Тэдэ хаалганууд Израилиин арбан хоёр обогой нэрэ зүүхэ. Хойто талада Рэүбээнэй, Иудын, Левиин; зүүн талада Иосифой, Бэньямиинэй, Даанай; урда талада Симеоной, Иссахаарай, Зэбүлүүнэй; баруун талада Гаадай, Ашээрэй, Напталиигай хаалганууд оршохо юм. Хотын дүрбэн хана тус тустаа дүрбэн мянган табан зуун тохой хэмжээгээр үргэлжэлхэ.

³⁵ Бүхыдөө хотын хана арбан найман мянган тохой ута байха. Хото болбол «Эзэн эндэ бии!» гэдэг шэнэ нэрэтэй болохо юм.