Эзэкээл 47 - Библи

Нангин үргөө сооһоо урдагша уһан

¹ Тэрэ хүн намайе дахин һөөргэнь, нангин үргөөгэй үүдэнүүд тээшэ абаашаба. Харахадам, үүдэнүүд дороһоо уһан гаран урдажа байба. Нангин үргөөгэй урда талаһаа, үргэлэй шэрээгэй хажуугаар саашаа зүүн зүг тээшээ тэрэ урдажа байгаа һэн.

² Нангин үргөөгэй хойто үүдэнүүдээр бидэ гаража, зүүн үүдэнүүд тээшэ шэглэбэбди. Үүдэнүүдэй урда зүгһөө уһанай урдан байхые обёорбоб.

³ Тэрэ хүтэлэгшэ зүүн зүг руу шэглэжэ, мянган тохой хэмжүүрээрээ хэмжэбэ. Тиигээд намайе тэндэ уһан соогуур гарахыем абаашаба. Уһан минии шагайта хүрэтэр болоо һэн.

⁴ Тэрэ үшөө мянган тохой хэмжэжэ, намайе тэрээгүүр ябуулба. Уһан үбдэгсөөм болоо һэн. Үшөө мянган тохой хэмжэхэдэнь, уһан минии бэлхээһэн хүрэтэр болобо.

⁵ Тэрэнэй дахин мянган тохой хэмжэхэдэнь, тэндэ минии ябаад гарахын аргагүй, гансал һамархаар гүнзэгы уһан байба.

⁶ Тэрэ хүтэлэгшэ намда хэлэбэ: – Хүнэй үри Эзэкээл, хараһанаа хадуугаарай. Тиигээд намайе тэрэ урасхалай эрье руу абаашаба.

⁷ Урасхалай хоёр эрьеэр олон модон ургажа байгаа.

⁸ Тэрэ хүтэлэгшэ намда иигэжэ хэлэбэ: – Энэ уһан зүүн зүг руу урдажа, Иордан голой нюруугаар Дабһата далайда шудхан ороно. Тиигээд тэндэхи дабһатай уһые дабһагүй болгодог.

⁹ Энэ уһанай урдаһан газарта хаа-хаанагүй амитадай, загаһанай элдэб олон янза амидардаг байха. Юундэб гэхэдэ, энэ урасхал дабһатай уһые дабһагүй һайн болгоно, ажамидарал асарна.

¹⁰ Эн-Гээдиһээ Эн-Эглааим хүрэтэр зон тэрэ далайда загаһа губшажа, губшуурнуудаа эрьеэр хатаан байха. Дундада далайдал адли угаа олон загаһан Дабһата далай соо амидарха.

¹¹ Харин эрьеэр байгааша нуур ба намагтай газарай уһан дабһатай зандаа үлэхэ. Зон тэндэһээ дабһа абадаг байха.

¹² Гол урасхалай хоёр эрьеэр алим жэмэстэ элдэб янзын модод урган байха. Һара бүри жэмэсэй шэнэ ургаса тэдэ үгэхэ, набша намаань хододоо ногоон зандаа байха, эм дом болохо. Юундэб гэхэдэ, энэ урасхал нангин үргөөһөө гаран урдана бшуу.

Газар хубаарилгын гурим

¹³ Эзэн Бурхан улад зондо иигэжэ айладхана: – Израилиин арбан хоёр обогуудай дунда яагаад газар уһа хубаарилхаб гэбэл, иимэ: Иосифой обог хоёр хуби абаха.

¹⁴ Энэ газарые уг залгамжалгын газар болгон үршөөхэб гэжэ Би гараа үргэн тангариглаа бэлэйб. Мүнөө энэ газарые зүбөөр хубаарилан эдлэгты.

¹⁵ Хойто хилэнь Дундада далайһаа эхилээд, зүүлжээ Хэтлоон хотоор үргэлжэлэн, Лэбоо-Хамаатаар Цэдаад хото руу,

¹⁶ Бэротаа, Сибрааһим хотонууд руу шэглэхэ. Тэдэ хотонууд Дамааскын болон Хамаатай орон түрэнүүдэй хоорондо оршодог. Хойто хилэнь Хаураан газарай хилэ дээрэ оршогшо Хацээр-Һаттихоон хото дээрэ түгэсэхэ.

¹⁷ Иигэжэ хойто хилэ хадаа Дундада далай болон Дамааск Хамаат хоёрой хилэ дээрэ оршогшо Хацаар-Эноон хотын хоорондуур гараха болоно.

¹⁸ Зүүн хилэ Хаураан болон Дамааскын хоорондохи хилэһээ эхилээд, Галаад болон Израилиин газарнуудые илган гарагша Иордан голоор зурыха. Тиигээд Тамаар хотын хажууда, Дабһата далай хүрөөд, зүүн хилэ түгэсэхэ.

¹⁹ Урда хилэ хадаа Тамаарта эхилээд, Мэрибаа-Кадээш гэдэг сэсэрлиг хүрэтэр баруун-урда газараар гараха. Саашаа Египедэй хилээр үргэлжэлөөд, Дундада далайда тулаад түгэсэхэ.

²⁰ Баруун хилэ болбол Дундада далайгаар хойшоо Лэбоо-Хамаатһаа баруулжаа газар хүрэтэр гараха.

²¹ Иигэжэ энэ газар уһые обог бүхэндэ хубаажа үгэгты.

²² Жээрэб татан хубаарилаарайгты. Энэ газар таанадай уг залгамжалгын зөөри болохо. Танай дунда ажаһуугша, үхи хүүгэдээ тэндэ түрэн үндылгэгшэ ерүүл зон Израилиин арад зонтой адли өөрын хуби газарта хүртэхэ.

²³ Ямар обогтой хамта тэдэ ажаһуунаб, тэндээл газарай хубида хүртэхэ. Энэ болбол Би, Эзэн Бурхан, айладхана мүн!